ҚР ІІМ Ұлттық ұланында көктемгі шақыру науқаны басталды, оның аясында 22 мамыр мен 30 маусым аралығында құқықтық тәртіп әскерлеріне 7 мыңға жуық адамды шақыру жоспарлануда, деп хабарлайды Ұлттық ұланның баспасөз қызметі.

«Қазақстан Республикасы ІІМ Ұлттық ұланында көктемгі шақыру науқаны басталды. 2026 жылғы 22 мамыр мен 30 маусым аралығында құқықтық тәртіп әскерлерінің қатарына 7 мыңға жуық адамды шақыру жоспарлануда. Бұл туралы ҚР ІІМ Ұлттық ұланының бас қолбасшылығында Ұлттық ұлан бас қолбасшысының бірінші орынбасары — бас штаб бастығы генерал-лейтенант Қайрат Ақтановтың төрағалығымен өткен көктемгі шақыру науқанын ұйымдастыру және өткізу мәселелері жөніндегі ведомствоаралық кеңес барысында белгілі болды», - делінген дүйсенбідегі хабарламада.

Қазіргі уақытта Ұлттық ұланның шақыру және жасақтау бөлімдерінің офицерлері 17 облыс пен республикалық маңызы бар үш қалада жұмыс жүргізуде.

Жас сарбаздардың негізгі бөлігі қоғамдық тәртіпті күзету, бұқаралық іс-шаралардың қауіпсіздігін қамтамасыз ету, сондай-ақ маңызды мемлекеттік объектілер мен қылмыстық-атқару жүйесі (ҚАЖ) мекемелерін күзету жөніндегі тапсырмаларды орындайтын әскери бөлімдерге жіберіледі.

«Бүгінде полиция қызметкерлерімен бірлесіп, Ұлттық ұланның әскери қызметшілері еліміздің 21 қаласында қоғамдық тәртіпті қамтамасыз етуде. Күн сайын құқықтық тәртіпті күзету қызметіне 7 мыңнан астам ұланшы түседі, тағы 2 мыңға жуық әскери қызметші маңызды мемлекеттік объектілер мен ҚАЖ мекемелерін күзету бойынша қызмет атқарады», - деп толықтырды Ұлттық ұланнан.

Атқарылған жұмыс көрсеткіштері

Мәліметтер бойынша, 2026 жылдың басынан бері құқықтық тәртіп әскерлерінің әскери қызметшілері:

• Мыңдаған құқық бұзушылықтың алдын алды;
• Есірткі заттарын заңсыз сақтау жағдайларын анықтады;
• Заңсыз айналымнан 30-ға жуық суық және атыс қаруын тәркіледі.

Бұдан бөлек, әскери қызметшілердің жедел әрі қырағы іс-қимылдарының арқасында азаматтарға жоғалған балалары мен ұялы телефондары қайтарылды.

«Ішкі қауіпсіздік пен тұрақтылықты қамтамасыз етуде Астана, Алматы және Түркістан қалаларындағы мерзімді қызметтегі әскери қызметшілерге ерекше рөл жүктелген. Бөлімшелердің жеке құрамы күн сайын қоғамдық тәртіпті күзетуге, мемлекеттік, қоғамдық-саяси және мәдени-бұқаралық іс-шараларды өткізу кезінде қауіпсіздікті қамтамасыз етуге жұмылдырылады», - деп атап өтілген хабарламада.

Abai.kz