الماتى ماڭىندا جولاۋشىلار تاسىمالدايتىن ۇشاق اپاتقا ۇشىراپ، 15 ادامنىڭ قازا بولۋىنا بايلانىستى پرەزيدەنت قاسىم-جومارت توقاەۆ 28 جەلتوقساندى قارالى كۇن دەپ جاريالادى.بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي "Facebook" جەلىسىندە جازدى.

"پرەزيدەنت قاسىم-جومارت توقاەۆ الماتى ماڭىندا ۇشاق اپاتىنان ادامداردىڭ قازا بولۋىنا بايلانىستى 2019 جىلدىڭ 28 جەلتوقسانىن جالپىۇلتتىق ازا تۇتۋ كۇنى دەپ جاريالادى", دەلىنگەن رەسمي حابارلامادا.

بۇگىن تاڭەرتەڭ Bek Air اۋە كومپانياسىنىڭ الماتى - نۇر-سۇلتان باعىتىنداعى 2100-رەيسى الماتى قالاسى ماڭىندا، تالعار اۋدانىنا قاراستى المەرەك اۋىلىندا اپاتقا ۇشىرادى. بورتتا 93 جولاۋشى جانە ەكيپاجدىڭ بەس مۇشەسى بولعان.

قازىرگى ۋاقتا اپاتتان قازا تاپقاندار سانى 15 ادامعا جەتكەن. وسىنىڭ الدىندا رەسمي ورگاندار قازا تاپقان ازاماتتاردىڭ جەكە تۇلعاسى تۋرالى اقپاراتتى جاريا ەتكەن.

ۇشاق اپاتىنان قازاقستان گەنەرالدار كەڭەسىنىڭ توراعاسى رۇستەم ەسىمحانۇلى قايداروۆ پەن "Informburo.kz" سايتىنىڭ جاڭالىقتار رەداكتورى دانا كرۋگلوۆانىڭ دا قايتىس بولعانى بەلگىلى بولدى.

Abai.kz