Шәріпбек қазір Нұр-Сұлтандағы ауруханалардың бірінің жан сақтау бөлімінде жатыр. 24 маусымда Арыстағы қару қоймасында жарылыс болып, адамдарды эвакуация жасаған кезде 8 жасар Аян Шәріпбекті көлік қағып, басы жарақаттанған еді.

«Ол баланы [Қазақстанға] тәжірибе алмасуға келген шетелдік нейрохирургтер де қарады. Дәрігерлер қолдарынан келгенін жасап жатыр. Бірақ көп жағдай дәрігерлердің қолында емес. Өкінішке орай, баланың бас жарақаты өте ауыр» деді Біртанов Азаттыққа.

Министрдің сөзінше, қалған екі науқастың бірі Алматыда, екіншісі Шымкенттегі ауруханада, олардың жағдайы жақсарып келеді.

24 маусымда Түркістан облысы Арыс қаласындағы әскери қойма жарылды. Денсаулық сақтау министрлігінің дерегінше, жарылыстан үш адам (Арыс тұрғыны мен екі әскери) қаза тауып, 400-ден астам адам дәрігер көмегіне жүгінген.

27 маусымда Шымкентте шеруге шыққан жүздеген арыстық соңғы он жыл ішінде төрт рет жарылыс болған Арыс қаласына бармайтынын айтып, биліктен өздерін басқа жаққа көшіруді талап еткен. Ертеңінде 28 маусымда Шымкент пен көрші елді мекендерді уақытша паналаған арыстықтар үйлеріне оралды. Билік Арыстағы әр тұрғынға 100 мың теңге беретінін айтқан.

Abai.kz