"عىلىم - اللانىڭ ءبىر سيپاتى، ول - حاقيقات، وعان عاشىقتىق ءوزى دە حاقلىق ءھام ادامدىق ءدۇر" (اباي). بىراق نەگە عىلىم-بىلىمگە ۇمتىلعان ادامزات جەر بەتىندە اللا تاعالانىڭ سالەمىن - بەيبىتشىلىگىن، اماندىعىن، تۇتاستىعىن، قاۋىپسىزدىگىن ورناتا الماي جاتىر. ۇلكەن سۇراق. ۇلكەن پروبلەما. ادامزاتتىڭ ميى جەتپەي وتىرعان بۇل پروبلەمانى اباي شەشەدى: "ەندى ءبىزدىڭ باستاعى تاعريف(تانىم-و.ج.) بويىنشا قۇداي تاعالا عىلىمدى، راقىمدى، عادالاتتى، قۇدىرەتتى ەدى. سەن دە بۇل عىلىم، راحىم، عادالات ءۇش سيپاتپەنەن سيپاتتانباق: ءيجتيھاتىڭ (ىجداعات-عىلىمعا تالپىنۋ-و.ج.) شارت ەتتىڭ، مۇسىلمان بولدىڭ ءھام تولىق ينسانياتىڭ(ادامشىلىعىڭ-و.ج.) بار بولادى". ادامزاتتا قازىر عىلىم بار، راحىم مەن ادىلەت جوق. سول سەبەپتى عىلىم قيراتۋشى كۇشكە، وزبىرلىق پەن الىمجەتتىك كورسەتۋگە قولدانىلىپ وتىر.