جيىنعا قاتىسۋ ءۇشىن قازاقستاننىڭ بۇرىنعى پرەزيدەنتى نۇرسۇلتان نازارباەۆ 28 قاراشادا كەشكىسىن تاشكەنتكە باردى.
تاشكەنت حالىقارالىق اۋەجايىندا نازارباەۆتى وزبەكستان پرەمەر-ءمينيسترى ابدۋللا اريپوۆ كۇتىپ الدى.
تاجىكستان پرەزيدەنتى ەمومالي راحمون دا تاشكەنتكە باردى.
بىرەر كۇن بۇرىن عانا تۇركىمەنستان باسشىسى گۋربانگۋلى بەردىمۇحامەدوۆ جۇمىس ساپارىمەن وزبەكستانعا بارىپ، ەل پرەزيدەنتى شاۆكات ميرزياەۆپەن كەزدەسكەن بولاتىن. ازىرگە ونىڭ ورتالىق ازيا باسشىلارىنىڭ جيىنىنا قاتىساتىنى، نە قاتىسپايتىنى بەلگىسىز.
قىرعىز پرەزيدەنتى سوورونباي جەەنبەكوۆ تە وزبەكستانعا ۇشىپ باردى. ونىڭ وزبەك پرەزيدەنتىمەن ەكىجاقتى كەزدەسۋى جوسپارلانعان.
2018 جىلدىڭ ناۋرىز ايىندا قازاق استاناسىندا ورتالىق ازيا ەلدەرى ليدەرلەرىنىڭ العاشقى كونسۋلتاتيۆتى كەزدەسۋى وتكەن.
ەكىنشى كەزدەسۋ بيىل ناۋرىز ايىندا تاشكەنتتە جوسپارلانعان ەدى. بىراق وزبەكستان تارابى كەزدەسۋدى كۇزگە شەگەردى.
بۇل جيىندى جۇيەلى تۇردە وتكىزۋگە باستاما ەتىپ كوتەرگەن وزبەك پرەزيدەنتى بولعان.
Abai.kz
