ۇلتتىق قوعامدىق سەنىم كەڭەسىنىڭ مۇشەسى تالعات قاليەۆ ەكىنشى مارتە وتكىزىلگەن كەڭەس وتىرىسىنىڭ نەگىزگى ناتيجەلەرىن اتادى، دەپ حابارلايدى قازاقپارات ءتىلشىسى.

«جۇمىس توپتارىنىڭ وتىرىستارىندا جاسالعان ۇسىنىستاردىڭ كوپشىلىگى قولداۋ تاپتى دەسە دە بولادى. كەيىنگى ايلاردا مۇددەلى مەملەكەتتىك ورگانداردىڭ، پرەزيدەنت اكىمشىلىگىنىڭ باسشىلىعىمەن وتكىزىلگەن كەزدەسۋلەردە الدىڭعى وتىرىستاردىڭ ۇسىنىستارى كەڭىنەن تالقىلانعان بولاتىن. ساياسي مودەرنيزاتسيالاۋ توبىنىڭ ناتيجەلەرىنىڭ ءبىرى - ميتينگىلەر تۋرالى حابارلاۋ جۇيەسىنە كوشۋ. بۇل وتە ماڭىزدى قادام»، - دەپ جازدى تالعات قاليەۆ Facebook-تە.

ساراپشىنىڭ ايتۋىنا قاراعاندا، ساياسي پارتيالاردىڭ مۇشەلەرىن تىركەۋدى 40 مىڭنان 20 مىڭعا ازايتۋ ىسىنە دە نازار اۋدارعان ابزال.

«بۇل كوپ پە، از با؟ 17 وڭىرگە ەسەپتەپ بولسەڭىز، ءبىر پارتيا ءۇشىن 1176 ادام كەرەك دەگەن ءسوز. بلوگەرلەردىڭ جازىلۋشىلارى مىڭداپ كەتكەن الەۋمەتتىك جەلىنىڭ زامانىندا ءوز پارتياڭىزدىڭ قاتارىن وپ-وڭاي جيناپ الۋعا بولادى. وپپوزيتسيالىق پارتيا وكىلدەرىنە پارلامەنتتەگى جەتەكشى پوزيتسيالار بەرىلەتىن بولدى. ماجىلىستەگى كوميتەتتىڭ باسشىسى لاۋازىم قاراپايىم دەپۋتاتتىق مانداتتان گورى كەز كەلگەن پارتيا ءۇشىن ەداۋىر جول اشىپ تۇر. ءسوزسىز، مۇنداي جاعدايدا پارلامەنت پىكىرتالاسقا بەيىم ءارى باتىل بولۋى ءتيىس»، - دەدى ول.

تالعات قاليەۆ سونىمەن قاتار مەملەكەت باسشىسىنىڭ ەسەپ كوميتەتى ءاۋديتىنىڭ جاريالى بولۋى كەرەكتىگى تۋرالى شەشىمىن ايتىپ ءوتتى.

«جاڭاشىلدىقتا ەكونوميكالىق سيپات باسىم دەسەك تە، بۇل شەشىمنىڭ ساياسي ماڭىزى دا جوعارى. سەبەبى، وسى وزگەرىس ازاماتتىق سەكتوردىڭ قۇزىرەتىن ارتتىرادى. جالا جابۋ تۋرالى باپتىڭ دەكريميناليزاتسيالانۋى وتاندىق جۋرناليستەردى جىگەرلەندىرە ءتۇسۋى كەرەك»، - دەدى تالعات قاليەۆ.

Abai.kz