2015 жылы Ресейде 9 адам ксенофобия мен ұлтшылдықтың асқын түрінен болған шабуылдың құрбаны болған, кем дегенде 68 адам жарақат алған. Бұл туралы «Сова» құқық қорғау орталығына сілтеме жасай отырып "Интерфакс" агенттігі хабарлады. Құқық қорғаушылардың Ресейдің 17 аймағында өткізген зерттеу қорытындысы бойынша ксенофобия мен ұлттық төзбеушіліктен туындайтын зорлық-зомбылық жағынан бірінші орында Мәскеу тұр (3 адам қаза тапқан, 26-сы жарақат алған), екінші орында – Санкт-Петербург (3 адам қаза тапқан, 14-і жараланған). Мұндай қылмыс түрі Мәскеу, Самара және Новосибирь облыстарында да өршіп тұр. Көбінесе Орталық Азия мен Кавказ өңірінің тумалары осындай шабуылға ұшырайды. «Сова» ақпараттық-сараптамалық орталығы Ресейдегі діни төзімсіздік, ксенофобия және ұлтшылдық мәселелерін зерттеумен айналысады.

Нұргелді Әбдіғаниұлы

Abai.kz