ادۆوكات نۇرلان بەيسەكەەۆ ەكس-ءمينيستردىڭ بۇلتارتپاۋ شاراسىن وزگەرتىپ، سوتتى نۇر-سۇلتانعا اۋىستىرۋدى وتىنگەن. شكارۋپانىڭ قاماۋدا وتىرۋ مەرزىمى 16 جەلتوقساندا اياقتالعان.
ءبىر جىلدان بەرى قاراعاندىداعى تەرگەۋ اباقتىسىندا وتىرعان اناتولي شكارۋپا جەلتوقسان ايىنىڭ باسىندا ەل پرەزيدەنتى قاسىم-جومارت توقاەۆقا حات جازىپ، ء"وزىنىڭ ويدان شىعارىلعان ايىپتاۋلار نەگىزىندە قاماۋدا وتىرعانىن" ايتقان.
بۇل ءىس بويىنشا شكارۋپادان بولەك "تۇرعىن ءۇي-كوممۋنالدىق دامۋ قورى" كومپانياسىنىڭ باسقارما باسشىسى بولعان قايسار بايدالى مەن ENERCO كومپانياسىنىڭ ديرەكتورى ەرلان نابيەۆكە دە ايىپتار تاعىلعان. ۇشەۋى دە مەملەكەت اقشاسىن تالان-تاراجعا سالدى دەپ ايىپتالىپ جاتىر.
تەرگەۋ بولجامىنا سايكەس، شكارۋپا ساران قالاسىنىڭ اكىمى بولىپ تۇرعان كەزدە كوپقاباتتى ۇيلەردى جىلىتۋ ءۇشىن جابدىقتار الۋعا بولىنگەن 215 ميلليون تەڭگەدەن استام قاراجات ENERCO كومپانياسىنا زاڭسىز اۋدارىلعان.
ادۆوكات نۇرلان بەيسەكەەۆتىڭ ايتۋىنشا، قازىر ۇيلەردى جىلىتۋعا كەرەكتى جابدىقتار ساتىپ الىنعان. بىراق تاپسىرىستى الۋشى كومپانيا ورتالىق قازاندىقتى سوڭىنا دەيىن سالماي قويعان.
Abai.kz
