سۋديا نۇرلان اسانوۆ ءبىرىنشى ينستانتسيانىڭ قاۋلىسىن وزگەرىسسىز قالدىرىپ، احمەتوۆتىڭ ءوتىنىشىن كەرى قايتاردى.

سەرىك احمەتوۆتىڭ ادۆوكاتى نيكولاي لەسنيكتىڭ ايتۋىنشا، قورعاۋىنداعى ادام جازاسىنىڭ جارتىسىنان كوبىن وتەگەن. ونىڭ ىشىندە 1 جىل 9 اي تۇرمەدە وتىرعان. احمەتوۆتىڭ جازاسى 2021 جىلدىڭ 17 قازانىندا اياقتالادى.

- قورعاۋىمداعى ادام 5 جىلدان استام جازاسىن وتەدى، كەلتىرىلگەن شىعىندى تولىق قايتاردى، جۇمىس ىستەيدى. اۋداندىق سوتتا دۇرىس شەشىم شىقپادى. ول زاڭسىز ءارى نەگىزسىز. شارتتى تۇردە مەرزىمىنەن بۇرىن بوساتۋدى سۇرايمىز، - دەدى نيكولاي لەسنيك.

سەرىك احمەتوۆ پەن ادۆوكاتى قازان ايىندا قاراعاندىنىڭ اۋداندىق سوتىنا شاعىم ءتۇسىرىپ، شارتتى تۇردە مەرزىمىنەن بۇرىن بوساتۋ تۋرالى ءوتىنىشى قاناعاتتاندىرىلماعان ەدى. قورعاۋ تارابى احمەتوۆتىڭ نەگىزى ايىپتان 5 جىل بويى مەملەكەتتىك جۇمىس ىستەۋگە قويىلعان شەكتەۋدى الىپ تاستاۋدى دا سۇراعان.

پروكۋرور نۇرسۇلتان تاماباەۆ سۋديادان ءبىرىنشى ينستانتسيا شەشىمىن وزگەرىسسىز قالدىرۋدى سۇرادى.

- احمەتوۆ جازاسىن وتەگەن ۋاقىتتا شىعىننىڭ وتەلۋى، ءتارتىپ بۇزباعانى مەن دۇرىس مىنەزدەمەسى ەسكەرىلىپ، ەكى رەت كەشىرىم جاسالدى. سوتتالۋشىنىڭ جەكە شاعىمىن قاناعاتتاندىرماۋ كەرەك دەپ سانايمىن، - دەدى پروكۋرور.

سوت زالىنان شىعىپ كەلە جاتقاندا احمەتوۆ جۋرناليستەرگە «مەن – زاڭعا باعىناتىن اداممىن» دەدى.

قازاقستاننىڭ بۇرىنعى پرەمەر-ءمينيسترى، ەلدىڭ بۇرىنعى قورعانىس ءمينيسترى، قاراعاندى وبلىسىنىڭ اكىمى بولعان سەرىك احمەتوۆ 2015 جىلعى جەلتوقساندا "زاڭسىز كاسىپكەرلىكپەن اينالىستى" جانە "وكىلەتىن اسىرا قولداندى" دەپ ايىپتالىپ، 10 جىلعا سوتتالعان. احمەتوۆ سوت بارىسىندا وزىنە تاعىلعان ايىپتاردى جوققا شىعارعان. سوت ونىڭ دۇنيە-مۇلكىن تاركىلەپ، بەس جىل مەملەكەتتىك قىزمەتپەن اينالىسۋىنا تىيىم سالعان.

2016 جىلى ناۋرىزدا اپەللياتسيالىق ينستانتسيا سەرىك احمەتوۆتىڭ جازاسىن 10 جىلدان 8 جىلعا ازايتقان. 2017 جىلى قاڭتار ايىندا ونىڭ جازاسىنىڭ وتەلمەگەن مەرزىمىنىڭ تورتتەن ءبىرى قازاقستان تاۋەلسىزدىگىنىڭ 25 جىلدىعىنا وراي جاريالانعان راقىمشىلىق بويىنشا ازايتىلعان.

تۇرمە جازاسى باس بوستاندىعىن شەكتەۋ جازاسىمەن الماستىرىلعان سەرىك احمەتوۆ ەكى جىلعا جۋىق تۇرمەدە قاماۋدا وتىرىپ، 2017 جىلى 21 قىركۇيەكتە بوستاندىققا شىقتى.

2015 جىلى ونىمەن بىرگە بىرقاتار جوعارى لاۋازىمدى قىزمەت اتقارعان شەنەۋنىكتەر دە سوتتالدى. بۇل ءىس بويىنشا نەگىزگى ايىپتالۋشىلار تۇرمە جازاسىن الدى، بىراق كەيىنىرەك جازاسى جۇمسارتىلدى.

Abai.kz