Ташкент. 27 желтоқсан. ҚазТАГ – «Мемлекеттік рәміздер туралы Өзбекстан Республикасының кейбір заңдарына және әкімшілік жауапкершілік туралы Өзбекстан Республикасының Кодексіне өзгертулер мен толықтырулар енгізу туралы» Өзбекстан Республикасының заңына сәйкес мемлекеттік рәміздерді коммерциялық мақсатта пайдалануға тыйым салынды. Заң мәтіні баспасөзде жарияланды.

Заңды олий мәжіліс (парламенттің төменгі палатасы) қарашаның аяғында қабылдап, сенат желтоқсанның басында мақұлдады. Заң жарияланған күннен бастап күшіне енді.

«Бұл заң осы саладағы олқылықтарды толтыру үшін, мемлекеттік рәміздерді пайдалануды реттейтін, оны коммерциялық мақсатта пайдалануға тыйым салумен, сондай-ақ бұл заңды бұзғандарға әкімшілік жаза қолдау мәселесін реттеу үшін қабылданды», - деп хабарлайды баспасөз қызметі.

Өзбекстан Конституциясының 5-ші бабына сәйкес, мемлекеттік рәміздерге ту, елтаңба мен ел әнұраны жатады.