Қазақтар шынымен қойдай жуас ба!? Неге орыс тілді ақпарат қазақты жүндей беруге тиіс...

Бір қараған жанға қазақтар қой емес, түнде барда күндіз жоқ жапалақ кейпінде елестейді. Сондықтан, «таспен жапалақты ұрсаң да, жапалақпен тасты ұрсаңда жапалақ өледі» деген  шығыс нақылы ақпарат кеңестігіндегі ұлттық бейнемізге қарата сөз етілгендей.

Орыс тілді ақпарат құралдары қазақты қойдан жуас "толеранты" жасап кесіп пішіп қойды. Елдің сөзін сөйлеп, ұлттың мұңын айтатындарды "диванный батырға" айналдырды. Енді бұл аз болғандай "Казахстан – для казахов?" деген құйтырқы тақырыпты 2018 соңынан бастап көтеріп келеді.

Бұрынғы Француз, ағылшын отарларында ағылшын және француз тілді баспасөз бар. Бірақ олар ешқашан жергілікті ұлттың шамына тиіп, шабына ши жүгіртпейді. Бізде бәрі керісінше. Осыған тоқтау қоятын кез келген секілді. Орыс тілді ақпарат әлемге қазақтың көзімен ғана қарайтын ақпарат таратуға тиіс. Осыны Ел Үкіметінен талап ететін уақыт жетті. Әрі облыстық, аудандық, қалалық ішкі саясат бөлімі БАҚ ақша бөлгенде осыны ескерсе біраз дүние түгелденер еді.

Орыс тілді ақпарат қазақтың жыртысын жырып, мұңын мұңдауға тиіс.

Әбіл-Серік Әлиакпар

Abai.kz