Düysenbi, 23 Qırküyek 2019
Dat 12877 47 pikir 22 Tamız, 2019 sağat 11:44

Elbasına jalğan aqparat bergen kim?

Qazaqstan Respublikası Prezidenti
Äkimşiliginiñ basşısı
Q.E. Köşerbaevqa

Qwrmetti Qırımbek Eleuwlı!

Elbasınıñ 21 tamızda ötken "Nwr Otan" partiyasınıñ sayasi keñesiniñ keñeytilgen mäjilisinde aytqan «1 million [şetel qazağın] şaqırdıq. Bwlay birde-bir el jasamadı. Olarğa balalarıñ üylensin, össin desek, [oralmandar] mağan ber dep aqşa swraydı...» degen sözi (aqparat «Azattıq» radiosınıñ saytınan alındı) äleumettik jelilerde jwrttıñ pikir-talasın tudırdı. Söz iesine aşı-aşı sındar da aytılıp jatır.

Ärine, Elbası Nwrswltan Nazarbaev däyeksiz söylemeydi. Qolına tüsken mälimetterge süyene otırıp, pikir bildiredi, soñınan nwsqau beredi.

Mäsele – «[oralmandar] mağan ber dep aqşa swraydı...» degen sol aqparattı Partiya Törağasına kimniñ qanday negizge süyene otırıp bergendiginde bolıp otır. Jwrtqa tüsinikti bolu üşin aldımen osı jağın anıqtap aluımız kerek.

Oralman – tarihi otanında twraqtı twru maqsatında Qazaqstan Respublikasına kelgen jäne osı Zañda belgilengen tärtippen tiisti märtebe alğan, Qazaqstan Respublikası egemendik alğan kezde onıñ şeginen tıs jerde twraqtı twrğan etnikalıq qazaq jäne onıñ Qazaqstan Respublikası egemendik alğannan keyin onıñ şeginen tıs jerde tuılğan jäne twraqtı twrğan wltı qazaq balaları.

Qoldanıstağı «Halıqtıñ köşi-qonı turalı» Qazaqstan Respublikasınıñ 2011 jılğı 22 şildedegi №477-IV Zañına say, jergilikti atqaruşı organdar Qazaqstan Respublikasına oralmandardı qabıldaudıñ öñirlik kvotasınan tıs qonıs audarğan oralmandarğa jäne olardıñ otbası müşelerine twraqtı twrğılıqtı jerine jol jüru jäne mülkin tasımaldau şığındarın öteudi qamtitın birjolğı järdemaqılar belgileui mümkin. Järdemaqılardı töleudiñ tärtibi men şarttarın oblıstardıñ, respublikalıq mañızı bar qalalardıñ, astananıñ äkimdikteri halıqtıñ köşi-qonı mäseleleri jönindegi uäkiletti organ bekitetin ülgilik qağidalar negizinde bekitedi.

Qazirgi tañda bwl kömek Qazaqstannıñ barlıq öñirine kelip jatqan oralmandarğa jasalıp jatqan joq. Tek, Qazaqstan Respublikası Ükimetiniñ 2016 jılğı 18 aqpandağı №83 qaulısımen Oralmandardı qonıstandıru üşin arnayı bekitilgen öñirlerge köşip kelgen ağayındarğa ğana beriledi.

Al, alıs-jaqın şetelderden köşip kelip, Qazaqstan Respublikasınıñ azamattığın alğan qandastarımızdıñ jöni bölek. Olar «oralman» bolıp sanalmaydı. Sebebi, «Oralman» märtebesi Qazaqstan Respublikasınıñ azamattığın alğannan keyin toqtatıladı.

Mwnday azamattardı eski atauımen «Oralman» dep bölmey, Qazaqstan Respublikasınıñ azamatı retinde qarauımız kerek!

Beker obalı ne, qandastarımız bwl künde joğarda aytılğanday  «Halıqtıñ köşi-qonı turalı» zañında körsetilgen bwl aqparattan tügelge juıq habardar. Sonday-aq, olardıñ öz küşine süyenip ömir süruge dağdılanıp oralğanın, özin özi jwmıspen qamtuğa şeber ekenin jergilikti halıq ülgi etip aytadı.

Köşi-qon sayasatınıñ bası-qasında kele jatqan azamat jäne «Nwr Otan» partiyasınıñ halıqpen tığız aralasıp jwmıs istep jürgen qızmetkeri retinde aşıq ayta alam, soñğı jıldarı «Oralman» märtebesin alğan qandastarımızdıñ  partiyağa äleumettik kömek swrap kelui azayğan. Tipti, joq dep aytuğa boladı. Biz de öz tarapımızdan bwl taqırıpta kün qwrğatpay jazıp, jwrtqa tilimiz tesilgenşe aytıp kelemiz.

Olar köbine qwjattanu mäselesimen köbirek keledi. Soñğı uaqıtta Qıtaydan kelgen qandastarımızdıñ «Oralman» märtebesiniñ merzimi ötip ketuine baylanıstı biraz şudıñ bolğanı ras. Twñğış Prezident Nwrswltan Nazarbaev prezidenttik ökilettigin toqtatuğa nebarı tört-bes-kün qalğanda arnayı Jarlıq şığarıp, «Oralman» märtebesiniñ merzimin 2019 jıldıñ 31 jeltoqsanına deyin bir märte wzartıp beru turalı şeşim qabıldadı. Söytip, bwl mäseleni Özi şeşip berip ketti...

Qwrmetti Qırımbek Eleuwlı!

Köşi-qon – Wlt Köşbasşısı Nwrswltan Nazarbaevtıñ EL täuelsizdigin jaryalaudan bwrın jolğa qoyğan TWÑĞIŞ häm WLI sayasatı!

Nwrswltan Äbişwlınıñ kemeñger twlğa, köregen basşı ekenin törtkül düniege birden tanıtqan da – osı alısta jürgen ağayındı Atajwrtqa şaqıru turalı şığarğan BATIL äri TARIHI şeşimi!

Biz – şetten oralğan qazaqtar Elbası Nwrswltan Äbişwlı Nazarbaevtıñ osınau qamqorlığı üşin dän rizamız jäne Ol kisige mäñgi qarızarmız!

Aytpaqşı, 2010 jılğı «Qızılağaş oqiğası» kezinde oblıs äkiminiñ osı auılğa şetelden köşip kelip qonıstanğan ağayındı «oqşaulap» qoyıp, Elbasına «Senderdiñ bwl elge eñbekteriñ siñgen joq!» degizgeni esimizde.

2011 jılğı jaz boyı jalğasqan «Jañaözen ereuilin» Timur Qwlıbaevtıñ oralmandar wyımdastırdı dep jariyalağanın jwrt äli wmıta qoyğan joq.

Söytip, osı qaralauşılardıñ kesirinen «Halıqtıñ köşi-qonı turalı» zañı 2013 jılı jeltoqsanda qandastarımızğa tört jılsız azamattıq berilmeytin etilip, qatañdatılıp qabıldanıp tınğan bolatın.

Demek, Elbası Qazaq köşin qanşama arandatuşılardıñ tar jol-tayğaq keşuinen aman alıp ötip, Wlı Dala Eline eki millinğa juıq qandasın  jetkizdi...

Qısqası, bwl jerde Elbasınıñ kinäsi joq. Aqparat beruşi nemese Elbasınıñ köşi-qon sayasatına qarsı bireuler tağı da arandatıp jibergen boluı mümkin!

Sizden atalğan mäselege baylanıstı tekseru jürgizip, Elbasına «oralmandar mağan ber dep aqşa swraydı...» dep aqparat bergen kim ekenin jäne bwl aqparattı Elbasına qanday negizge süyenip aytqanın anıqtaudı swraymın.

İzgi nietpen,

Auıt Mwqibek

Abai.kz

47 pikir