توقاەۆ نازارباەۆتىڭ تاريحتاعى ورنى تۋرالى ايتتى
رەسپۋبليكا كۇنىنە ارنالعان سالتاناتتى جيىندا مەملەكەت باسشىسى قاسىم-جومارت توقاەۆ قوعامدا ءجيى تالقىلاناتىن ساياسي ساباقتاستىق پەن تاريحي باعا بەرۋ ماسەلەسىنە قاتىستى سالماقتى مالىمدەمە جاسادى.
پرەزيدەنت ەگەمەن قازاقستاننىڭ ىرگەسىن قالاۋدا تۇڭعىش پرەزيدەنت نۇرسۇلتان نازارباەۆتىڭ ەڭبەگى زور ەكەنىن جانە ونىڭ ەسىمى ەل تاريحىندا ەشقاشان ۇمىتىلمايتىنىن اتاپ ءوتتى.
«ادىلەتتىلىك – ەڭ جوعارى رۋحاني قۇندىلىق»
پرەزيدەنت ءوز سوزىندە بۇگىندە ەلىمىزدە كەڭىنەن دارىپتەلىپ جاتقان «ادىلەتتى قازاقستان» كونتسەپتسياسى تەك ەكونوميكالىق نەمەسە ساياسي رەفورمالارمەن شەكتەلمەيتىنىن ءبىلدىردى. شىن مانىندە، ادىلەتتىلىك قاعيداتى تاريحي ۇردىستەر مەن تۇلعالاردىڭ ەڭبەگىنە دە تۋرا، پاراساتتى كوزقاراسپەن باعا بەرۋدى تالاپ ەتەدى.
«ءبىز ءبارىمىز ءبىرتۇتاس قوعام بولىپ ادىلەتتى قازاقستاندى قۇرۋ ءىسىن قولعا الدىق. ادىلەتتىلىك قاعيداتتارىن حالقىمىز اراسىندا دارىپتەپ جاتىرمىز. شىن مانىندە، ادىلەتتىلىك ەڭ جوعارى رۋحاني قۇندىلىق دەسەك دۇرىس بولادى. ءبىز تاريحي ۇردىستەرگە ادىلەتتى كوزبەن قاراپ، ءادىل باعا بەرۋىمىز كەرەك»، – دەدى مەملەكەت باسشىسى.
تاۋەلسىزدىك تاڭىنداعى تاريحي ءرول
قاسىم-جومارت توقاەۆ تاۋەلسىزدىكتىڭ ەلەڭ-الاڭىنداعى كۇردەلى كەزەڭدى ەسكە سالىپ، توقىراۋ جىلدارىندا مەملەكەتتىلىكتى ساقتاپ قالۋ مەن ونى اياعىنان تىك تۇرعىزۋ وڭايعا سوقپاعانىن تىلگە تيەك ەتتى. تۇڭعىش پرەزيدەنتتىڭ سول كەزدەگى رەفورمالارى مەن ساياسي شەشىمدەرى مەملەكەتىمىزدىڭ دامۋىنا بەرىك نەگىز قالادى.
مەملەكەت باسشىسى ءوز سوزىندە:
«سوندىقتان ەگەمەن قازاقستاننىڭ نەگىزىن قالاۋعا، ونىڭ وتە كۇردەلى ەكونوميكالىق جاعدايدا دامۋىنا، ەلىمىزدىڭ كوپتەگەن تاريحي جەتىستىككە قول جەتكىزۋىنە زور ۇلەس قوسقان تۇڭعىش پرەزيدەنت نۇرسۇلتان ءابىشۇلىنىڭ ەسىمى ەشقاشان ۇمىتىلمايدى دەپ ويلايمىن. سەبەبى، بۇل ادىلەتتىلىككە ساي كەلەتىن ماسەلە»، – دەپ تۇيىندەدى.
تاريحي ساباقتاستىق پەن اتا زاڭ ۇستەمدىگى
مەملەكەت باسشىسىنىڭ بۇل مالىمدەمەسى قوعامداعى بىرجاقتى كوزقاراستارعا توسقاۋىل قويىپ، تاريحي تەپە-تەڭدىكتى ساقتاۋدىڭ ماڭىزدىلىعىن كورسەتتى. وتكەن تاريحتى قارالاۋ نەمەسە سىزىپ تاستاۋ ەمەس، ودان ساباق الىپ، جەتىستىكتەردى باعالاي ءبىلۋ – وركەنيەتتى قوعامنىڭ بەلگىسى.
سونىمەن قاتار، پرەزيدەنت مەملەكەتتىڭ باستى تىرەگى رەتىندە قوعامداعى ىشكى تاتۋلىق پەن اتا زاڭنىڭ ۇستەمدىگىن ەرەكشە اتاپ ءوتتى. كونستيتۋتسيا – ەلىمىزدىڭ ەگەمەندىگىن، جەرىمىزدىڭ تۇتاستىعىن جانە ءاربىر ازاماتتىڭ زاڭدى قۇقىعىن قورعايتىن نەگىزگى كەپىل بولىپ قالا بەرەدى.
Abai.kz
