230 كونگرەسسمەن يمپيچمەنتتى قولداپ، داۋىس بەردى، 197-ءسى قارسى شىقتى. داۋىس بەرۋ نەگىزىنەن كونگرەسسمەندەردىڭ قاي پارتيا مۇشەسى بولعانىنا قاراي انىقتالعان سياقتى: دەموكراتتاردىڭ بارلىعى-دەرلىك يمپيچمەنتتى قولدادى، رەسپۋبليكاشىلداردىڭ بارلىعى قارسى شىقتى.
وسىلايشا دونالد ترامپ اقش تاريحىندا كونگرەستىڭ وكىلدەر پالاتاسى يمپيچمەنت جاريالاعان ءۇشىنشى پرەزيدەنت اتاندى. وكىلدەر پالاتاسى وعان ەكى ايىپ بويىنشا يمپيچمەنت جاريالاۋدى قولدادى: قىزمەتتىك وكىلەتىن اسىرا پايدالانۋ جانە كونگرەسس زەرتتەۋىنە كەدەرگى كەلتىرۋ. العاشقى ايىپ بويىنشا، ترامپ پرەزيدەنت وكىلەتىن پايدالانىپ، شەتەل ارىپتەسىنىڭ كومەگىمەن (ناقتى جاعدايدا ۋكراينا) 2020 جىلى بولاتىن پرەزيدەنت سايلاۋىنداعى ساياسي قارسىلاسىنا قارسى ءىستى زەرتتەۋگە تىرىسقان. ەكىنشى ايىپ بويىنشا، ترامپ يمپيچمەنت جاريالاۋ مۇمكىندىگى بويىنشا كونگرەسس زەرتتەۋى كەزىندە سۇراۋ سالىنعان مىڭداعان قۇجاتتى بەرمەگەن جانە وسى زەرتتەۋ اياسىندا كونگرەسس تالقىلاۋىنا بارماق بولعان كۋاگەرلەرگە كەدەرگى كەلتىرگەن.
ەندى ترامپقا يمپيچمەنت جاريالاۋ ماسەلەسىن سەنات قارايدى. بولجام بويىنشا، داۋىس بەرۋ قاڭتار ايىندا وتەدى.
ميچيگانداعى سايلاۋ كامپانياسى كەزىندە داۋىس بەرۋگە بايلانىستى پىكىرىن ايتقان ترامپ "دەموكراتتار ونداعان ميلليون امەريكا پاتريوتىنىڭ بيۋللەتەنىن (2016 جىلى پرەزيدەنت سايلاۋى كەزىندە ترامپتى جاقتاعان ادامدار سانى) جارامسىز قىلۋعا تىرىسىپ جاتىر" دەدى.
اقش-تا يمپيچمەنت داۋى ترامپتىڭ 25 شىلدەدە ۋكراينا پرەزيدەنتى ۆلاديمير زەلەنسكيمەن بولعان اڭگىمەسىنەن سوڭ تۋعان. امەريكالىق باسىلىمدار ترامپ 2020 جىلى وتەتىن سايلاۋدا باسەكەلەسى بولۋى ىقتيمال دجو بايدەننىڭ ۇستىنەن جەمقورلىق داۋى بويىنشا ءىس قوزعاۋعا زەلەنسكيدى ماجبۇرلەمەك بولعان دەپ جازدى. سىنشىلار ترامپتى "قىزمەت وكىلەتىن اسىرا پايدالانىپ، ىقتيمال باسەكەلەسىنە قارسى دەرەك تابۋعا تىرىستى" دەپ ايىپتادى. دونالد ترامپ بۇل ايىپتاۋلاردى جوققا شىعاردى.
ترامپ پەن زەلەنسكي اراسىنداعى اڭگىمە مازمۇنى بەلگىلى بولعان سوڭ اقش كونگرەسى وكىلدەر پالاتاسىنداعى دەموكراتتار ترامپقا "سەرتىن بۇزعانى ءۇشىن" يمپيچمەنت جاريالاۋ پروتسەسىن باستاعان. بۇعان دەيىن ۋكراينا پرەزيدەنتى ۆلاديمير زەلەنسكي وزىنە ترامپتىڭ قىسىم جاساماعانىن ايتقان.
Abai.kz
