Республика күніне арналған салтанатты жиында Мемлекет басшысы Қасым-Жомарт Тоқаев қоғамда жиі талқыланатын саяси сабақтастық пен тарихи баға беру мәселесіне қатысты салмақты мәлімдеме жасады.

Президент Егемен Қазақстанның іргесін қалауда Тұңғыш Президент Нұрсұлтан Назарбаевтың еңбегі зор екенін және оның есімі ел тарихында ешқашан ұмытылмайтынын атап өтті.

«Әділеттілік – ең жоғары рухани құндылық»

Президент өз сөзінде бүгінде елімізде кеңінен дәріптеліп жатқан «Әділетті Қазақстан» концепциясы тек экономикалық немесе саяси реформалармен шектелмейтінін білдірді. Шын мәнінде, әділеттілік қағидаты тарихи үрдістер мен тұлғалардың еңбегіне де тура, парасатты көзқараспен баға беруді талап етеді.

«Біз бәріміз біртұтас қоғам болып Әділетті Қазақстанды құру ісін қолға алдық. Әділеттілік қағидаттарын халқымыз арасында дәріптеп жатырмыз. Шын мәнінде, әділеттілік ең жоғары рухани құндылық десек дұрыс болады. Біз тарихи үрдістерге әділетті көзбен қарап, әділ баға беруіміз керек», – деді Мемлекет басшысы.

Тәуелсіздік таңындағы тарихи рөл

Қасым-Жомарт Тоқаев тәуелсіздіктің елең-алаңындағы күрделі кезеңді еске салып, тоқырау жылдарында мемлекеттілікті сақтап қалу мен оны аяғынан тік тұрғызу оңайға соқпағанын тілге тиек етті. Тұңғыш Президенттің сол кездегі реформалары мен саяси шешімдері мемлекетіміздің дамуына берік негіз қалады.

Мемлекет басшысы өз сөзінде:

«Сондықтан Егемен Қазақстанның негізін қалауға, оның өте күрделі экономикалық жағдайда дамуына, еліміздің көптеген тарихи жетістікке қол жеткізуіне зор үлес қосқан Тұңғыш Президент Нұрсұлтан Әбішұлының есімі ешқашан ұмытылмайды деп ойлаймын. Себебі, бұл әділеттілікке сай келетін мәселе», – деп түйіндеді.

Тарихи сабақтастық пен Ата заң үстемдігі

Мемлекет басшысының бұл мәлімдемесі қоғамдағы біржақты көзқарастарға тосқауыл қойып, тарихи тепе-теңдікті сақтаудың маңыздылығын көрсетті. Өткен тарихты қаралау немесе сызып тастау емес, одан сабақ алып, жетістіктерді бағалай білу – өркениетті қоғамның белгісі.

Сонымен қатар, Президент мемлекеттің басты тірегі ретінде қоғамдағы ішкі татулық пен Ата заңның үстемдігін ерекше атап өтті. Конституция – еліміздің егемендігін, жеріміздің тұтастығын және әрбір азаматтың заңды құқығын қорғайтын негізгі кепіл болып қала береді.

Abai.kz