Облысымыздағы ауыл шаруа­шылығы саласының еңбеккер­лері үстіміздегі жылды табысты қорытындылап, «Алтын күз» салтанатты жиынында  озаттар үлкен құрметпен марапатталды.  

Облыс әкімі Бейбіт Атамқұлов биыл мол өнім алған дихандарды арнайы алғыс хаттармен марапаттады.

Алдымен, өңір басшысы еңбеккерлерді келешектің жоспарымен таныстырды. Белгілісі сол, енді аймақтарда ауыл шаруашылығын дамытудың жаңа жобасы жасалады. Әрбір ауданда арнайы техника станциялары құрылады. Одан бөлек, төмен пайызды несиелердің дені бұдан былай игерілмей жатқан жерлерді пайдалануға бағытталады.

Енді аудандардың көрсеткіштеріне тоқталсақ. Астық өндіру саласы бойынша Қазығұрт ауданы облыста көш бастап тұр. Биыл онда қырық мың бір жүз гектар алқапқа егін егіліп, гектарынан 24 центнерден өнім алынған. Ал, ауданның мақтаулы  шаруасы Мәди Тайсалов озат астық өндіруші болып танылды. Сондай-ақ, мақсары өндіруден ІІІ-орынды иеленген Қазығұрт ауданы марапатталып, бағалы сыйлықтарға ие болды.

Одан бөлек биыл ауданымызда мемлекеттік бағдарламалардың орындалу деңгейі де жоғары. Мәселен,  жылыжай көлемі 82,8 га жеткізілді. Ағымдағы жылға берілген 8 га жылыжай салу тапсырмасы 9 айда 8,18 га болып орындалып 102,3 пайызды құрады.(Олардан өндірілген өнім 32800 тонна Алматы, Астана, Шымкент қалаларына сатылуы қамтамасыз етілді.)

Тамшылатып суару әдісі қолға алынып барлығы 1543 га жерге осы әдіс ендірілді.  Қақпақ, Қызылқия ауыл округінде биылғы жылы «Аманкелді» ЖШС 200 га жерге жеміс-жидек екпелерін егіп, көшет өндіру жұмыстарын қолға алды. Тапсырмадағы 850 га тамшылатып суару әдісін ендіру 9 айда 596,8 га немесе 70,2 пайызға орындалды. 

Соңғы жылдары интенсивті бау егу жұмыстары қолға алынып, «Алтынтөбе» ЖШС-мен 500 га егістік жер бөлініп, бүгінгі таңға тамшылатып суару әдісімен 20 га бау егілді. Сондай-ақ «Аманкелді» ЖШС-гі ағымдағы жылы Қызылқия, Қақпақ ауыл округтерінде 180 га бау отырғызды.