(پوەما)

تراتىس

ارى ۇشىن اتتارىن قامشىلاعان،

تۇلپارىنان تۇنىق تەر تامشىلاعان.

ۇران سالىپ بابالار ايقاسىپتى،

ۇرپاق ءۇشىن ۇرىستا جان شىداعان.

اقتابان بوپ كەتسەدە توز-توز بولىپ،

جىگەرىن ەش دۇشپانى جانشىماعان.

كونە كوزى سەكلىدى باياعىنىڭ،

ءار كودەسى بي بيلەپ، ءان سۇراعان.

ءار توبەسى سىر بۇگىپ جاتىر جۇمباق،

اق جۇمىرتقا سەكىلدى ارشىماعان.

الاڭ

بۇرىنعىداي بىرلىگى بولالمادى،

بىرگە كوشىپ، ءبىر جەرگە قونا المادى.

قىتاي مەنەن ورىستىڭ قىسپاعىندا،

بولىنبەكشى ەكىگە جول الداعى.

بىرلىگىنەن ءۇش ءجۇزدىڭ جاۋ ىعاتىن،

ابىلايدىڭ داۋرەنى ورالمادى.

جەمساۋىنا باسقانىڭ جەم تۇسىرمەك،

باس-باسىنا بي بولىپ جوعالعانى.

ۇندەيتۇعىن ەرىمنىڭ ءۇنى ءوشىپ،

ۇركىپ كەتتى قازاقتىڭ قونار باعى.

كەنەسارى باسىنىڭ كەسىلگەنى،

كەۋدەدەگى رۋحتىڭ تونالعانى.

قامىت

اۋعان جۇگى امال نە تۇزەلمەدى،

شىن بۇلقىنسا شىنجىردى ۇزەرمەدى؟

ات ۇستىندە حانىنا سالەم بەرگەن،

قايران قازاق قۇل بولىپ تىزەرلەدى.

جۇگەن قالدى تارتقىزىپ جىلقىلارىن،

يتشەككەنگە ايداتىپ بۇلقىنارىن.

يت قورلىققا كەزىگىپ تەنتىرەدى،

كوتەرە الماي جوقشىلىق بۇلتىن اۋىر.

وتىز جەتى اتىلعان قايماعىمدى،

قايعىرامىن بىلمەيمىن كىم تۋارىن.

قيىن كۇندە بابالار قيىر كەتىپ،

قيالداعان ورالار كۇن تۋارىن.

قاساپشىدان قوي سىندى امان قالعان،

قازاقتىڭ ءبىر بىلمەدى جۇلقىنارىن.

بابالارىم قانشاما ارماندادى،

ەگەمەندى ەل بولىپ قۇلپىرارىن.

سىلكىنىس

باسىنان قازاقتىڭ نە كۇن وتپەدى،

بودان كۇندەر - قاپاس قوي تۇنەكتەگى.

قوزى باققان بالاداي قۋ دالادا،

جىلاسادا، كۇلسەدە كۇن وتپەدى.

قازاعى دا كولحوزدىڭ مال باعاتىن،

ازاتتىقتى اڭسادى جۇرەكتەرى.

سەكسەن التى سىلكىندى جەتپىس جىلعى،

ىزا كەگى قايناعان جۇرەكتەگى.

يمپەريا يتىنە تالانعاندى،

ءبىر-بىرىنە ايقاسىپ بىلەكتەرى.

ءبىر ارمانعا ۇمتىلدى ازاتتىق دەپ،

ءبىر ارناعا توعىسىپ تىلەكتەرى.

جەلتوقساننىڭ ەرىتتى قار مەن مۇزىن،

جەلتوقسانشىل جاستاردىڭ جۇرەكتەرى.

ماڭگىلىككە اڭىز بوپ قالدى ولار،

ىزگىلىكتىڭ جولىندا گۇل ەككەنى.

شۋاق

بال تاتىدى ىشسە دە قارا سۋى،

تالقاندالىپ جول بەرمەس تار اسۋى.

قوي ۇستىنە بوز تورعاي جۇمىرتقالاپ،

ەل جۇرتىنىڭ وڭالدى جاراسىمى.

اق سامايلى اجەلەر شاشۋ شاشىپ،

اقساقالدار قۋاندى بالا سىندى.

جيرما جىلدا جەتتىك عوي تالاي ەلگە،

جۇيرىكتەيىن باپ كەلگەن تاڭ اسۋى.

تاۋبا دەيىك اعايىن كۇنىمىزگە،

تاۋەلسىزدىك ەلىمنىڭ بار اسىلى.

ءتاڭىر قولداپ تالانتتى جاستارىمدى،

تانىتايىق الەمگە الاشىمدى.

تاۋەلسىزدىك جاساي بەر  ماڭگىلىككە،

كۇللى قازاق كوزىنىڭ قاراشىعى!

قاستەر اكيزا

Abai.kz