- سىزدەردى كوشىرۋ تۋرالى شەشىم قابىلدادىق. وعان اقشا ءبولىندى. اقشا اۋداندىق اكىمنىڭ شوتىنا تۇسەدى، - دەدى باقىتجان ساعىنتاەۆ.

ءبىر اپتادان بەرى وزدەرى تۇرىپ جاتقان توعىز قاباتتى عيماراتتىڭ ءبىر جاققا قاراي قيسايعانىنا شاعىمدانىپ كەلگەن الماتىنىڭ "زەردەلى" (بۇرىنعى - العاباس-6) شاعىن اۋدانىنداعى №179 ءۇي تۇرعىندارى سەنبى كۇنگى جينالىستا بيلىكتەن "اپاتتى ءۇيدىڭ" جارامدىلىعىن انىقتاپ، باسپانا ماسەلەسىن شەشىپ بەرۋدى تالاپ ەتكەن ەدى.

- العاشقى جۇمىس كۇنى (18 جەلتوقسان - رەد.) اقشا تۇسەدى. تۇراتىن پاتەردى نە وزدەرىڭىز، نە ءبىز تاۋىپ بەرەمىز. ءبىر اي بولا ما، ەكى اي بولا ما - انىقتايمىز. زەرتتەۋ ۇيدە تۇرۋعا بولمايدى دەسە، ءۇيدى كۇرەيمىز. ءۇي كۇرەلسە، اكىمدىك ەسەبىنەن تۇرعىندارعا جاڭا ءۇي بەرىلەدى. جاپسارلاس جاتقان بارلىق ءۇي زەرتتەلەدى، - دەدى باقىتجان ساعىنتاەۆ.

جينالىس كەزىندە نارازى جۇرت جانتايعان ءۇيدى سالعان "اگس پلاست" كومپانياسىنىڭ وكىلىنەن جاۋاپ الۋدى تالاپ ەتتى. بىراق الماتى اكىمىنىڭ ورىنباسارى مۇحيت ازىرباەۆ "بىزدە ءالى زەرتتەۋ قورىتىندىسى جوق. "كىناسىزدىك پرەزۋمپتسياسى" دەگەن بار. ءۇيدىڭ احۋالىن انىقتاپ الايىق. كىنالىلەردى سوسىن تابامىز" دەدى.

الماتى قالاسى پروكۋرورىنىڭ ءبىرىنشى ورىنباسارى بەرىك اداموۆ تا "مەملەكەتتىك جانە تاۋەلسىز قورىتىندىنى زەرتتەيمىز، قورىتىندىسى شىققاننان كەيىن ءاربىر كەزەڭ بويىنشا (جوبالاۋ كەزەڭى، عيماراتتى سالۋ كەزەڭى ت.س.س - ب.ا) اتقارىلعان جۇمىستارعا باعا بەرەمىز" دەدى.

قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىنىڭ اتقارۋشى ديرەكتورىنىڭ ايتۋىنشا، ءۇي 7,5 سانتيمەترگە قيسايعان. ال تۇرۋعا جارامسىز دەپ تانۋ ءۇشىن 8 سانتيمەتر بولۋى كەرەك.

"زەردەلىدەگى" №179 ءۇيدىڭ "قيسايعانى" تۋرالى اقپارات بىرنەشە كۇن بۇرىن تاراعان. جەرگىلىكتى باق-تىڭ جازۋىنشا، بۇعان دەيىن اكىمدىكتىڭ ارنايى باسقارما ماماندارى ءۇيدى تەكسەرىپ، ء"ۇي تۇرۋعا جارامدى" دەپ مالىمدەگەن. ال عيماراتتىڭ جوعارى جاعىنان تومەنگە ءجىپ تاستاپ، ء"وز بەتىمەن تەكسەرىس جاساعان" تۇرعىندار ءۇي "12-15 سانتيمەترگە قيسايدى" دەپ ايتقان ەدى. 14 جەلتوقسانعا قاراعان ءتۇنى تۇرعىنداردىڭ قورقىپ، عيمارات ىشىنە كىرە الماعانى، كەيبىر ادامداردىڭ كوشىپ جاتقانى بەلگىلى بولعان.

2013 جىلى "قولجەتىمدى باسپانا" مەملەكەتتىك باعدارلاماسى بويىنشا پايدالانۋعا بەرىلگەن بۇل تۇرعىن ۇيدە 72 پاتەر بار.

الماتىدا "ۇيلەردىڭ قيسايۋ ماسەلەسى" وسىدان بىرنەشە جىل بۇرىن دا بايقالعان. 2016 جىلى العاباستاعى توعىزقاباتتى تۇرعىن ءۇيدىڭ 32 سانتيمەترگە قيسايعانى انىقتالىپ، جەرگىلىكتى بيلىك ولاردى ءسۇرۋ كەرەك دەپ مالىمدەگەن.

Abai.kz