قاراسازدىق مۇقاعاليشىل وقىرماندارعا حات

ءبىز، قاراساز اۋىلىنىڭ تۇرعىندارى، ءوزىمىز ويلاستىرعان مىنا ءبىر ۇيعارىمدى مۇقاعاليشىل وقىرمانداردىڭ نازارىنا ۇسىنۋدى ءجون كوردىك. ونىڭ ءمانىسى – اقيىق اقىن مۇقاعالي ماقاتاەۆقا جانە «مۇقاعالي» جۋرنالىنا بايلانىستى.

وزدەرىڭىز بىلەسىزدەر، مۇقاعاليدىڭ كىندىك قانى قاراساز توپىراعىنا تامدى. وسى جەردە ءوسىپ، وسى جەردە ەرجەتتى. قالام ۇستاۋدىڭ العاشقى قۋانىشىنا كەنەلدى. اقىن بولۋدىڭ سالماعىن سەزىندى. بۋىنىن بەكىتىپ، ەلشەنبۇيرەكتىڭ ەتەگىنەن الماتىعا اتتاندى. قىرانعا اينالعان پەرزەنتىنە قاراساز سۇيىنە قارادى. پوەزيانىڭ ۇلى بيىگىنە كوتەرىلگەن تالانتتى ۇلىمىز داڭققا بولەنىپ، مارتەبەمىزدى ءوسىردى. سوندىقتان ۇلى اقىنعا قاتىستى شارالاردىڭ ءبارى ءبىز ءۇشىن ماڭىزدى.

2005 جىلى «مۇقاعالي» جۋرنالى جارىققا شىققاندا، ونى ەرەكشە قارسى العان قاراسازدىقتار بولاتىن. قولىمىزدان تۇسپەيتىن اقىن كىتاپتارىنا ەندى اقىن اتىنداعى باسىلىم قوسىلدى. سول جىلى بۇكىل اۋىل «مۇقاعالي» جۋرنالىنا ءبىرى قالماي جازىلدى. وسىنداي ءىس-ارەكەتتەر وزگەرمەيتىن قالىپقا اينالدى. «مۇقاعالي» جۋرنالى ءار شاڭىراقتىڭ ەسىگىن قاعىپ، «مەن كەلدىم» دەپ تۇرعانى قانداي جاراسىمدى.

14 جىلدىق كەزەڭ از ۋاقىت ەمەس. باسىلىمنىڭ مازمۇنى مەن ساپاسى ويىمىزدان شىقتى. قاراسازدىقتار اقىن تۋرالى دەرەكتەرگە مولىنان قانىقتى. اعا ۇرپاقتىڭ ونەگەلى ومىرلەرىن وزدەرىنە ۇلگى تۇتتى.

«مۇقاعالي وقۋلارى» تۇراقتى جولعا قويىلدى. ونىڭ قاينار كوزى – قاسيەتتى قاراساز! ناۋرىز ايى تۋعاندا بايتاق ەلدىڭ تۇكپىر-تۇكپىرىنەن ولەڭ سۇيەتىن جاس تالانتتار وسىندا جينالادى. ولار جىردىڭ الامان بايگەسىندە بابىن دا سىنايدى، باعىن دا سىنايدى. جىر جارىسىنا دايىندالۋدىڭ باستى وقۋلىعى «مۇقاعالي» جۋرنالى ەكەنىن قاراسازدىقتار جاقسى بىلەدى. ەگەر بالالارىمىز باس بايگەلەردى ەنشىلەپ جاتسا، ونىڭ نەگىزگى سىرى وسىندا.

اقىن مۇراسىنىڭ تەرەڭدەرىنە ۇڭىلەتىن، استارىن اڭعاراتىن مۇقاعاليتانۋ ىزدەنىستەرىنە دەن قويۋشىلاردىڭ سانى جىل وتكەن سايىن كوبەيە تۇسۋدە. كۇنى ەرتەڭ كەمەل زەرتتەۋشىلەر دە قاراسازدان شىعۋى مۇمكىن دەيتىن ءۇمىتىمىز بار. ياعني، «مۇقاعالي» جۋرنالىمەن دوستاسقاندار، «مۇقاعالي» جۋرنالىمەن سىرلاسقاندار ۇتپاسا – ۇتىلمايدى. مۇنداي ءتالىم بارلىق اعايىنعا جۇعىستى بولسىن دەپ تىلەيمىز.

وي-پىكىرلەرىمىزدى قورىتا وتىرىپ، مۇقاعالي اعامىزدىڭ الداعى 90 جىلدىعىنا ءبىر جىل بۇرىن شاشۋ دايىنداعىمىز كەلدى. سونىڭ ىرىمى رەتىندە «90 جىلدىققا – 90 جۋرنال» اتتى ۇيعارىمعا توقتادىق. بۇل – جۋرنالعا جازىلۋ دەڭگەيى توقساننان تومەندەمەسىن، ال تارالىمدى كوبەيتەم دەگەندەرگە اق جول تىلەيمىز دەگەن اتالى ءسوزىمىز.

ءبىزدىڭ ۇيعارىم – قاراسازدىقتاردىڭ جۇرەكجاردى شەشىمى. ءوز ەركىمىزبەن اقىل قوسقان حالىقتىق بايلام. ونى 2021 جىلى دا جالعاستىراتىن بولامىز. بۇل – مۇقاعالي اۋىلىنىڭ «مۇقاعالي» جۋرنالىن قولداعانىنىڭ باستى بەلگىسى. ەگەر، نيەت-پەيىلىمىزدى دۇرىس ءتۇسىنىپ، مۇقاعاليشىل وقىرماندار بىزگە قوسىلىپ جاتسا، وعان شىن جۇرەكتەن قۋانامىز!

1.قاراساز اۋىلدىق وكرۋگىنىڭ اكىمى د.مۋحامەتجانوۆ
2.قاراساز اۋىلىنداعى البان اسان اتىنداعى ورتا مەكتەپتىڭ ديرەكتورى ا.ك.نوكەەۆ
3.م.ماقاتاەۆتىڭ ادەبي-مەموريالدى مۋزەيىنىڭ ديرەكتورى        ە.احمەتوۆ
4.قاراسازداعى ونەر مەكتەپ ديرەكتورى ب.راەۆا
5.قاراسازداعى اقساقالدار القاسىنىڭ توراعاسى ك.قازىباەۆ
6.مۇقاعالي اقىننىڭ جاقىن تۋىسى سادىباەۆ س.
7.قاراساز اۋىلىنداعى ەمحانا مەڭگەرۋشىسى ك.سۇلەيمەنوۆا
8.قاراساز وكرۋگىنە قاراستى ت.مۇساقۇلوۆ مەكتەبى ديرەكتورى ج.يساەۆ

Abai.kz