بالالارىمىز بۇكىل ۆيدەونى ورىسشا كورەدى. قازاقتىلدى وتباسىندا ءوسىپ جاتسا دا، ءتىلى ورىسشا شىعىپ جاتىر. نەگە؟

YouTube-تە قازاقشا ءارى قىزىقتى كونتەنت جوق. بالالاردى قىزىقتىراتىن ۆيدەو تەك باسقا تىلدە.

فەيسبۋكتەن وقىپ جۇرگەنىمدەي، بۇل وتە كوپ وتباسىنىڭ پروبلەماسىنا اينالدى. كەيبىر اتا-انا ونشا ءمان بەرمەي جۇرگەن شىعار، بىراق بۇل ۇلكەن پروبلەما.

ايتامىز دا، قويامىز. ەندى ارەكەت ەتۋ كەرەك. ۇكىمەت ارالاسپاسا، قولداۋ بولماسا، بۇل ۇسىنىس تا دالادا قالۋى مۇمكىن. تۇتاس ءورىستىلدى ۇرپاق ءوسىپ كەلەدى. سوندىقتان، وعان قارسى كۇرەس رەتىندە 10 باستاما كوتەرىپ وتىرمىن.

1. بۇلدىرشىندەردى قىزىقتىراتىن مۋزىكالىق، بالالارعا ارنالعان قازاقشا انمەن كوركەمدەلگەن تانىمدىق ۆيدەولار كەرەك.

2. بالالاردى تاربيەلەپ جاتقان (مويىنداۋ كەرەك) وسى ۆيدەو جازبالاردى دايىندايتىن ارنايى ءبىر ستۋديا اشىلۋى ءتيىس.

3. قازاقتىلدى انيماتورلار كوبەيۋى كەرەك. ويىن ارقىلى ءتىل ۇيرەنۋ وڭايىراق.

4. قۋىرشاق تەاترىنىڭ ارتيستەرى مۋزىكالىق، قىزىقتى قويىلىمدارىن YouTube ارناسىنا شىعارسا، بالالاردى باۋليتىن ۆيدەو كونتەنت جاساسا دۇرىس بولادى.

5. بالالارعا ارنالعان قىزىقتى، جەڭىل ستسەناريلەر جازىلسا. بايقاۋ ارقىلى ۇزدىك جازبالار تاڭدالىپ، قىسقا ۆيدەو-جازبالار بولسا.

6. ويىنشىق ساتاتىن دۇكەندەر مەن ويىن-ساۋىق الاڭدارى YouTube-كە شىعاتىن اكتەرلەر نەمەسە اتا-انالار ارقىلى جارناما جاساپ، ونىمدەرىن ساتا الاتىن ەدى. بالالار نەگىزىنەن وسىنداي ۆيدەو جازبالاردى قارايدى.

7. بۇلدىرشىندەر عانا ەمەس، بۇكىل بالالار ۆيدەو پودكاستتاردى ورىسشا كورەدى. بۇل دەگەن بۇكىل ۇرپاقتى ءوز تىلىنەن ايىرىپ جاتىر. قازاقشا ويلاي المايتىن بۋىن ءوسىپ كەلەدى. قازاقتىلدى ۆاينەر-يۋتيۋبەرلەردى دايىنداۋ كەرەك.

8. وسى ۇسىنىستاردى بيلىك باسىنا جەتكىزىپ، ارنايى جۇمىس توبى قۇرىلىپ، بالا تاربيەسىنە قازىر ءمان بەرۋىمىز كەرەك. "بالاعا پلانشەت بەرمە، كومپيۋتەر قاراتپا", دەپ شەكتەيتىن زامان ەمەس، قاراسىن. تەك شەكتەۋلى ۋاقىت جانە ءوز تىلىندە قاراۋى ءتيىس. ءتىلى قازاقشا شىعىپ، ءوز تىلىندە ويلاۋى قاجەت.

9. ەلدەگى كينوتەاترلار قازاقشا مۋلتفيلمدەردىڭ كورسەتىلىمىن كوبەيتۋى كەرەك. سوڭعى انيماتسيا - "مۇزدى ولكەنىڭ" كورسەتىلىمى كۇنىنە كوپ دەگەندە 2-رەت قانا، ورىسشاسى ءار ساعات سايىن ءوتىپ جاتىر. كەيبىر كينوتەاترلار مۇلدە قازاقشا كورسەتكەن جوق. بارلىق مۋلتفيلمدەر قازاقشا دىبىستالۋى ءتيىس.

10. بۇل ماسەلە تەك انا ءتىلىنىڭ بولاشاعىن ويلايتىندار مەن بالانىڭ كەلەشەگىنە الاڭدايتىندار ءۇشىن عانا ەمەس، كۇللى قازاقستاندىقتار باسىمدىق بەرۋى كەرەك جاعداي.

كىم قولدايدى، ۇسىنىس ايتىڭىزدار، بولىسىڭىزدەر. قازاقتار ويلانايىق!

ۇكىلاي بەستايدىڭ الەۋمەتتىك جەلىدەگى پاراقشاسىنان

Abai.kz