مەملەكەت باسشىسىنىڭ جارلىعىمەن اتىراۋ وبلىسىنىڭ اكىمى نۇرلان نوعاەۆ قر ەنەرگەتيكا ءمينيسترى قىزمەتىنە تاعايىندالدى. بۇل تۋرالى اقوردا سايتى حابارلادى.

"نۇرلان اسقارۇلى نوعاەۆ قازاقستان رەسپۋبليكاسىنىڭ ەنەرگەتيكا ءمينيسترى بولىپ تاعايىندالسىن، ول اتىراۋ وبلىسىنىڭ اكىمى قىزمەتىنەن بوساتىلسىن", دەپ جازىلعان پرەزيدەنت جارلىعىندا.

(اتىراۋ وبلىسىنىڭ جاڭا اكىمى)

ال نۇرلان نوعاەۆتىڭ ورنىنا اتىراۋ وبلىسىنىڭ اكىمى بولىپ ماحامبەت جولداسقاليۇلى دوسمۇحامبەتوۆ تاعايىندالدى.

نۇرلان اسقارۇلى نوعاەۆ بيىل شىلدەدە 52 جاسقا تولعان. ورىس، تۇرىك جانە اعىلشىن تىلدەرىن ەركىن مەڭگەرگەن ەكەن.

قىزمەتتىك بيوگرافياسىنا كوز جۇگىرتسەك، نۇرلان اسقارۇلى ءار جىلدارى "قازاقتۇرىك مۇناي", "گيلي-پاسكەر", "قازمۇنايگاز" سەكىلدى مۇناي سالاسىنداعى ءىرىلى-ۇساقتى كومپانيالارقا قىزمەت قىلعان.

2006 جىلدىڭ تامىزىندا قر ەنەرگەتيكا جانە مينەرالدى رەسۋرستار مينيسترلىگىندە، مۇناي ونەركاسىبى دەپارتامەنتىن باسقارعان.

2007-2010 ارالىعىندا بقو وبلىس اكىمىنىڭ ورىنباسارى بولدى. 2010 جىلى قىزمەتى كوتەرىلىپ، بقو-دا وبلىس اكىمىنىڭ ءبىرىنشى ورىنباسارى بولىپ تاعايىندالعان. بۇل لاۋازىمدى 2012 جىلعا دەيىن اتقارعان. ءسويتىپ، 2012 جىلدىڭ قاڭتارىندا باتىس قازاقستان وبلىسىنىڭ اكىمى بولىپ تاعايىندالدى. ال 2016 جىلدان بەرى اتىراۋ وبلىسىن باسقارىپ كەلدى.

2016 جىلى نۇرلان اسقارۇلى اتىراۋ وبلىسىنىڭ اكىمى قىزمەتىندە جۇرگەندە ونىڭ ايلىق جالاقىسى تۋرالى اقپارات باق-تا جاريا بولدى. ول كەزدە نۇرلان نوعاەۆتىڭ وبلىس اكىمى لاۋازىمىنداعى ايلىق جالاقىسى - 924 مىڭ تەڭگەنى قۇراعان.

نۇرلان اسقارۇلى نوعاەۆ "قۇرمەت", "پاراسات" وردەندەرىمەن ماراپاتتالعان. "نۇر وتان" پارتياسىنىڭ مۇشەسى. رەسەيدە ءبىلىم العان. ي.گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىندە، سوسىن، رەسەي سىرتقى ىستەر مينيسترلىگى جانىنداعى "حالىقارالىق قاتىناستار ۋنيۆەرسيتەتى" ماسكەۋ مەملەكەتتىك ينستيتۋتىن تامامداعان.

Abai.kz