Елдің премьер-министрі Ларс Лёкке Расмуссен Дания үшін Скандинавия елдерінің шекараларын жаба бастауының үлкен зардаптары болатынын мәлімдеді. Оның сөзінше, бұл жайт, елге ағылған босқындар санын арттырады. France-Pressтің хабарлауынша, әзірге шекаралық бақылау он күнге енгізілген, алайда бұл мерзім аяқталысымен тағы да созылуы мүмкін.

Мұның алдында Швеция босқындардың жаппай ағылуының алдын алу үшін, Даниямен арадағы шекарада құжаттар тексеруді бастады. Швед үкіметі босқындардың есепсіз ағынын басқаруға шамасы жетпейтіні туралы мәлімдеді. 2015 жылы Швеция 160 мың, ал Дания  18 мың босқынға баспана берген.

Германия СІМ Дания мен Швецияның шараларын Шенген аумағына қатер төндіреді деп сынға алды. Былтыр Европаға миллионнан астам мигрант пен босқын келген, олардың көпшілігі Сирия, Ирак және Ауғанстан азаматтары.

Абай-ақпарат