ازامات قاسىم. «شىعىس شىنارى» باۋىرجان جاقىپقا بۇيىردى
ەل تاۋەلسىزدىگىنىڭ 20 جىلدىعىنا ارنالعان «20 جارقىن ءىس» اكتسياسى اياسىنداعى «شىعىس شىنارى - 2011» اتتى ءىى حالىقارالىق ءمۇشايرا وسكەمەن قالاسىندا ءوتتى.
ەل تاۋەلسىزدىگىنىڭ 20 جىلدىعىنا ارنالعان «20 جارقىن ءىس» اكتسياسى اياسىنداعى «شىعىس شىنارى - 2011» اتتى ءىى حالىقارالىق ءمۇشايرا وسكەمەن قالاسىندا ءوتتى.
شىعىس قازاقستان وبلىسىنىڭ اكىمى بەردىبەك ساپارباەۆتىڭ باستاماسىمەن ومىرگە كەلگەن بۇل شارا وتكەن جىلى العاش رەت ۇيىمداستىرىلىپ، ەلىمىزدىڭ تۇكپىر-تۇكپىرىنەن، شەتەلدەگى قانداستارىمىزدان 170 اقىن قاتىسقان-دى. ماقسات ەلىمىزدىڭ شۇرايلى دا شىرايلى ولكەلەرىنىڭ ءبىرى - شىعىستىڭ عاسىرلار قويناۋىنداعى تاريحىن، اتا-بابا ەرلىگىن، تاۋەلسىزدىك جىلدارىنداعى جەتكەن جەتىستىكتەرىن، تابيعات كوركىن جىرعا قوسىپ، جاس ۇرپاقتىڭ ساناسىنا ءوتانسۇيگىشتىك رۋح ۇيالاتۋ، دانا اباي تۋعان ولكەنىڭ كەشەگى، بۇگىنگى تارلان اقىندارىنىڭ ءىزباسارلارىن تۇلەتۋگە سايادى.
بيىلعى مۇشايراعا ەلىمىزدىڭ ءار تۇكپىرىنەن، قىرعىزستان، وزبەكستان، موڭعوليا، قىتاي قاتارلى شەتەلدەردەن 108 اقىن قاتىسىپ، وسىلاردىڭ ءىشىنەن سايدىڭ تاسىنداي ىرىكتەلگەن ساناۋلىسى عانا سوڭعى كەزەڭگە جولداما العان. اقىنداردىڭ شالقار شابىتتان تۋعان سالقار جىرلارى بىرىنەن-ءبىرى اسىپ تۇسەدى. دەگەنمەن دە ورنەكتى ولەڭىمەن تالايعا تاڭداي قاقتىرعان قازاقستان جازۋشىلار وداعىنىڭ ءمۇشەسى، م.ماقاتاەۆ اتىنداعى، مەملەكەتتىك «دارىن»، «جاستار» سىيلىقتارىنىڭ لاۋرەاتى باۋىرجان جاقىپ باس جۇلدەنى ەنشىلەدى. 1-ورىنعا - الماتىلىق اقىن، «جاس قازاق ءۇنى» گازەتىنىڭ رەداكتورى قازىبەك يسا، 2-ورىنعا الماتىلىق جاراس سارسەك پەن استانالىق جانات اسكەربەكقىزى يە بولدى. 3-ورىندى اقىن جاركەن بودەش، ءجۇرسىن ەرمان، ۇلاربەك دالەي ەنشىلەدى.
جالپى، ىرىكتەلگەن اقىنداردىڭ ەشقايسىسى دا ەسكەرۋسىز قالعان جوق. اقىن ءاليا داۋلەتباەۆا، باقىت بەدەلحان، كادىربەك قۇنىپيالار - ارناۋلى سىيلىققا، ازامات تاسقارا، دينارا مالىكوۆا، اسانقادىر يسابەك، قورعانبەك امانجول ىنتالاندىرۋ سىيلىقتارىنا يە بولدى.
ءدۇبىرلى جىر دوداسىنىڭ كورەرمەندەرى سۇلۋ جىرمەن سۋسىنداپ قانا قويماي، شىعىستىڭ ءار ءۇيىنىڭ تورىندە تۇرار قۇندى تۋىندىلار - بيىل جارىق كورگەن «دەموكراتيا سالتاناتى»، «شىعىس جۇلدىزدارى»، «شىعىس شىنارلارى» دەپ اتالاتىن ءۇش كىتاپتىڭ تۇساۋىن كەسۋ ءراسىمىنىڭ كۋاسى بولدى.
جيىن سوڭىندا وبلىس اكىمى قازاقتىڭ كورنەكتى اقىنى تۇمانباي مولداعاليەۆتى اباي اتىنداعى ارنايى سىيلىقپەن ماراپاتتادى. سونداي-اق قازاق ادەبيەتىنىڭ دامۋىنا قوسقان ۇلەسى ءۇشىن قازاقستاننىڭ حالىق جازۋشىسى قابدەش ءجۇمادىلوۆ، ءبۇكىل ءومىرىن ءباسپاسوز قىزمەتىنە ارناعان، قازاقستان رەسپۋبليكاسىنىڭ ەڭبەك سىڭىرگەن قايراتكەرى كەڭەس يۋسۋپوۆ، مەملەكەتتىك «اق جاۋىن» كامەرالىق وركەسترىنىڭ كوركەمدىك جەتەكشىسى، قازاقستان رەسپۋبليكاسىنىڭ ەڭبەك سىڭىرگەن ءارتىسى، كۇيشى، سازگەر سەكەن تۇرىسبەكوۆ بيىلعى جىلدىڭ مەرەيتويى سىيلىعىنىڭ يەگەرى رەتىندە ماراپاتتالىپ، باعالى سىيلىقتارعا يە بولدى.
بەردىبەك ساپارباەۆ، شىعىس قازاقستان وبلىسىنىڭ اكىمى:
- ەلدىڭ ەلدىگىن تانىتاتىن، اتىن شىعاراتىن ادەبيەت ەكەنى بەلگىلى. ءارى ولەڭ-جىر - حالقىمىزدىڭ اتادان بالاعا جالعاسىپ كەلە جاتقان كيەلى ونەرىنىڭ ءبىرى. سول ونەردىڭ كىندىگى ۇزىلمەي، ۇرپاقتان ۇرپاققا جالعاسۋى ءۇشىن، كەمەلدەنە بەرۋى ءۇشىن جىر ءمۇشايراسىن داستۇرگە اينالدىرماق نيەتتەمىز. بۇل - ءبىزدىڭ ەگەمەندىگىمىزدىڭ ارقاسى. وسكەمەن قالاسىندا قازاق اقىندارىنىڭ ءمۇشايراسىن وتكىزۋ ءبىر كەزدەرى ءوڭىمىز تۇگىل، تۇسىمىزگە كىرمەگەن. سوندىقتان تاۋەلسىزدىگىمىزدىڭ تۋىن كوتەرىپ، تۇعىرىن بەكەمدەگەن ەلباسىمىزعا العىس ايتامىن. وتكەن جىلعى ءمۇشايرا ۇلى اباي بابامىزدىڭ تۋعانىنا 165 جىل تولۋ مەرەكەسىنە ارنالسا، بيىل ەل تاۋەلسىزدىگىنىڭ 20 جىلدىعىنا ارنالىپ وتىر.
اۆتور: ازامات قاسىم وسكەمەن
