«اق جول» پارتياسىنا وتىز كاسىپكەر سوتتىڭ كەلىسىمدەردى جارامسىز دەپ تانۋ ماسەلەسى بويىنشا جۇگىندى.  وسىعان وراي، 17 قاڭتاردا «اق جول» پارتياسىنىڭ كەڭسەسىندە كاسىپكەرلەردىڭ فراكتسيا دەپۋتاتتارىمەن كەزدەسۋى ءوتتى.

ءوتىنىش بەرۋشىلەردىڭ ايتۋىنشا، 2017 جىلدان باستاپ قاراعاندى ​​وبلىسىنىڭ مەملەكەتتىك كىرىستەر ورگاندارى ءۇشىنشى جانە ءتىپتى بەسىنشى كونتر-سەرىكتەستەرمەن جاسالعان كەلىسىمدەردى جارامسىز دەپ تانىپ، جاپپاي ايىپپۇلداردى ءوندىرىپ الۋدا. 

سونىمەن قاتار، سالىق ورگاندارى «الاياقتىق كەلىسىمدەردى» سالىق تولەۋدەن جالتارۋدىڭ نەگىزىندە ەمەس، تاراپتاردىڭ ءبىرىنىڭ بالانسىندا اكتيۆتەردىڭ نەمەسە شتات سانى بولماۋىنا بايلانىستى، ياعني ءوز قالاۋى بويىنشا انىقتاعان. مۇنداي فاكتىلەر دەرەۋ سوتقا كەلىسىمدەردى جارامسىز دەپ تانۋ ءۇشىن جىبەرىلەدى. شىنىمەن دە، قازىرگى ۋاقىتتا، كوپتەگەن كاسىپكەرلەردە قاراجات تا، قىزمەتكەرلەر سانى دا شەكتەۋلى. 

كاسىپكەرلەردىڭ ايتۋىنشا، سوتتار كەلىسىمدەردى ءىس جۇزىندەي تەكسەرمەي، ۇسىنىلعان دالەلدەرگە زاڭدى باعا بەرمەي-اق، سالىق ورگاندارىنىڭ 90% تالاپتارىن قاناعاتتاندىرادى. سونىمەن قاتار، زاڭ تالاپتارىنا قاراماستان، سوتتار ايىپتالۋشىلاردان 3 جىل بۇرىن جاسالعان كەلىسىمدەر بويىنشا تالاپ قويۋ مەرزىمىن قولدانۋدان باس تارتادى. 

وبلىس كاسىپكەرلەرى قاۋىمداستىعىنىڭ مالىمەتتەرى بويىنشا، وسىنداي سوت ىستەرىنىڭ سانى 2017 جىلى - 116, 2018 جىلى - 481, 2019 جىلى – 685-كە جەتكەن. ولاردىڭ باسىم كوپشىلىگىن سوت ورگاندارى سالىق ورگاندارىنىڭ پايداسىنا شەشەدى. بۇل ءوز كەزەگىندە شاعىن جانە ورتا بيزنەستىڭ قۇلدىراۋىنا اكەپ سوعۋدا.  سونىمەن بىرگە، جوعارعى سوت پەن باس پروكۋراتۋراعا شاعىمدانۋ دا ەش ناتيجە بەرمەگەن. 

كاسىپكەرلەر اتالمىش ماسەلە كۇن ساناپ ۇلعايىپ كەلە جاتقاندىقتان، وزدەرىنىڭ قۇقىقتارىن قورعاۋدى سۇرادى. كەزدەسۋدە ت.ءاشىموۆ (اسپاپ), م. نۇرعوجين («مير ستەكلا» جشس), ب. سادۋوۆا (قۇرىلىسشىلار قاۋىمداستىعى), ە.حەن («ستروي بيزنەس كونسالتينگ» جشس)  سىندى ونداعان كاسىپكەر مەن ولاردىڭ ادۆوكاتتارى وزدەرىنىڭ ناقتى جاعدايلارى تۋرالى ايتتى. 

«اق جول» دەموكراتيالىق پارتياسىنىڭ توراعاسى ازات پەرۋاشەۆ بۇل ماسەلە تەك قاراعاندى وبلىسىندا عانا ەمەس، باسقا دا ايماقتاردا ءجيى كەزدەسەتىنىن اتاپ ءوتتى. بۇعان دەيىن اتالعان ماسەلەنى «اق جول» پارتياسى باس پروكۋراتۋرا، قارجى مينيسترلىگى جانە «اتامەكەن» ۇلتتىق كاسىپكەرلەر پالاتاسىنىڭ وكىلدەرىمەن بىرگە جوعارعى سوتتىڭ الاڭىندا تالقىلاۋعا ۇسىنعان بولاتىن.

تالقىلاۋ ناتيجەلەرى بويىنشا قۇرىلعان جۇمىس توبى زاڭناماعا قاجەتتى وزگەرىستەر ەنگىزۋ بويىنشا ۇسىنىستاردى تالقىلادى. الايدا، وتكەن جىلدىڭ جازىنان باستاپ توپ اتالعان ۇسىنىستاردى ورىنداماي جۇمىسىن توقتاتقان. سوندىقتان ءبىز ۇسىنعان تاسىلدەر جۇزەگە اسىرىلمادى، ماسەلەنى شەشۋ تەتىگى ازىرلەنبەي قالدى. 

قانشاما دالەلدەردىڭ بولعانىنا قاراماستان سوت شەشىمدەرىنىڭ شىعىپ قويعاندىعى بۇل ماسەلەنى قيىنداتۋدا. تەك باس پروكۋرور نەمەسە جوعارعى سوتتىڭ توراعاسى ولاردى قايتا قاراۋدى تالاپ ەتە الادى. وكىنىشكە وراي، ءبىز كوپتەگەن ىستەردە پروكۋراتۋرا ورگاندارى بۇرىنعىداي كاسىپكەرلەردىڭ قۇقىعىن قورعامايتىنىن كورىپ ءجۇرمىز. 

ءبىز باس پروكۋراتۋراعا دا، جوعارعى سوتقا دا دەپۋتاتتىق ساۋالداردى دايىندايمىز. سونىمەن قاتار، ءبىز بيزنەسپەن جۇمىس ىستەۋدىڭ مۇنداي ۆارۆارلىق ادىستەرىن بولدىرماۋ ءۇشىن قارجى مينيسترلىگىنىڭ  باسشىلىعىمەن جەكە اڭگىمەلەسەمىز »، - دەپ ازات پەرۋاشەۆ كاسىپكەرلەردى سەندىردى.

Abai.kz