كەشە پارلامەنت ماجىلىسىندە بولعان كەزەكتى «ۇكىمەت ساعاتىندا» ەلباسى جاريالاعان جاستار جىلىنىڭ العاشقى قورىتىندىلارىن قارادىق.
شىنىن ايتساق، تۇڭعىش پرەزيدەنتىمىزدىڭ جاستار جىلىنىڭ سالتاناتتى اشىلۋ راسىمىندە ۇكىمەتكە بەرگەن تاپسىرمالارىنىڭ ورىندالۋ بارىسى كوڭىل كونشىتەرلىكتەي بولماي شىقتى. وسى جونىندە دەپۋتاتتار وتكىر سىن مەن ورىندى ۇسىنىستار ايتتى.

ماسەلەن، بيىلعى جىلى جاس ماماندارعا نۇر-سۇلتان، الماتى، شىمكەنت قالالارىندا 3 مىڭ پاتەر بەرۋ كوزدەلگەن. بۇل ماقساتقا ەل قازىناسىنان 21,6 ميلليارد تەڭگە ءبولىندى. قازىرگى ۋاقىتتا اكىمدىكتەر 7 تۇرعىن ءۇيدىڭ، ياعني نەبارى 330 پاتەردىڭ قۇرىلىسىن جۇرگىزۋدە. قالعان 2 مىڭ 670 پاتەردى قايتالاما نارىقتان ساتىپ الۋ جوسپارلانعان. قارجى دا، سۇرانىس تا بار. الايدا، بۇگىنگە دەيىن جۇمىس ىستەيتىن جاستاردىڭ ەشقايسىسى باسپاناعا قول جەتكىزگەن جوق. ۇكىمەت وكىلدەرى اركىمنىڭ بوساعاسىن ساعالاپ جۇرگەن ءىنى-قارىنداستارىمىزدىڭ قولدارى جالعا بەرىلەتىن باسپاناعا قاراشا-جەلتوقسان ايلارىندا جەتەدى دەگەن ۋادە بەردى.

ۇكىمەت «ديپلوممەن – اۋىلعا!» باعدارلاماسى بويىنشا اۋىلدىق ەلدى مەكەندەرگە جۇمىس ىستەۋگە باراتىن جاس ماماندارعا بىرجولعى جاردەماقى مولشەرىن 70 ايلىق ەسەپتىك كورسەتكىشتەن 100 ايلىق ەسەپتىك كورسەتكىشكە دەيىن ارتتىرۋ تۋرالى تاپسىرمانى دا تولىق ورىنداماعان. قاجەتتى قاۋلىنى مامىر ايىنىڭ سوڭىندا ارەڭ قابىلداپ، ماسەلەنى جەرگىلىكتى بيۋدجەتتەر ەسەبىنەن شەشۋدى وبلىستىق اكىمدىكتەرگە تاپسىرعان. الايدا، وبلىستىق اكىمدىكتەردىڭ كوپشىلىگى بۇل قاۋلىنى ورىنداۋعا قاجەتتى قارجىنى ءالى تاۋىپ بەرگەن جوق.

ەلباسىنىڭ «ديپلوممەن – اۋىلعا!» باعدارلاماسىنا ەنگىزىلگەن ماماندىقتار تىزبەسىن كەڭەيتۋ جونىندەگى تاپسىرماسى دا سوزباققا سالىنىپ وتىر. ال اۋداندىق اكىمدىكتەر مەن اۋىلدىق وكرۋگتەرگە قازىر 600-دەي باس جانە جەتەكشى ماماندار جەتىسپەيدى.
ۇستىمىزدەگى جىلى 15 مىڭ جاس كاسىپكەردىڭ مەملەكەتتىك گرانت الىپ، ءوز ءىسىن اشۋى جوسپارلانعان ەدى. قازىرگە دەيىن ولاردىڭ 8 مىڭدايى عانا وسىنداي قولداۋ كورگەن.

ۇزىن ءسوزدىڭ قىسقاسى، ۇكىمەتتىڭ جاستار جىلىندا العا قويىلعان مىندەتتەردى جۇزەگە اسىرۋداعى ءىس-قيمىلى سىلبىر. وسىعان وراي، ءبىز ۇكىمەتتىڭ جانىنان مەملەكەتتىك جاستار ساياساتىن ىسكە اسىرۋ جونىندەگى ۆەدومستۆوارالىق كوميسسيا قۇرۋ قاجەت دەپ تاۋىپ، ءتيىستى ۇسىنىس جاسادىق. ويتكەنى، جاستار جىلىن وتكىزۋگە جاۋاپتى ۋاكىلەتتى ورگان – اقپارات جانە قوعامدىق دامۋ مينيسترلىگىنىڭ وزگە مەملەكەتتىك ورگانداردىڭ باسشىلارىن «كىلەمگە شاقىرىپ، شاڭدارىن قاعاتىنداي» قۇدىرەتى جوقتىعى انىق.

كارىباي مۇسىرمان

Abai.kz