Ғаламторда Қазақстан Президенті Нұрсұлтан Назарбаев туралы "Жұлдыздар тоғысқанда" ("Так сложились звезды") фильмінің бесінші бөлімінің трейлері шықты, - деп хабарлайды Tengrinews.kz тілшісі. Картина кинотеатрлардан 28 сәуірде көрсетіле бастайды.

Сюжет бойынша, ағылшын жазушысы Джереми Вильсон Нұрсұлтан Назарбаевтың өмірбаянын жазу мақсатында онымен кездесуге тырысады. Дегенмен сұхбат мемлекеттің құрылуы туралы ертегіге айналады. Журналист Нұрсұлтан Назарбаев еске алған оқиғалардың куәсі болады.

Президент туралы фильмнің бесінші бөлімін ресейлік режиссер Сергей Снежкин түсірді. Ал Нұрсұлтан Назарбаевтың ролінде бесінші бөлімде Берік Айтжанов ойнайды, алдыңғы бөлімдерінде Президент болып Нұрлан Әлімжан ойнаған болатын. Тұңғыш Президенттің қыздарының ролін қазақстандық актрисалар - Қарлығаш Мұхамеджанова мен Динара Бақтыбаева сомдайды.

Сонымен қатар, картинадан Хью Фрейзер, Алтынай Нөгербек, Игорь Угольников, Сергей Гармаш, Дарья Мороз, Алексей Гуськов, Алдабек Шалбаев, Азамат Сатыбалды, Ғани Құлжанов, Еркебұлан Дайыров, Жанель Мақажанова, Ричард Кордери мен Стивен Пейсиді көруге болады. Фильмнің түсірілімі Қазақстан мен Ресейде өтті.

Abai.kz