«Ешқандай құпия жоқ. Сіздер білесіздер, мен қазіргі және бұрынғы әріптестеріме әрқашан ашықпын. Мен шын мәнінде Алмазбек Шаршенұлымен кездестім. Біз аймақтағы және Қырғызстандағы жағдайды талқыладық», - деді Путин журналистер сұрағына жауап беріп.

Мұнан бөлек Путин өзінің Қырғызстанға қатысты ұстанымын жеткізген.

«Қырғызстан біздің одақтасымыз, бізге жақын мемлекет. Қырғызстанда кемінде екі рет ішкі төңкеріс орын алды. Мен Қырғызстан халқының мүддесіне тоқталу керек деп ойлаймын. Қырғыз елі саяси тұрақтылықты қалайды, бар халық қазіргі президент айналасына топтасып, елдің дамуына көмектесуі керек. Бізде Қырғызстанмен әріптестік жөнінде көптеген жобаларымыз бар, мұның бәрін қазіргі билікпен бірлесіп жүзеге асыруымыз керек», - деп атап өтті Ресей президенті.

Бұрынғы президент Алмазбек Атамбаев бастаған делегация 24 шілдеде Кант әуебазасы арқылы Мәскеуге ұшып кеткен. Оның кеңесшісі Құндыз Жолдубаева "жоғары деңгейде кездесулер өткіземіз" деп хабарлаған.

Мұның алдында Қырғызстан президенті Сооронбай Жээнбеков 11 шілдеде қысқа сапармен Мәскеуге барған.

Алмазбек Атамбаев үш рет тергеуге шақырылды. Бірақ біреуіне де бармады.

27 маусымда қырғыз парламенті Алмазбек Атамбаевты экс-президент мәртебесінен айырған.

Abai.kz