نەگە ەكەنىن ءبىر قۇدايدىڭ ءوزى ءبىلسىن، ءبىزدىڭ ەلدە وزگە مەرەكەلەردەن گورى حريستيانداردىڭ جاڭا جىلىنا دەگەن ىقىلاس تىم ەرەكشە. كوك شىرشالى سول داتانى قارسى الۋ مەرزىمى جاقىنداعان سايىن ءبىر شاشىلىپ قالامىز. ونى اسەمدەپ بەزەندىرۋگە اسىققانىمىز سونشالىق، ۇلتتىق مەرەكەمىز - تاۋەلسىزدىك مەيرامىمىزدى مۇلدەم ۇمىتىپ كەتەمىز. ونىڭ ۇستىنە بۇل مەرەكەگە دەگەن مىرزالىعىمىز دا شەكسىز. اسىرەسە، «كورپوراتيۆتىك كەش» دەگەن ءبىر كەرەمەت شىققالى بۇل «اۋرۋ» تىم اسقىنىپ كەتتى. ال وعان مىندەتتى تۇردە شەتەلدەن ءانشى الدىرىپ، ايدى اسپانعا ءبىر شىعارماساق، ارمانىمىز ورىندالمايتىن سەكىلدى. 

سول «سىرقات» بيىل دا اسقىندى. جاقىندا ەلدەگى اقپارات قۇرالدارى جازعانداي، بىزدەگى بايشىكەشتەر جاڭا جىل كەشىنە ۋكراينانىڭ شىن مانىنىندەگى كۇمىس كومەي ءاىنشىسى سوفيا روتارۋدى شاقىرىپتى. ول ءۇشىن اناۋ-مىناۋ ەمەس، 100 مىڭ دوللار شاماسىنداعى قولاقپانداي 43 ميلليون تەڭگەنى قينالماي ۇسىنا سالىپتى. ارينە، ەڭبەكسىز كەلگەن، جانىن قيناماي جيناعان دۇنيەنىڭ قانشالىقتى قادىرى بولسىن، ءبىزدىڭ قالتالىلار دا ساراڭدىق تانىتپاپتى. 

الايدا، ميلليونەرلەر مەن ميللياردەرلەردىڭ تاۋى شاعىلىپ قالعان سىڭايلى. «ءبارىن اقشاعا ساتىپ الۋعا بولادى» دەپ كەلتە ويلايتىن ءبىزدىڭ «aتىمتاي جومارتتاردىڭ» ماڭدايى تاسقا ءتيىپ، تاۋى شاعىلىپتى. سوفيا حانىمنىڭ جاۋابى قىسقا بولعان. ونىڭ كونتسەرت جونىنىندەگى ديرەكتورى سەرگەي لاۆروۆتىڭ رەسەي باسپاسوزىنە بەرگەن سۇحباتىندا 72 جاستاعى ءانشىنىڭ كەز-كەلگەن شاقىرعان جەرگە بارمايتىندىعىن، الدىمەن ءوزىنىڭ دەنساۋلىعىن كۇتەتەتىندىگىن اشىق ايتقان. ول ءتىپتى ءبىر كەزدە نەمىستەر 100 مىڭ ەۆرو ۇسىنعاندا دا باس تارتقان كورىنەدى. 

مىنە، وسىلايشا ءبىزدىڭ بايشىكەشتەرىمىزدىڭ روتارۋدىڭ اندەرىنە ءبىر سۋسىنداپ جانە ونى قوماقتى سىياقىمەن جارىلقاپ، وڭاشا ءبىر راحاتقا باتامىز دەگەن قۋلىقتارى ىسكە اسپاي قالعان كورىنەدى.

ولاردىڭ مۇنداي «مىرزالىعىن» سوفيانىڭ الگى پروديۋسەرى ايداي الەمگە جاريا قىلىپ، بەتتەرىن شيەدەي ەتىپتى. ايتسە دە، ءبىزدىڭ جۋانبەت بايلارمىز مۇنى ءتىپتى، شىبىن شاققان قۇرلى كورمەگەن بولار... 

ايتپاقشى، سوفيا حانىمدى كورشى رەسەي دە قولقالاعان كورىنەدى. ءتىپتى، بىزدىكىلەر ۇسىنعان سومادان ەكى ەسە از قاراجات ۇسىنىپتى. 23 ميلليون تەڭگە.  

ءتۇيىن. بۇل دالاقبايلىق، داراقىلىق ەمەس نەمەنە؟.. وسى ءبىز قازاقي داراقىلىقتان قاشان قۇتىلار ەكەنبىز؟.. الدە بۇل ءبىزدىڭ «ۇلتتىق ەرەكشەلىگىمىز» بە ەكەن؟

جايبەرگەن بولاتوۆ

Abai.kz