Қазақстанның Ұлттық қауіпсіздік комитеті (ҰҚК) ұзақ уақыт бойы заңсыз өндірілген алтын кенін контрабандалық жолмен Қытайға тасыған "қылмыстық топтың" ұсталғанын мәлімдеді, - деп хабарлайды Абай-ақпарат.

Ұлттық қауіпсіздік комитетінің баспасөз қызметінің хабарлауынша, Алматы, Астана және Степногорск қалаларында жүргізілген арнайы операция кезінде, арасында Қытай азаматы бар қылмыстық ұйым мүшелері құрықталған.

"Алтынкөл бекетінде 106 тонна құрамында алтын бар кен тиелген екі вагон тоқтатылып, жалған құжаттар тәркіленгені хабарланып отыр. Алтын кендерін сақтауға арналған орындарға тінту жүргізілді. Кенді алтын барына тексеруге арналған, кішігірім зертхана анықталды. Бұл деректерге қатысты сотқа дейінгі тергеу басталды және қажетті сараптамалар жүргізіліп жатыр. Өзге ақпарат тергеу мақсатында жарияланбайды", - дейді комитет өкілдері.

Abai.kz