كۇندەردىڭ كۇنىندە...
كۇندەردىڭ كۇنىندە تاۋەلسىزدىك كۇنى ەڭ قادىرلى، ەڭ قاسيەتتى مەرەكە ەكەنىن ەڭبەكتەگەن بالا مەن ەڭكەيگەن قارتقا دەيىن، مىنبەردەگى بىلعارى كرەسلوداعى شەنەۋنىكتەن باستاپ قاراپايىم حالىققا دەيىن تۇگەل دەرلىك تۇسىنەتىن، جان تانىمەن ۇعاتىن كۇن تۋادى.
كۇندەردىڭ كۇنىندە ءبىز تاۋەلسىزدىكتى اقش-تىڭ 4-شىلدەسىندەي اتاپ ءوتىپ، جارياعا جار سالامىز.
كۇندەردىڭ كۇنىندە تاۋەلسىزدىك مەرەكەسى ازاتتىق ءۇشىن ارپالىسىپ، كۇرەسكەن كەنەسارى حان، يساتاي مەن ماحامبەت، كەيكى مەن جانقوجا، الاش ارىستارى مەن گەنوتسيد قۇرباندارى، جەلتوقسان بوزداقتارىن ەسكە الىپ، 1 مينۋتتىق رەسپۋبليكالىق دەڭگەيدە ۇنسىزدىك جاريالاۋمەن باستالادى.
كۇندەردىڭ كۇنىندە تاۋەلسىزدىك مەرەكەسىن اتاپ وتۋگە الماتىداعى رەسپۋبليكا الاڭىنا اكىمدىكتىڭ قىزمەتكەرلەرى مەن قوعامدىق ۇيىم مۇشەلەرى، جەلتوقسانشىلار عانا ەمەس، ون مىڭداعان قازاق كەلىپ، تويلايتىن شىنايى ازاتتىقتىڭ الاڭىنا اينالادى. ولاردىڭ قولدارىندا بوزداقتاردىڭ ەسكەرتكىشتەرىنە قوياتىن گۇل، ەزۋلەرىندە سولار سىيلاعان بوستاندىقتىڭ كۇلكىسى، جۇرەكتەرىندە كۇرەسكەر بابالارىنا دەگەن العىس تۇرادى.
كۇندەردىڭ كۇنىندە 16-جەلتوقسان ازا تۇتۋ كۇنى، ال 25-قازان تاۋەلسىزدىك كۇنى بولىپ بەكىتىلەدى. سول ساتتە قازاق، قاسىرەتتى جەلتوقسان مەن قاسيەتتى تاۋەلسىزدىك ۇعىمدارىنا تاعزىم ەتەدى.
كۇندەردىڭ كۇنىندە قازاقتىڭ ءتىلى، ساياساتى، ەكونوميكاسى شىنايى تاۋەلسىز بولادى. ويتكەنى 86-داعى بوزداقتار سول ءۇشىن قۇربان بولدى. بابالارىمىز 300 جىل سول ءۇشىن كۇرەستى، ءولدى، جىعىلدى، قايتا تۇردى، مويىمادى. ولاردىڭ ەرلىگى ەش ۇمىتىلمايدى. مىڭداعان قازاق بابالار ەرلىگى ۇمىت بولماۋ ءۇشىن بۇگىن، ەرتەڭ، ءبىر اپتادان سوڭ، اي سايىن بالاسىنا، باۋىرىنا، دوسىنا، كورشىسىنە ازاتتىقتىڭ الاۋىن جاققان باتىرلار جايلى ايتا بەرەدى، ايتا بەرەدى.
اسحات قاسەنعاليدىڭ الەۋمەتتىك جەلىدەگى پاراقشاسىنان
Abai.kz
