بۇگىن دۋشانبەدە قازاقستان مەديتسيناسىنىڭ كۇندەرى باستالدى. شارانىڭ باستى ماقساتى — تاجىكستان مەن قازاقستان دەنساۋلىق ساقتاۋ جۇيەلەرى اراسىنداعى ىنتىماقتاستىقتى كۇشەيتۋ، مەديتسينالىق ۇيىمدار اراسىنداعى ارىپتەستىكتى نىعايتۋ، ەكى ەلدىڭ ازاماتتارىنا مەديتسينالىق كومەك كورسەتۋدىڭ قولجەتىمدىلىگى مەن ساپاسىن قامتاماسىز ەتۋ جولىندا تاجىريبە مەن بىلىممەن، يننوۆاتسيالار مەن تەحنولوگيالارمەن الماسۋ.

ەكى كۇندىك شاراعا ەلىمىزدىڭ دەنساۋلىق ساقتاۋ ۆيتسە-ءمينيسترى ولجاس ابىشەۆ باستاعان 30-دان استام دەلەگات قاتىسۋدا. ولاردىڭ قاتارىندا وتاندىق جەتەكشى مەديتسينالىق ۇيىمدار مەن كلينيكالاردىڭ ءبىرىنشى باسشىلارى، ساناتورلىق-كۋرورتتىق ۇيىمداردىڭ قىزمەتكەرلەرى، فارمكومپانيالار، مەديتسينالىق ۋنيۆەرسيتەت رەكتورلارى بار.

ەكى مەملەكەتتىڭ دەنساۋلىق سالاسىنداعى ىنتىماقتاستىقتى نىعايتۋعا باعىتتالعان شارانىڭ ءبىرىنشى كۇنى فورۋم مەن قازاقستاندىق مەديتسينا جەتىستىكتەرىنىڭ كورمەسى  وتەدى.

فورۋم بارىسىندا قازاقستانداعى مەديتسينا سالاسىنداعى رەفورمالار، پراكتيكالىق مەديتسينادا قولدانىلاتىن يننوۆاتسيالار مەن وزىق تەحنولوگيالار تانىستىرىلىپ،  وتاندىق مەديتسينانىڭ مۇمكىندىكتەرى مەن جەتىستىكتەرى باياندالاتىن پرەزەنتاتسيالار جاسالىناتىن بولادى. تاراپتار ءوز تاجىريبەلەرىمەن، يننوۆاتسيالىق جانە تەحنولوگيالىق جەتىستىكتەرىمەن الماسادى. ديالوگتىق الاڭدا مەديتسينالىق ءتۋريزمدى دامىتۋ، انا مەن بالانىڭ دەنساۋلىعىن قورعاۋ، رەپرودۋكتيۆتى حيرۋرگيانىڭ جەتىستىكتەرى، كارديولوگيا سالاسىندا زاماناۋي تەحنولوگيالاردى قولدانۋ، كارديوحيرۋرگيالىق قىزمەتتى دامىتۋ جانە دەنساۋلىق ساقتاۋ سالاسىن تسيفرلاندىرۋ جانە ت.ب. مەديتسيناداعى وزەكتى ماسەلەلەر تالقىلانادى.

ءىس-شارانىڭ ەكىنشى كۇنى دۋشانبەدەگى جەتەكشى مەديتسينالىق ۇيىمداردا شەبەرلىك سىنىپتارى مەن كونسۋلتاتسيالار وتكىزىلەدى.

فورۋمعا پەدياتريا جانە بالالار حيرۋرگياسى عىلىمي ورتالىعىنىڭ باسقارما ءتورايىمى ريزا بورانباەۆا، ورتالىقتىڭ بىلىكتى دارىگەرى رۇستەم بيشمانوۆ قاتىسۋدا. ورتالىق دەلەگاتتارى ساپار بارىسىندا كەشە رەسپۋبليكالىق ونكولوگيالىق عىلىمي ورتالىعىندا بولدى. كەزدەسۋ بارىسىندا پەدياتريا ورتالىعىنىڭ باسشىسى ر.بورانباەۆا «قازاقستانداعى پەدياتريا — مۇمكىندىكتەرى مەن كەلەشەگى» تاقىرىبىندا تانىستىرىلىم جاساپ، تاجىكستان ونكولوگيالىق ورتالىعىنىڭ قىزمەتىمەن تانىستى.

Abai.kz