Алматы облысының орталығы Қонаев қаласында өткен «Үйді басқару: жауапкершілік, сенім, нәтиже» атты ауқымды форум өңірдегі тұрғын үй-коммуналдық шаруашылығы саласына жаңа серпін берген маңызды шара болды.

«Amanat» партиясының «TURGYNDAR AMANATY» жобасы аясында ұйымдастырылған бұл жиын көпқабатты тұрғын үйлерді басқарудағы қордаланған түйткілдерді тарқатып, коммуналдық инфрақұрылымды жаңғырту мен тұрғындардың қауіпсіздігін қамтамасыз етудің нақты жолдарын айқындап берді. Форумның басты ерекшелігі – билік өкілдері мен Мүлік иелері бірлестіктері (МИБ) және Пәтер иелері кооперативтері (ПИК) басшыларының тікелей диалогқа шығып, мәселелерді ашық талқылауында болды. Жиынға қатысқан партия хатшысы Ержан Жылқыбаев пен облыс әкімі Марат Сұлтанғазиевтен бастап, Мәжіліс пен мәслихат депутаттары, құқық қорғау органдарының басшылары бұл саладағы реформалардың халықтың күнделікті тұрмысына тікелей әсер ететінін атап өтті.

Партия хатшысы Ержан Жылқыбаев өз сөзінде «TURGYNDAR AMANATY» жобасының негізгі мақсаты тек мәселені тізіп шығу емес, оларды шешудің жүйелі тетігін қалыптастыру екеніне тоқталды. Бүгінде облыс аумағында екі мыңнан астам көппәтерлі тұрғын үй кондоминиум нысаны ретінде заңдастырылғанымен, тариф белгілеу, аулаларды абаттандыру, лифт шаруашылығы мен интернет сапасы сияқты мәселелер әлі де өзекті болып қалып отыр. Осы олқылықтардың орнын толтыру үшін МИБ және ПИК төрағаларын кәсіби тұрғыда оқыту, депутаттық корпуспен кері байланысты нығайту және «Халық қатысатын бюджет» жобасын тиімді пайдалану көзделуде. Бұған дейін еліміздің жеті өңірінде оң нәтиже көрсеткен бұл жоба енді Алматы облысында да өз жемісін бермек. Мәселен, Астана қаласында ашылған арнайы жобалық фронт-офис аз уақыт ішінде жүздеген өтінішті қабылдап, тұрғындарға нақты көмек көрсеткен. Дәл осындай орталықты Алматы облысында да ашу ұсынылды, бұл қадам азаматтардың өз мәселелерін «бір терезе» қағидатымен жедел шешуіне жол ашады.

Алматы облысының әкімі Марат Сұлтанғазиев тұрғын үй-коммуналдық шаруашылығының тек шаруашылық емес, халықтың әлеуметтік көңіл-күйін анықтайтын стратегиялық сала екенін ерекше атап өтті. Әкімнің пайымынша, қазіргі уақытта жаңадан пайдалануға берілген жүздеген тұрғын үй кешендері басқарудың мүлде жаңа мәдениетін талап етеді. Ескіше жұмыс істеудің уақыты өткенін, ендігі кезекте ашықтық пен цифрландырудың маңызы зор екенін айтты. Тұрғындар жиналған қаражаттың қайда, қалай және қандай мақсатқа жұмсалып жатқанын анық білгенде ғана МИБ пен ПИК жұмысына деген сенім артады. Бұл ретте үй басқару ісі кәсіби менеджмент деңгейіне көтерілуі тиіс. Көпқабатты үйлерді жай ғана ұстап тұру емес, олардың заманауи талаптарға сай қызмет көрсетуін қамтамасыз ету – басты басымдық.

Форум барысында тек билік өкілдері ғана емес, жергілікті жердегі нақты мәселелермен бетпе-бет келіп жүрген мамандар да сөз алды. Іле ауданынан келген Зарина Абибова ескі тұрғын үй қорындағы инженерлік желілердің тозуы, апаттық жұмыстарға қажетті арнайы техниканың тапшылығы сияқты ащы шындықты көтерді. Сондай-ақ тұрғындардың коммуналдық қарыздары және пәтер сату-сатып алу кезіндегі құқықтық шикіліктер МИБ жұмысына айтарлықтай кедергі келтіріп отырғанын жеткізді. Осыған байланысты облыстық деңгейде басқарушы ұйымдардың басын біріктіретін қауымдастық құру және нотариустар үшін ортақ қағидалар енгізу қажеттілігі айтылды. Бұл ұсыныстардың барлығы халықтың құқықтық сауатын арттыруға және төлем тәртібін жақсартуға бағытталған.

Жиында табиғи апаттар кезіндегі өзара көмек пен жауапкершілік тақырыбы да айналып өтпеді. «Әсем Қапшағай» кооперативінің төрайымы Надежда Алферова Қонаев қаласында болған жойқын дауыл кезіндегі қиындықтарды еске алды. Секундына 27 метрге дейін жеткен жел ондаған үйдің шатырын ұшырып, электр желілерін істен шығарғанда, «Жастар Рухы» белсенділері бірінші болып көмекке келген. Жастардың мұндай сын сағатта тұрғындармен бірге болып, тазалық пен қалпына келтіру жұмыстарына атсалысуы – жаңа басқару мәдениетінің ғана емес, қоғамдық ынтымақтастықтың да көрінісі. Бұл мысал кез келген түйткілдің тек бірлескен күш-жігермен ғана шешілетінін тағы бір мәрте дәлелдеді.

Форумның соңы мобильді қоғамдық қабылдау алаңына ұласты. Мұнда 200-ге жуық тұрғын өз мәселелерін жауапты мамандарға тікелей қоюға мүмкіндік алды. Қабылдауға тек әкімдік қызметкерлері емес, сонымен қатар полиция, салық органдары, «Алатау Жарық Компаниясының» өкілдері, заңгерлер мен прокуратура мамандары қатысты. Әрбір өтініш бойынша заң аясында түсініктеме беріліп, кейбір мәселелер сол жерде-ақ оң шешімін тапты. Осылайша, Қонаевта өткен бұл шара құрғақ есеп беру емес, нақты істің, ашық диалогтың және ортақ мақсатқа бірігудің алаңына айналды. Алматы облысының әрбір тұрғыны үшін қауіпсіз, қолайлы әрі сапалы өмір сүру ортасын қалыптастыру – партияның ғана емес, бүкіл қоғамның міндеті екені айқын сезілді. Мұндай форумдар мен «TURGYNDAR AMANATY» жобасы алдағы уақытта тұрғын үй саласындағы көптеген күрмеулі мәселелердің шешілуіне негіз болары сөзсіз. Экологиялық таза аула, жарық подъезд, қауіпсіз лифт және ашық басқару – бұл әрбір облыс тұрғынының лайықты құқығы және сол жолдағы жұмыстар жүйелі түрде жалғаса бермек.

Abai.kz