«الماتى وبلىسىنداعى جاركەنتتە قىتايداعى قاۋىپتى كوروناۆيرۋستى جۇقتىرعان ءبىر ادام انىقتالىپتى. قازىر ۆيرۋس جۇقتىرعان ادام اۋرۋحانادا جاتىر ەكەن» گۋ-گۋ اڭگىمە كەشەلى-بەرى الەۋمەتتىك جەلىنى جەلدەي كەزىپ ءجۇر. ۆيرۋس جۇقتىرعان ادام قىتايدان جاركەنتتەگى شەكارا ارقىلى ءوتىپتى-ءمىس.

قىتايدىڭ ۋحان قالاسىنان تارالىپ، بۇگىندە مۇحيت اسىپ، اقش، كانادا، فرانتسيا، اۆستراليا، گەرمانيا، جاپونيا، وڭتۇستىك كورەيا اۋماقتارىنا دەيىن تاراعان الگى ۆيرۋستىڭ قازاقستان اۋماعىنا تارالۋىنا جول بەرمەۋ ءۇشىن ۇكىمەت ءبىرلى-جارىم شارا قابىلدادى دەسەك تە، مەملەكەتتىك شەكارا تولىق جابىلعان جوق-تى.

ال اڭگىمە بولىپ وتىرعان جاركەنت (پانفيلوۆ اۋدانى) قىتايمەن شەكارالاسادى. وندا التىنكول شەكارا بەكەتى بار (تەمىرجول بەكەتى), نۇر جول شەكارا بەكەتى تاعى بار (قورعاس). سونداي-اق، قورعاس ەركىن ساۋدا ايماعى (متسپس) جانە بار.

ءبىز الەۋمەتتىك جەلىدەگى الگى اقپاراتتىڭ انىق-قانىعىن بىلمەك بولىپ، الماتى وبلىسى پانفيلوۆ اۋدانى اكىمدىگىنە حابارلاستىق. اۋداندىق اكىمدىكتىڭ ءباسپاسوز حاتشىسى نۇربول حاناعاتۇلىنىڭ ايتۋىنشا، ىستىعى كوتەرىلگەن ەكى ادامنىڭ شەكارادان وتكەنى راس. الايدا تولىق تەكسەرۋدەن كەيىن ولاردىڭ ۆيرۋس جۇقتارماعانى انىقتالعان.

نۇربول حاناعاتۇلى، اكىمىنىڭ ءباسپاسوز حاتشىسى:

- ءبىزدىڭ اۋداندا كوروناۆيرۋس جۇقتىرعان ادام انىقتالدى دەگەن جالعان اقپارات. ەكى كۇن بۇرىن «نۇر جولى» پۋنكتىنەن وتكەن جولاۋشىلاردى تەكسەرۋ بارىسىندا ەكى ازاماتتىڭ دەنە تەمپەراتۋراسى 37,5 گرادۋس ەكەنى انىقتالدى. بۇنى ارنايى قۇرىلعى انىقتادى. ماماندار سول ءساتتىڭ وزىندە ازاماتتاردى ەمحاناعا جەتكىزىپ، تولىق تەكسەرۋدەن وتكىزدى. ول تەكسەرۋدىڭ ناتيجەسى كەشە شىعىپ، ازاماتتاردىڭ ۆيرۋستان امان ەكەنى بەلگىلى بولدى.

بۇل ەكى جولاۋشى دا قازاقستان ازاماتى. ءبىرى شىعىس قازاقستان وبلىسىنىڭ تۇرعىنى. ال ءبىرى الماتىلىق ستۋدەنت، گۋانچجوۋ قالاسىندا وقيدى. ەكى ازامات تا تولىق تەكسەرۋدەن ءوتتى، بۇگىن ەمحانادان شىعادى. ال ولارمەن قارىم-قاتىناستا بولعان وزگە 19 جولاۋشىنى دا ارنايى ماماندار قاراپ، تەكسەردى.

«قورعاس» شەكارا ماڭى حالىقارالىق ىنتىماقتاستىق ورتالىعى 22 قاڭتاردان باستاپ جابىلدى. ال كەشەدەن باستاپ (29 قاڭتار) وتكىزۋ پۋنكتىنەن جولاۋشىلاردى تاسىمالدايتىن اۆتوبۋستاردىڭ قاتىناسى توقتاتىلدى. 

ايتا كەتەيىك، وسىعان دەيىن الماتى وبلىسى اكىمىنىڭ ءباسپاسوز قىزمەتى قىتايدان 21 قازاقستان ازاماتىنىڭ ەلگە قايتارىلعانىن حابارلاعان. اتالعان حابارلامادا ەكى ەكى ازاماتتىڭ دەنە تەمپەراتۋرسى جوعارى بولعاندىقتان، ەمحاناعا جاتقىزىلعانى ايتىلعان.

«قازاقستاننىڭ 21 ازاماتى قحر-دان ەۆاكۋاتسيالاندى. قازاقستاننىڭ 20 ازاماتى گۋانچجوۋ جانە قۇلجا قالالارىندا بولدى. ولاردىڭ بارلىعى پانفيلوۆ اۋدانىندا ورنالاسقان «نۇر جولى» وتكىزۋ پۋنكتى ارقىلى شەكارادان ءوتتى. تەكسەرۋ كەزىندە تەپلوۆيزەر ەكى ازاماتتىڭ جوعارى تەمپەراتۋراسى (37,5) بارىن كورسەتتى. ولار پانفيلوۆ اۋدانىنىڭ واا جۇقپالى اۋرۋلار ءبولىمىنىڭ پالاتاسىنا وقشاۋلانىپ، اۋرۋحاناعا جاتقىزىلدى. دارىگەرلەر ولاردان زەرتحانالىق تالداۋلار الدى. سونىمەن قاتار، اۆتوبۋستان 19 ادام وبسەرۆاتسيالىق گوسپيتالعا ورنالاستىرىلدى»، – دەگەن ەدى وبلىس اكىمىنىڭ ءباسپاسوز قىزمەتى.

كەيىن الەۋمەتتىك جەلىلەردە الماتى وبلىسى، پانفيلوۆ اۋدانىندا كوروناۆيرۋس جۇقتىرعان ءبىر ادام انىقتالىپ، اۋىرۋحاناعا جاتىقىزىلىپتى دەگەن اقپارات تارادى.

ال كەشە ۇكىمەتى جانىنداعى ۆەدومستۆوارالىق كوميسسيانىڭ وتىرىسىندا قاۋىپتى ۆيرۋستىڭ تارالۋىنىڭ الدىن الۋ ءۇشىن بارقاتار شارالار قابىلدانعان بولاتىن:

1. 2020 جىلدىڭ 29 قاڭتارىنان باستاپ قازاقستان مەن قحر اراسىنداعى جولاۋشىلار تاسىمالدايتىن اۆتوبۋس قاتىناستارى،

2. 2020 جىلدىڭ 1 اقپانىنان باستاپ قازاقستان مەن قحر اراسىنداعى بارلىق جولاۋشىلار پويىزدارى،

3. 2020 جىلدىڭ 3 اقپانىنان باستاپ قازاقستان مەن قحر اراسىنداعى اۋە اسىمالدارى توقتاتىلادى.

4. قحر ازاماتتارىنا ۆيزا بەرۋ توقتالدى.

5. قحر دۋنگۋان قالاسىندا ءوتۋى ءتيىس حالىقارالىق تەننيس فەدەراتسياسى كۋبوگىنىڭ ىرىكتەۋ كەزەڭىن نۇر-سۇلتانعا اۋىستىرۋ تۋرالى ءوتىنىش قاناعاتتاندىرىلمادى.

Abai.kz