- كەلىسىم بۇزىلىپ جاتىر. قاراشانىڭ جالاقاسى كەشىگىپ ءتۇستى. ونى الۋ ءۇشىن ءتۇن ورتاسىنا دەيىن كەزەكتە تۇرامىز. تۇنگى 3-4-تەردە ويانىپ قايتا جۇمىسقا شىعامىز. بىزگە اۆانستى ايدىڭ 15-ىنە دەيىن بەرۋى كەرەك. كەيىن 16-سى، 18-ءى، ودان 26-سىنا جەتتى. بۇگىن دە "ەرتەڭ" دەپ جاتىر، - دەيدى كوندۋكتور ناتاليا بوريسوۆيچ.

قالالىق اۆتوپارك قىزمەتكەرلەرى ەڭبەك قۇقىعىنىڭ بۇزىلعانىنا نارازى.

- كەلىسىم-شارتتى المادىم. قولىمدا ەشتەڭە جوق. تەكسەرگەن كەزدە سوڭعى 3 ايدا زەينەتاقى قورىنا اقشا اۋدارىلماعانىن ءبىلدىم، - دەپ شاعىنادى تاعى ءبىر كوندۋكتور ءمادينا جۇماعۇلوۆا.

جۇمىسشىلاردىڭ شاعىمىن تىڭداعان Semey Bus اۆتوپاركىنىڭ ديرەكتورى اسقار زيادانوۆ تالاپ-تىلەكتەردىڭ نەگىزسىز ەكەنىن ايتتى.

- بارلىق اقشا ەرتەڭ بەرىلەدى. ارتىق شۋ كوتەرىپ كەرەك ەمەس، - دەدى ول.

اۆتوپارك ديرەكتورى قىزمەتكەرلەرىنىڭ قۇقىعىنىڭ بۇزىلۋىن جوققا شىعارادى. كەيبىر جۇمىسشىلار باقىلاۋشىلاردىڭ كوندۋكتورلاردى اقشا جاسىرىپ قالادى دەگەن كۇدىكپەن شەشىندىرىپ تەكسەرەتىنىن ايتسا، ەندى ءبىرى اۋىسىم الدىندا اۆتوبۋس جۋعىزادى دەپ ارىزداندى. زيادينوۆ "ونداي جاعداي بولعان جوق" دەيدى. بىراق جۋرناليستەردىڭ ەڭبەك كەلىسىم-شارتى مەن زەينەتاقى اۋدارىمىنا قاتىستى ساۋالىنا جاۋاپ بەرۋدەن باس تارتتى.

جۇرگىزۋشىلەر بۇعان دەيىن اۆتوبۋستاردىڭ رەيسكە شىقپاعان كەزى بولعانىن ايتادى. الايدا جۇمىسشىلار نارازىلىعى اۆتوپاركتىڭ 10 ادامدى جۇمىستان شىعارۋىمەن اياقتالعان.

قارسىلىق اكتسياسى كەزىندە اۆتوپارك باسشىلىعى جۇمىسشىلاردىڭ اۆانسىن بەرە باستادى. ارىزدانعاندار پوليتسيا كەلگەن سوڭ تارادى.

Abai.kz