Бадам Ордабасы ауданындағы ең үлкен ауылдық округ есептеледі. Халқының саны – 15400. Ауыл әкімі Махмуд Қонысовтың айтуынша, келешекте Бадам индустриалды аймаққа айналмақ. Қазірдің өзінде ауылда үлкенді-кішілі 17 зауыт жұмыс істейді. Алдағы уақытта тағы 16 ірі зауыттардың құрылысы жүргізіледі деген жоспар бар. «Бөрте Милка» ЖШС іске қосқалы отырған сиыр фермасындағы жұмыстардың барлығы компьютер арқылы атқарылады. Сиырдың желінін автоматтың өзі тауып, өзі сауады. Егер сиыр ауырып, температурасы көтеріліп тұрған болса компьютер оны сауудан бас тартады. Сондай-ақ, ауылдық округте бірнеше қыш зауыты бар, нан өнімдерін өндірумен айналысатын «Ордабасы нан» мекемесі жұмыс істейді. Оның белгиялық құрал-жабдықтарымен жабдықталған диірменінен шыққан ұнның сапасы өте жоғары бағаланады. Ол да компьютермен басқарылады. Бір тонна бидайдан қанша кебек, қанша жоғары, бірінші және екінші сұрыпты ұн шығатынын дәлме дәл есептеп береді. Ал бидайды Солтүстік Қазақстаннан тасымалдайды. Аты республикаға танымал «Ордабасы құс» шаруашылығында күркетауық етінің 16-18 түрлі өнімі шығарады. Шұжықтың да қаншама түрі өндіріледі. Өздерінің фирмалық дүкендері жұмыс істейді.

Ауылдық округте 8 мектеп бар, тағы бір үлкен білім ұясының іргетасы қалануда. Ең үлкен – С.Сейфуллин атындағы мектепте 1700-ден астам оқушы бар. Бала туу көрсеткіші жоғары.  Бірінші сыныпқа биыл 155 бала келіпті. Жуырда бірінші сынып оқушыларының аллеясын ашып, онда аталған 155 бала көшет қондырған. Енді олар мектепті бітіргенге дейін сол ағаштарын өздері баптайтын болады. Бұл үрдіс жыл сайын жалғасын табатын болады. Сонда балалар біріншіден, табиғатты аялауға үйренсе, екіншіден туған жерге деген патриоттық сезімдері жоғары болары сөзсіз. 

Abai.kz