سوتتىڭ مالىمەتىنشە، الىبەك مولدين قازاقستانداعى "قىتاي جوبالارىنا قارسى ميتينگىگە" شىققانى ءۇشىن - بەس تاۋلىك، "پوليتسياعا باعىنباعانى ءۇشىن" ون تاۋلىك اكىمشىلىك جازاعا تارتىلىپ، بارلىعى 15 تاۋلىككە قامالعان. سوت قۇجاتىندا ءمولديننىڭ 3 قىركۇيەكتە اقتوبەدە جەرگىلىكتى اكىمدىك عيماراتىنىڭ الدىندا "قىتاي ەكسپانسياسىنا جول جوق" دەگەن جازۋى بار پلاكات ۇستاپ، 'قازاقتار، ويانىڭدار" دەپ ايقايلاعانى، 7 قاراشادا پوليتسيانىڭ "زاڭدى تالابىنا باعىنباعانى" جازىلعان.

ءمولديننىڭ قامالعانىن ونىڭ ايەلى جادىرا نۇعىمانوۆا دا راستادى. نۇعىمانوۆانىڭ سوزىنشە، پوليتسيا الىبەك ءمولديندى 7 قاراشا كۇنى تاڭعى ساعات 7-دە وقۋشى قىزىن مەكتەپكە شىعارىپ سالىپ تۇرعان جەرىنەن ۇستاپ اكەتكەن.

- كۇيەۋىمە ءتورت ادام جابىلىپ، كولىكتەرىنە كۇشپەن وتىرعىزعان. باسىندا ونى بىلگەن جوقپىز. كىدىرگەن سوڭ الاڭداي باستادىم. مەكتەپكە بارىپ، اۋرۋحانا مەن پوليتسياعا حابارلاستىم. پوليتسياداعىلار "كۇيەۋىڭىز زاۋىت پوليتسيا بولىمىندە، سالدەن سوڭ اكىمشىلىك سوتقا اپارادى" دەدى. سوتتا كۇنى بويى اس-سۋسىز ءجۇرىپ، ۇيىمە كەشكى 8-دە كەلىپ وتىرمىن. پوليتسياعا باعىنبادى دەگەنى جالا. ءتورت ادام الدى-ارتىنا قاراتپاي الىپ كەتسە، قاي كەزدە قارسىلىق كورسەتەدى؟ - دەيدى جادىرا نۇعىمانوۆا.

وسىدان ءبىر اپتا بۇرىن الىبەك ءمولديننىڭ ۇستىنەن قر قىلمىستىق كودەكستىڭ 131-بابىنىڭ 2-بولىگى ("قورلاۋ" بابى) بويىنشا قىلمىستىق ءىس قوزعالعانى بەلگىلى بولعان. 7 قاراشادا تۇستەن كەيىن اقتوبە قالالىق سوتى الىبەك ءمولديننىڭ ۇستىنەن قوزعالعان قىلمىستىق ءىستى قاراۋعا كىرىسۋى ءتيىس ەدى. بىراق سوت وتىرىسى باستالعان كەزدە ادۆوكات سەيسەنباي ءدىلمانوۆ ءمولديننىڭ اكىمشىلىك سوتتا ەكەنىن، ءوزىنىڭ ناۋقاستانىپ تۇرعانىن ايتىپ، ءىستى كەيىنگە قالدىرۋدى ءوتىندى. تاراپتار كەلىسىمىمەن سوت الىبەك مولدين ءىسىن قاراۋدى كەيىنگە قالدىردى.

قىلمىستىق ءىستىڭ قوزعالۋىنا ءمولديننىڭ ۇستىنەن كوپ بالالى سەگىز ايەلدىڭ شاعىم ءتۇسىرۋى نەگىز بولعان. جابىرلەنۋشىلەردىڭ ءبىرى جانار قۇلمامبەتوۆا "مولدين الەۋمەتتىك جەلىدەگى پاراقشاسىندا كوپ بالالى ايەلدەردى تىلدەدى" دەيدى. 7 قاراشادا سوت زالىندا بەلسەندى ءمولديننىڭ جاقتاستارى دا بولدى. ولار مۇنى "تاپسىرىسپەن ۇيىمداستىرىلعان ءىس" دەپ سانايدى.

Abai.kz