Астана. 17 желтоқсан. ҚазТАГ – Еуропадағы қауіпсіздік және ынтымақтастық ұйымының (ЕҚЫҰ) бас хатшысы Марк Перен де Бришамбоға «Достық» ордені табыс етілді.

ҚР СІМ баспасөз қызметі хабарлағандай, награданы Қазақстан президентінің атынан ҚР сыртқы істер министрінің орынбасары Константин Жигалов салтанатты жағдайда Венадағы  Хофбург сарайында ҚР Тәуелсіздік күні құрметіне және Қазақстанның ЕҚЫҰ-дағы төрағалығының аяқталуына арналған салтанатты кеште табыс етті.

ЕҚЫҰ-ның арнайы елшісі, Қазақстан сыртқы істер вице-министрі К. Жигалов ЕҚЫҰ атқарушы құрылымдары мен қатысушы мемлекеттеріне Қазақстанға жыл бойына көрсеткен қолдауы үшін, сондай-ақ Ұйымның Астанадағы саммитінің табысты өтуіне белсенді ат салысқаны үшін ризашылығын танытты.

«Өзінің жауап сөзінде бас хатшы Қазақстанды ЕҚЫҰ-да табысты және шынымен де тарихи төрағалығы үшін құттықтады. М.П.Де Бришамбо оған тапсырылған награда Астана саммитіне дайындық және оны ЕҚЫҰ-ның үлкен табысы етіп өткізуге еңбек сіңіргендерге көрсетілген құрмет деп қабылдайтынына сенім білдірді», - деп көрсетеді СІМ баспасөз қызметі.

Кеш қонақтарына Қазақстан өнер шеберлерінің концерттік бағдарламасы ұсынылды. Онда халық өлеңдерін, қазақтың және еуропалық авторлардың классикалық шығармаларын «Керулен» фольклорлық ансамбілі, әртістер Эльмира Жаңабергенова, Айгүл Үлкенбаева, Нұржана Жанпеисова, Гүлзира Бокейхан, Анель Нұрсеитова, Медет Чотабаев, Жұлдыз Түтебаева мен Аида Аюповалар орындады.