بەيسەنبى, 15 قاراشا 2018
ءسۇيىنشى! 2321 29 پىكىر 13 ماۋسىم, 2018 ساعات 19:26

6 مىڭ جىلدىق تاريحى بار - دومبىرا

مەملەكەت باسشىسى نۇرسۇلتان نازارباەۆتىڭ جارلىعىمەن  شىلدەنىڭ ءبىرىنشى جەكسەنبىسى  ۇلتتىق دومبىرا كۇنى بولىپ بەلگىلەندى، - دەپ حابارلايدى اقوردانىڭ ءباسپاسوز قىزمەتى.

قازىر ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ  اينالاسىندا تالاي كەلەلى ىستەر جۇزەگە اسىرىلۋدا. سول ماقالادا «جاھاندىق ومىردەگى زاماناۋي قازاقستان مادەنيەتى» ماسەلەسى دە ءسوز بولعان ەدى.

«جاھاندىق ومىردەگى زاماناۋي قازاقستان مادەنيەتىن» الەمگە تانىتۋ ءۇشىن الدىمەن 6 مىڭ جىلدىق تاريحى بار دومبىراعا كوڭىل ءبولىنۋى تەگىن بولماسا كەرەك.

ەندى شىلدەنىڭ ءبىرىنشى جەكسەنبىسى "ۇلتتىق دومبىرا كۇنى" بولىپ بەكىتىلدى. ۇكىمەتىمىز وسى جارلىقتى ىسكە اسىرۋ بويىنشا جۇمىستار جاسايتىن بولادى. ول جۇمىستاردىڭ ورىندالۋ بارىسىن قر پرەزيدەنتتىك اكىمشىلىگى قاداعالاماق.

بۇل بىرەۋلەرگە قىسقا عانا جارلىق بولىپ كورىنۋى مۇمكىن. سوندا دا قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆ قول قويعان بۇل قۇجات بۇكىل قازاقتى رۋحاني تۇرعىدا ءبىر سەرپىلتەرىنە كۇمان جوق.

قادىر اقىننىڭ "ناعىز قازاق - قازاق ەمەس، ناعىز قازاق - دومبىرا" دەيتىنىنىڭ جانى بار.

ءبىزدىڭ دومبىرامىزدىڭ ءتۇپ-تاريحى 6 مىڭ جىلدىقتاردىڭ ار جاعىنان باستالادى.

تاريحقا كوز جۇگىرتەر بولساق، الماتى وبلىسى، جامبىل اۋدانىنداعى مايتوبە جايلاۋىننان تابىلعان تاستاعى بيلەپ جۇرگەن ءتورت ادام مەن دومبىرا سۋرەتىنىڭ وسىدان 6 مىڭ جىل بۇرىن قاشالىپ جاسالعانىن زەرتتەۋشىلەر دالەلدەگەن بولاتىن.

ەندى وسىنداي مىڭ-سان دەرەگىمىزدى الدىمەن قازاققا، سوسىن الەمگە مويىنداتار كەز تۋدى.

ايتپاقشى سول تاستاعى سۋرەتتى 1986 جىلى پروفەسسور س. اقاتاەۆ ەتنوگراف جاعدا بابالىقۇلىنىڭ كومەگىمەن تاپقان بولاتىن.

ول تاس 1993 جىلى مۇراجايدان جوعالىپ كەتكەن. 2008 جىلى Abai.kz اقپاراتتىق پورتالى "دومبىرا - قازاقتىڭ برەندى بولۋى كەرەك" دەگەن باستاما كوتەرىپ، عىلىمي كونفەرەنتسيا وتكىزگەن ەدى. سول كونفەرەنتسيانىڭ سوڭىنان جۋرناليستەر زەرتتەۋ جاساپ، تاريحي قۇندىلىق سانالاتىن اتالمىش تاستى سول كەزدەگى "انا ءتىلى" گازەتىنىڭ ءجۋرناليسى قانات ابىلقايىر (قازىر ءبىزدىڭ Abai.kz پورتالىندا شەف-رەداكتور) ەكىنشى رەت تاۋىپ، مۇراجايعا قويعىزدى.

وسى قۋانىشتى ساتتە جاعدا بابالىقۇلى كەمسەڭدەپ جىلاپ، دومبىرانىڭ كۇنى تۋىپ كەلە جاتقانىن ايتقان ەدى . سول ءسوز، مىنە، راسقا اينالدى!

ءوزى دە قولىنان دومبىراسىن تاستامايتىن ەلباسىمىز - مەملەكەتىمىزدە قازاق رۋحانياتىنىڭ سالتانات قۇرۋىنا مۇمكىندىك تۋعىزدى.

بۇل ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنداعى  «جاھاندىق ومىردەگى زاماناۋي قازاقستان مادەنيەتى» ماسەلەسىنە شىنايى  كوڭىل بولىنە باستاعانىنىڭ بەلگىسى دەسەك تە بولادى.

قولداپ اكەتەر، حالىق امان بولعاي!

نۇرزات توعجان

Abai.kz 

29 پىكىر