Өзбекстан Президенті Шавкат Мирзиеевтің Нұр-Сұлтанға мемлекеттік сапары аясында өткен Қазақстан-Өзбекстан Іскерлік кеңесінің IV отырысы барысында «Узавтосаноат» АҚ машина жасау саласында  500 миллион доллардан астам екіжақты келісімдерге қол қойды. Бұл туралы Өзбекстанның Инвестициялар және сыртқы сауда министрлігі хабарлады.

Өзбекстан мен Қазақстанның екі машина жасау кәсіпорны «Узавтосаноат» АҚ мен «Аллюр компаниялар тобы» АҚ Қостанай шағын торапты «СарыарқаАвтоПром» зауытында Chevrolet жеңіл автомобильдерін шығару бойынша уағдаласты. Жобаны жүзеге асыру үшін 65 миллион доллар инвестиция жоспарланған.

Қазақстандағы тұтынушылар арасында Chevrolet маркалы автокөліктерге деген жоғары сұранысты ескере отырып, осы автомобильдерді Қазақстанда шығару жобасын жүзеге асыру бойынша ынтымақтастықты одан әрі дамытуға екі жақты қызығушылық туындап отыр дейді Өзбекстан тарапы. Келісімдер аясында «СарыарқаАвтоПром» базасында заманауи жоғары технологиялық өндірісті енгізу жоспарлануда, бұл екі ел экономикасының экспорттық әлеуетін арттырады.

Қазақстан Республикасымен ынтымақтастықты кеңейту аясында «Узавтосаноат» қазақстандық автокөлік өндірушісі «Qaztehna» ЖШС-мен 15 миллион доллар сомасына келісімге қол қойды. Қазақстанда өндірілетін өнім түрлерін кеңейту мақсатында «Qaztehna» базасында SINOTRUK HOWO жүк көліктерін шығару ұйымдастырылады.

Қазақстандық компаниялармен қол жеткізілген бірқатар келісімдер ауылшаруашылық машина жасау саласындағы ынтымақтастықты кеңейтуді қамтыды. «Узавтосаноат» мен «Агромашхолдинг KZ» АҚ 15 миллион долларға стратегиялық серіктестік туралы келісімге қол қойды. Қазақстан Республикасында ауыл шаруашылығы техникасын, оның ішінде тракторларды өндіру мен сатуды дамыту көзделіп отыр.

Машина жасаудың негізгі бағыттарымен қатар  қазақстандық компаниялармен Өзбекстан Республикасының автомобиль нарығында заманауи цифрлық шешімдерді енгізу туралы 50 млн долларға келісім жасалды.

2020 жылдың наурыз айынан бастап Қостанайда «UzAuto Motors» компаниясымен бірлесіп Chevrolet маркалы автокөліктерді шығару қолға алынса, биыл «СарыарқаАвтоПром» зауыты «СамАвто» компаниясымен бірлесіп SAZ LE60 төмен еденді автобустарды шығаруда. Сонымен қатар, 2019 жылдың қазан айынан бастап UzAuto Motors шығарған автомобильдер Қазақстандағы ең көп сатылатын автомобильдер рейтингінде жетекші орындарға ие болған.

Abai.kz