«اق جول» پارتياسىنىڭ دەپۋتاتتىق ساۋالىنا پرەمەر-مينيستردەن وسىنداي جاۋاپ كەلدى.

ەستەرىڭىزگە سالار بولساق، «اق جول» فراكتسياسى اعىمداعى جىلدىڭ 30 قاڭتارىندا،11 ءساۋىرى مەن 30 قازانىندا دەپۋتاتتىق ساۋالدارىندا «كۇندەلىك» اۆتوماتتاندىرىلعان اقپاراتتىق جۇيەسىنىڭ جۇمىس ىستەۋىندەگى ماسەلەلەرگە بىرنەشە رەت نازار اۋدارعان بولاتىن. دەپۋتاتتار ەلىمىزدەگى بارلىق مەكتەپتەر تولىعىمەن ينتەرنەتپەن قامتاماسىز ەتىلگەنگە دەيىن «كۇندەلىك» جۇيەسىن مىندەتتى پايدالانۋدى توقتاتا تۇرۋدى ۇسىنىپ، سونداي-اق، جۇيەنىڭ جۇمىسىن جەتىلدىرۋىن، ۇنەمى ۇزدىكسىز جۇمىس ىستەۋىن جانە اۆتوماتتى قورعاۋدى قامتاماسىز ەتۋدى سۇراعان بولاتىن.

سونىمەن بىرگە، «اق جول» پارتياسىنىڭ دەپۋتاتتارى «كۇندەلىك» جۇيەسىندەگى بىرقاتار قىزمەتتەرگە اقى تولەۋ ماسەلەسىن دە كوتەردى. ويتكەنى، اتالمىش اقپاراتتىق جۇيەدە ساراپتاۋ، سالىستىرۋ، رەيتينگتەر، ۇسىنىستار، پىكىرلەر مەن ءموبيلدى قوسىمشا سىندى قىزمەتتەر اقىلى بولعان.

ازات پەرۋاشەۆ 28 قاراشادا ءماجىلىستىڭ جالپى وتىرىسىندا مۇعالىمنىڭ مارتەبەسى تۋرالى زاڭ جوباسىن تالقىلاۋ كەزىندە «كۇندەلىك» تۋرالى اقپاراتقا اقىلى قول جەتكىزۋ ازاماتتاردىڭ كونستيتۋتسيالىق قۇقىقتارىن بۇزۋ بولىپ تابىلادى» دەپ مالىمدەدى.

«مەملەكەتتىك مەكەمەلەردە اقىسىز ورتا ءبىلىم الۋ كونستيتۋتسيامەن كەپىلدەندىرىلگەن. ءسىز اتا-انالارعا وقۋشىنىڭ ۇلگەرىمى تۋرالى اقپارات الۋعا مۇمكىندىك بەرەتىن اقىلى قىزمەت تۇرلەرىن ۇسىندىڭىز. وقۋ پروتسەسى اقىسىز بولۋى ءتيىس، بۇل - كونستيتۋتسيالىق كەپىلدىك. تۇسىنىكتەمەلەرگە، ۇسىنىستارعا، بالانىڭ ۇلگەرىم رەيتينگىندەگى كورسەتكىشتەرىنە قول جەتكىزۋ ءبىلىم بەرۋ پروتسەسىنىڭ قۇرامداس بولىگى بولىپ تابىلادى.

ەگەر اتا-انا «كۇندەلىكتە» مۇعالىمنىڭ تۇسىنىكتەمەلەرىن كورمەسە، جۇيەگە تەلەفوننان تەگىن كىرە الماسا، بالانىڭ ۇلگەرىمىن قالاي باقىلاي الادى؟ بۇل – اتا-انالاردىڭ بىزگە جەتكىزگەن شاعىمدارى»، - دەدى ازات پەرۋاشەۆ.

«مينيسترلىككە اقىسىز كورسەتىلەتىن قىزمەتتەردىڭ تىزبەسىن كەڭەيتۋ مۇمكىندىگى تۋرالى كەلىسىمدى ودان ءارى قايتا قاراۋ تاپسىرىلدى. جالپى، ءسىز كوتەرگەن ماسەلەلەر ۇكىمەتتىڭ تۇراقتى باقىلاۋىندا», - دەلىنگەن بەردىبەك ساپارباەۆ قول قويعان رەسمي حاتتا. سونىمەن قاتار، جاۋاپتا ينتەرنەتكە قوسىلماعان مەكتەپتەر «كۇندەلىك» اۆتوماتتاندىرىلعان اقپاراتتىق جۇيەسىنەن اجىراتىلاتىنى ايتىلعان.

Abai.kz