قازاقستان پرەزيدەنتى قاسىم-جومارت توقاەۆ «اقوردا» رەزيدەنتسياسىندا نۇر-سۇلتان قالاسىنا رەسمي ساپارمەن كەلگەن اقش-تىڭ مەملەكەتتىك حاتشىسى مايكل پومپەونى قابىلدادى.

مەملەكەت باسشىسى امەريكالىق ديپلوماتقا ءىلتيپات ءبىلدىرىپ، ەكى ەل اراسىندا ديپلوماتيالىق قارىم-قاتىناس ورناعان كەزدەن باستاپ ەكىجاقتى ىقپالداستىقتى دامىتۋدا مول تابىسقا قول جەتكىزىلگەنىن اتاپ ءوتتى.

– امەريكا قۇراما شتاتتارى – قازاقستاننىڭ تاۋەلسىزدىگىن العاشقىلاردىڭ ءبىرى بولىپ مويىنداعان ەل. ءبىز بۇل تاريحي فاكتىنى ۇنەمى ەسىمىزدە ۇستايمىز. مەملەكەتتەرىمىز اراسىندا كوپتەگەن باعىت بويىنشا، ونىڭ ىشىندە، يادرولىق قارۋدى تاراتپاۋ، حالىقارالىق تەرروريزممەن كۇرەس جانە ەكونوميكالىق ىنتىماقتاستىق سەكىلدى سالالاردا تىعىز قارىم-قاتىناس ورناعان. سونىمەن قاتار ءوزارا ىقپالداستىعىمىزدى ودان ءارى دامىتۋ ماقساتىندا پايدالانۋعا بولاتىن الەۋەتىمىز دە بار، – دەدى قازاقستان پرەزيدەنتى.

قاسىم-جومارت توقاەۆ نيۋ-يورك قالاسىندا وتكەن بۇۇ باس اسسامبلەياسىنىڭ 74-سەسسياسى كەزىندە اقش پرەزيدەنتى دونالد ترامپپەن كەزدەسكەنىن اتاپ ءوتىپ، امەريكا كوشباسشىسىنا ءوزىنىڭ سالەمىن جولدادى. سونداي-اق قازاقستان پرەزيدەنتى امەريكالىق ارىپتەسىمەن الەمنىڭ كەز كەلگەن جەرىندە كەزدەسۋگە دايىن ەكەنىن، دەگەنمەن، بۇل جۇزدەسۋدىڭ قازاقستاندا وتكەنىن ءجون سانايتىنىن ايتتى.

تاراپتار بارلىق باعىت بويىنشا، ونىڭ ىشىندە ساۋدا، ينۆەستيتسيا، IT-تەحنولوگيا، دەموكراتيالىق قۇندىلىقتاردى ىلگەرىلەتۋ جانە حالىقارالىق تەرروريزمگە قارسى ءىس-قيمىل سالالارىنداعى ەكىجاقتى بايلانىستاردى تەرەڭدەتۋدىڭ ماڭىزدىلىعىن اتاپ ءوتتى.

مەملەكەت باسشىسى قازاقستاندا اۋعانستان بويىنشا ارنايى وكىل لاۋازىمىن اشۋعا نيەتتى ەكەنىمىزدى ايتتى.

اقش-تىڭ سىرتقى ساياسي ۆەدومستۆوسىنىڭ باسشىسى قازاقستان پرەزيدەنتىنە قوناقجايلىق كورسەتكەنى ءۇشىن العىسىن ايتىپ، ەكى ەلدىڭ ەكونوميكا، حالىقارالىق بەيبىتشىلىك پەن تۇراقتىلىقتى ساقتاۋ باعىتتارىندا ءداستۇرلى ءارى سەنىمدى سەرىكتەستىك قالىپتاسقانىن جەتكىزدى.

– ءبىزدىڭ ەكونوميكالىق بايلانىستارىمىز وتە جاقسى. ەكى ەل اراسىندا تىكەلەي اۋە قاتىناسىن اشۋ مۇمكىندىگى قاراستىرىلۋدا. ەنەرگەتيكالىق باعىتتاعى ىنتىماقتاستىقتان بولەك، باسقا دا سالالارداعى بايلانىستاردى وركەندەتۋ ءۇشىن الەۋەتىمىز زور. پرەزيدەنت دونالد ترامپ سىزگە سالەم جولدادى. بۇگىن وسىندا وزىڭىزبەن كەزدەسكەنىمە قۋانىشتىمىن، – دەدى مايكل پومپەو.

امەريكالىق ديپلومات قازاقستاننىڭ «جۋسان» وپەراتسياسى اياسىندا تاياۋ شىعىستاعى قاقتىعىس ايماعىنان ءوز ازاماتتارىن قايتارىپ العانىن جوعارى باعالادى. ول ەلىمىزدىڭ اۋعانستاندا بەيبىتشىلىك ورناتۋعا، ونىڭ ەكونوميكاسى مەن ادامي الەۋەتىن كۇشەيتۋگە قوسقان ۇلەسىنە توقتالدى.

مايكل پومپەو ەلىمىزدە قولعا الىنعان ساياسي رەفورمالار جايىندا دا جىلى پىكىرىن ايتىپ، ونىڭ ىسكە اسۋىنا ساتتىلىك تىلەدى.

سونىمەن قاتار تاراپتار وڭىرلىك جانە جاھاندىق كۇن تارتىبىندەگى وزەكتى ماسەلەلەردى تالقىلادى. اقش-تىڭ مەملەكەتتىك حاتشىسى امەريكانىڭ ورتالىق ازياعا قاتىستى جاڭا ستراتەگياسىنىڭ نەگىزگى ەرەجەلەرى تۋرالى مالىمەت بەردى.

مەملەكەت باسشىسى س5+1 (ورتالىق ازياداعى بەس ەل + اقش) ديالوگى فورماتىنىڭ ماڭىزدى ەكەنىن اتاپ ءوتىپ، ونىڭ 3 اقپاندا تاشكەنتتە وتەتىن كەزەكتى وتىرىسىنىڭ تابىستى بولاتىنىنا سەنىم ءبىلدىردى.

قاسىم-جومارت توقاەۆ پەن مايكل پومپەو اۋە قاتىناستارى تۋرالى ۇكىمەتارالىق كەلىسىمگە قول قويىلعانىن قۇپتادى. اتالعان قۇجات «اشىق اسپان» قاعيداتتارىنا جاۋاپ بەرەدى، سونداي-اق، قازاقستان مەن اقش اراسىندا تۇراقتى ءارى تىكەلەي اۋە رەيسىن اشۋ ءۇشىن قۇقىقتىق نەگىز قالادى.

Abai.kz