بۇگىن ايماعىمىز ءۇشىن ايتۋلى كۇن. پاۆلودار قالاسىندا «Ertis» اتتى بىرەگەي مۋلتيمەديالىق مۋزەيى اشىلدى. بۇل قازاقتانداعى وسى تەكتەس العاشقى، ءارى جالعىز مۋزەي.

اتالمىش مۋزەي الەمنىڭ ءىرى تاريحي-جاراتىلىستانۋ مۋزەيلەرىنىڭ ۇلگىسىمەن قۇرىلعان. وندا گەولوگيا، فيزيكالىق گەوگرافيا، ەجەلگى فلورا مەن فاۋناسىنان، ەرتىس-بايان ءوڭىرىنىڭ پالەوزوي زامانىنان باستاپ كازىرگى كەزەڭگە دەيىنگى تاريحىن قامتيدى. نىسان قۇرىلىسىنا ​ ERG كومپانياسى 300 ملن. تەڭگە كولەمىندە دەمەۋشىلىك كورسەتكەن.

اشىلۋ سالتاناتىندا ءسوز سويلەگەن وبلىس اكىمى بولات باقاۋوۆ، بۇل ايماعىمىز بويىنشا 1992 جىلدان بەرى اشىلىپ تۇرعان العاشقى مۋزەي.

- بۇل وبلىسىمىزدىڭ تاريحىندا قالاتىن وقيعا. بىرەگەي، زاماناۋي مۋزەيدىڭ اشىلۋ سالتاناتىنا كۋا بولىپ وتىرمىز. وسىدان ەكى جىل بۇرىن، «رۋحاني جاڭعىرۋ» باعدارلاماسى العاش قولعا الىنا باستاعاندا-اق پاۆلوداردا تاريحتان سىر شەرتەتىن جانە زامان تالابىنا ساي كەلەتىن مۋزەي سالساق دەگەن وي كەلدى. مىنە، وسى ويىمىزدىڭ جەمىسىن بۇگىن كورىپ وتىرمىز. ەلباسىنىڭ جاريالاعان «ۇلى دالانىڭ جەتى قىرى» ماقالاسى جانە «تسيفرلى قازاقستان» باعدارلاماسى اياسىندا ەركە ەرتىس وزەنىنىڭ جاعاسىندا تاماشا مۋزەي بوي كوتەردى. بارشاڭىزدى قۇتتىقتايمىن، - دەدى ايماق باسشىسى.

مۋزەيدىڭ بىرەگەيلىگى – شىنايى ارحەولوگيالىق جانە تابيعي ەكسپوناتتاردىڭ زاماناۋي مۋلتيمەديالىق تەحنولوگيالارمەن جاراسىمدى ۇيلەس تاپقانىندا بولىپ وتىر. ونىڭ جالپى اۋماعى 2400 شارشى مەتردەن اسادى. 

نىسان ءبىر دەمدە 600 كەلۋشىنى قابىلداي الادى. ولار ءۇشىن توعىز ەكسپوزيتسيالىق زال جۇمىس ىستەيدى. سونداي-اق، مۋزەيدە رەستاۆراتسيالىق زەرتحانا، «Gloss Vision» اتتى ۆيرتۋالدى كيىم ولشەۋ الاڭى، داڭقتى جەرلەستەرىمىزدىڭ ءومىربايانى مەن ەڭبەكتەرى، مۇز ءداۋىرىنىڭ لاندشافتى، ەرتىس-بايان ءوڭىرىنىڭ فلوراسى مەن فاۋناسىنىڭ ەۆوليۋتسياسى، «قازقوناق» تابيعي ەسكەرتكىشىن مەكەن ەتكەن قۇستاردىڭ جاساندى ءتۇرىن كورۋگە بولادى. مۋزەيدىڭ ەرەكشە، قايتالانباس ەكسپوناتتارىنىڭ ءبىرى – ەجەلگى مامونتتىڭ قاڭقاسى.

مۋزەي زاماناۋي مۋلتيمەديالىق تەحنيكالارمەن جابدىقتالعان: real-book كىتابىمەن، اقپاراتتىق touch-پانەلىمەن جانە زاماناۋي ينستالياتسيالار.

پاۆلودار وبلىسى اكىمى ءباسپاسوز قىزمەتى 

Abai.kz