Preziydent Respublika kýnine arnalghan saltanatty jiynda sóz sóiledi. Búl turaly Aqorda mәlim etti.

Qasym-Jomart Toqaev: «Búl kýndi halqymyzdyng derbes el boluyna jol ashqan qasterli kýn deuge bolady» «Elimizding eng basty merekesi – Respublika kýni qútty bolsyn! Últtyq meyram qarsanynda dәstýrge say Aqorda tórinde memleketimizding ýzdik azamattarymen birge jinalyp otyrmyz. Biyl elimiz azattyqtyng mereyli belesine jetti. Osydan 35 jyl búryn Qazaqstannyng Egemendigi turaly deklarasiya qabyldandy. Dәl osy kýni san ghasyrlyq memlekettilik dәstýrimiz qayta janghyrdy. Kóp úzamay júrtymyz Tәuelsizdik bayraghyn kóterdi. Tarihy әdildik ornap, últtyng ruhy asqaqtady. Sondyqtan búl kýndi halqymyzdyng derbes el boluyna jol ashqan qasterli kýn deuge bolady. Tәuelsizdik – bәrinen qymbat qúndylyghymyz. Ony saqtap, nyghayta týsu – barshamyzgha ortaq qasiyetti borysh. Egemendik – ata-babalarymyzdyng últ mýddesi jolyndaghy óshpes erligining aiqyn kórinisi».

Memleket basshysy: «Biz ótkennen sabaq alyp, eshkimge jaltaqtamay, óz jolymyzben jýrip kelemiz»

«Zanghar oishyl Ábish Kekilbaev «Ótkennen taghylym, ertennen ýmit izdegender ghana ilgeri basa alady» degen. Biz әr kezende últ tarihynda óshpes iz qaldyrghan barlyq memleket jәne qogham qayratkerlerine qúrmet kórsetemiz, olardy eshqashan úmytpaymyz. Sonymen birge keleshekke ýlken ýmitpen, zor senimmen qaraymyz, biyik maqsattargha úmtylamyz. Osy jyldarda elimizding baghyndyrghan belesteri az emes. Biz jer jýzine egemen memleket retinde tanyldyq. Shekaramyzdy shegendep, irgemizdi bekitip, qauipsizdigimizdi qamtamasyz ettik. Birligimizdi bekemdep, tatulyq pen túraqtylyqtyng arqasynda týrli synaqtardan sýrinbey óttik. Býginde jahan júrty elimizding ósip-órkendep kele jatqanyna kuә bolyp, óz qúrmetin kórsetude. Alayda kemshiliksiz, minsiz júmys bolmaytyny anyq. Biz ótkennen sabaq alyp, eshkimge jaltaqtamay, óz jolymyzben jýrip kelemiz. Songhy jyldary halyqtyng әl-auqatyn arttyru ýshin asa manyzdy qadamdar jasaldy. 2019 jyly auqymdy reformalar qolgha alyndy. Qazaqstan jana túrpatty el bolu jolyna týsti. Jalpyhalyqtyq referendum arqyly Ata zanymyzgha týzetuler engizildi. Parlamentting qúzyreti keneydi, Ýkimetting jauapkershiligi artty. Konstitusiyalyq sot qúryldy. Adam qúqyqtary jónindegi uәkil instituty konstitusiyalyq mәrtebege ie boldy. Biyl shilde aiynan bastap Kassasiyalyq sot jýiesi iske qosyldy, búl qoghamymyzda әdilettilikti kýsheytuge jaghday jasady».

Abai.kz