تۇركىستان وبلىسىنىڭ شارۋالارى ءۇشىن وڭتايلى حابار. «قازاگرو» ۇلتتىق كومپانياسىنا قاراستى «اگرارلىق نەسيە كورپوراتسياسى» اق-نىڭ كۇنگەي وبلىستاعى فيليالى اشىلدى. كورپوراتسيا قىزمەتىن الۋ ءۇشىن شىمكەنتتەگى عيماراتقا بارىپ قۇجات تاپسىرىپ كەلگەن شارۋالارعا ەندى ءۇشىنشى مەگاپوليسكە بارۋدىڭ قاجەتى جوق.

جاڭا فيليالدىڭ اشىلۋ سالتاناتىنا كورپوراتسيانىڭ مونيتورينگ  جانە نەسيەلىك اكىمشىلەندىرۋ سالاسى بويىنشا باسقارۋشى ديرەكتورى باعلان قۇلتاەۆ پەن ءوڭىردىڭ شارۋا قوجالىقتارى، نەسيە كورپوراتسياسىمەن ەتەنە جۇمىس جۇرگىزۋشى نەسيە سەرىكتەستىكتەرىنىڭ توراعالارى قاتىستى.

«اگرارلىق نەسيە كورپوراتسياسى» اق-نىڭ تۇركىستان وبلىستىق فيليال ديرەكتورى فايزۋللا بايدۋللاەۆتىڭ ايتۋىنشا، بۇل فيليال قاجەتتىلىكتەن اشىلىپ وتىر.

(فايزۋللا بايدۋللاەۆ)

«وزدەرىڭىز بىلەسىزدەر، شىمكەنت ءۇشىنشى مەگاپوليس اتانعانعا دەيىن شارۋالارعا ءبىر فيليال قىزمەت كورسەتىپ كەلدى. كۇنى بۇگىنگە دەيىن شىمكەنتتەگى عيماراتتا جۇمىس جاسادىق. بىراق، وبلىستىڭ وزگە اۋدان، قالالارىنان كەلەتىن حالىق ءۇشىن بۇل ازداپ قولايسىزدىق تانىتىپ كەلدى. سەبەبى ولار قۇجاتتىڭ كەيبىر ءتۇرىن الۋ ءۇشىن تۇركىستانعا كەلەدى دە ونى تاپسىرۋ ءۇشىن شىمكەنتكە باراتىن. اگرارلىق نەسيە كورپوراتسيانىڭ ديرەكتورلار كەڭەسىنىڭ شەشىمىمەن شارۋالار ىڭعايلىعى ءۇشىن جاڭا فيليال اشىلىپ وتىر.  بىز قىزمەت كورسەتۋدە كەلۋشىلەردىڭ جىلدام نەسيە الۋىن ءبىرىنشى كەزەككە قويامىز. وسى باعىتتا بىزگە كەلىپ تۇسكەن وتىنىشتەر شۇعىل قارالىپ، ماقۇلدانۋعا جىبەرىلەدى. ءبىزدىڭ نەگىزگى ماقساتىمىز – شارۋالاردىڭ ۋاقىتىن ۇنەمدەي وتىرىپ، قولداۋ كورسەتۋ»،- دەدى فايزۋللا بايدۋللاەۆ.

ءوز كەزەگىندە مۇنداي شەشىمنىڭ قابىلدانعانىنا ءناسىبىن اۋىل شارۋاشىلىعى سالاسىنان تاۋىپ وتىرعان شارۋالار ريزا. سولاردىڭ ءبىرى – تاستاي شالتاەۆ. شارۋا 2013 جىلى «سىباعا» باعدارلاماسى ارقىلى 10 ملن تەڭگە كولەمىندە تومەندەتىلگەن پايىزبەن نەسيە العان. وعان قوراسىنداعى ءىرى قارا مال سانىن كوبەيتكەن. اگرارلىق نەسيە كورپوراتسياسىنىڭ جاڭادان اشىلعان تۇركىستان وبلىستىق فيليالىنا كەلگەن ول تاعى دا قولداۋ كورسەم دەگەن نيەتىن جەتكىزدى.

«مۇنداعى قىزمەتكەرلەردەن «قاراپايىم زاتتار ەكونوميكاسى» باعدارلاماسى تۋرالى سۇراپ ءبىلدىم. ماقساتىم تاعى دا نەسيە الىپ، جىلقى باعۋدى جوسپارلاپ وتىرمىن. ناقتى قانشا سوما بەرىلەتىنى ءالى بەلگىسىز، ونى ماعان كەپىلگە قويىلعان مۇلكىمنىڭ باعالانۋىنا قاراي انىقتالاتىنىن ايتتى. ماعان قارجى كولەمى نەعۇرلىم كوپ بولعانى دۇرىس، كوبىرەك مال ساتىپ الامىن. قاجەتتى قورام، جايىلىم جەرىم بار. نەگىزى ايتار ەدىم، اگرارلىق نەسيە كورپوراتسياسىنىڭ جۇمىسى ءوزىمنىڭ كوڭىلىمنەن شىعادى. ءتيىمدى بولماسا، ەكىنشى رەت نەسيە الۋعا كەلمەس ەدىم عوي (كۇلىپ)»،- دەدى شارۋا.

ال ارىس قالاسىنىڭ 60 جاستاعى تۇرعىنى، «دوستار-م»  جشس-ءنىڭ ديرەكتورى مامىتحان ءالىمحانۇلى سوڭعى 15 جىلدان بەرى مال شارۋاشىلىعىنا اسا دەن قويىپ، مەملەكەتتەن العان قولداۋىنىڭ ارقاسىندا بۇگىندە مال باسىن كوبەيتىپ وتىر. العاش رەت 2004 جىلى تومەندەتىلگەن پايىزبەن 6 ملن تەڭگە العان شارۋا بەرەشەگىن وتەگەن سوڭ تاعى دا قۇجاتىن تاپسىرىپتى. ەكىنشى رەت وعان 10 ملن تەڭگە بەرىلگەن. ال 2015 جىلى «سىباعا» باعدارلاماسى ارقىلى بەرىلگەن نەسيەگە 77 باس ءىرى قارا مال ساتىپ العان. ۋاقىت ءوتىپ، ونى كوبەيتىپ، قازىرگى تاڭدا مال سانى بۇزاۋلارىن قوسپاعاندا 125 انالىق ءىرى قاراعا جەتكەن.

«اگرارلىق نەسيە كورپوراتسياسىن اۋىل شارۋاشىلىعىمەن اينالىساتىن كاسىپكەرلەر ءۇشىن وتە ءتيىمدى، قولايلى قارجىلىق ۇيىم دەپ سانايمىن. سەبەبى ۇستەمە پايىزى تومەن جانە دە بەرىلگەن قارجىنى وتەۋدە ەكى جىلعا بوساتادى. بۇل ارالىقتا نەسيەنىڭ تەك ۇستەمە پايىزىن جىلىنا ءبىر رەت تولەيمىز دە، نەگىزگى قارىز  24 ايدان سوڭ الىنادى. وعان قوسا مەملەكەتتىڭ سۋبسيدياسى  بار. ماسەلەن، نەسيە 15 پايىزبەن بەرىلگەن بولسا، ونىڭ 10 پايىزىن مەملەكەت سۋبسيديالايدى (اۆتور: باعدارلاما تۇرىنە قاراي), شارۋا 5 پايىزىن تولەيدى. بۇل ءبىز سەكىلدى قاراپايىم حالىق ءۇشىن وتە ءتيىمدى. الداعى ۋاقىتتا مال بورداقىلاۋ باعىتىن قولعا السام دەيمىن. ول ءۇشىن ارنايى الاڭ سالىپ تا قويدىم. كورپوراتسيانىڭ ورتالىق اپپاراتىنا ءتيىستى قۇجاتتارىمدى وتكىزدىم. ماقۇلدانسا، نەسيە كولەمى كولەمدى بولادى. وعان شەتەلدەن اسىل تۇقىمدى ءىرى قارا مال اكەلۋدى جوسپارلاپ وتىرمىن»،- دەدى شارۋا مامىتحان ايداعاراەۆ.

اگرارلىق نەسيە كورپوراتسياسى  «سىباعا»، «ىسكەر»، «قاراپايىم زاتتار ەكونوميكاسى»، «ىرىس» سىندى سەگىز باعدارلاما اياسىندا شارۋالارعا قولداۋ كورسەتەدى. باعدارلاما تۇرىنە قاراي نەسيە پايىزى ءارتۇرلى.  ال سوماسى 1 ملن تەڭگەدەن باستالىپ، نەسيە الۋشىنىڭ قولداۋ الۋداعى ماقساتى، كەپىلدىككە قويعان مۇلكىنە قاراي شەكتەۋسىز. بۇگىنگى تاڭدا تۇركىستان وبلىسىندا «ىسكەر» باعدارلاماسى ارقىلى قولداۋ تاپقاندار سانى باسىم. «قاراپايىم زاتتار ەكونوميكاسى»  بويىنشا دا قىزىعۋشىلىق تانىتىپ وتىرعاندار ارتىپ كەلەدى. ال بەرىلگەن نەسيە كولەمىمەن «اگروبيزنەس» باعدارلاماسى كوش باستاپ تۇر.

تۇركىستان ءوڭىرى رەسپۋبليكادا اۋىل شارۋاشىلىعى سالاسى دامىعان وبلىستاردىڭ قاتارىندا ەكەنى بەلگىلى. مۇندا ەگىن مەن مال شارۋاشىلىعىن قولعا الىپ، كاسىبىن دوڭگەلەتىپ وتىرعاندار باسىم. اگرارلىق نەسيە كورپوراتسياسىنداعىلاردىڭ مالىمەتىنشە، سالانىڭ ءدال وسى ەكى باعىتى بويىنشا قولداۋ الۋعا كەلۋشىلەر سانى دا جىل سايىن ارتىپ كەلەدى.

Abai.kz