اقش پەن تالىپتەر اراسىنداعى كەلىسىم اۋعانستاندا 18 جىلعا سوزىلعان سوعىسقا نۇكتە قويۋعا العاشقى قادام بولۋى ءتيىس. كەلىسىمگە اقش-تىڭ اۋعانستان بويىنشا ارنايى ۋاكىلى زالماي حاليلزاد پەن “تاليباننىڭ” ساياسي جەتەكشىسى ابدۋل عاني بارادار قول قويدى.

كەلىسىمگە قول قويۋ راسىمىنە اۋعانستان پرەزيدەنتى اشراف عاني، پەنتاگون باسشىسى مارك ەسپەر، اقش مەملەكەتتىك حاتشىسى مايك پومپەو، ناتو باس حاتشىسى يەنس ستولتەنبەرگ كۋاگەر بولدى. كەلىسىم 10 ناۋرىزدان باستاپ كۇشىنە ەنەدى دەپ جوسپارلانعان.

بۇل كەلىسىمدى اقش پەن تالىپتەر 2018 جىلدىڭ قازانىنان باستاعان ەدى.

قۇجاتقا ساي، اقش پەن ناتو 14 ايدا اۋعانستاندا جۇرگەن اسكەرىن الىپ كەتۋى ءتيىس. قازىر بۇل ەلدە 13 مىڭ امەريكالىق اسكەري بار. بۇدان بولەك، “تاليبان” مەن اۋعانستان تۇتقىن الماسىپ، تۇرمەدە وتىرعان 5000 ءتالىپ پەن مىڭعا جۋىق اۋعان اسكەري قاماۋدان بوساۋى ءتيىس. اقش “تاليبانعا” سالعان سانكتسيالارىن دا الۋى كەرەك.

اۋعان پرەزيدەنتى اشراف عاني دوحاداعى كەلىسىم اۋعانستاندا بەيبىتشىلىك ورناتادى دەپ ۇمىتتەنەدى. ال مايك پومپەو تالىپتەردى سوزىندە تۇرۋعا جانە ء“ال-كايدا” جانە دايش تەرروريستىك توبىمەن بايلانىستى دوعارۋعا شاقىردى.

تالىپتەردىڭ باسشىسى ابدۋل عاني بارادار كەلىسىمدى ساقتاۋعا ۋادە بەرىپ، اۋعانستاننىڭ يسلام قاعيدالارىمەن باسقارۋعا شاقىردى.

ۆاشينگتون مەن تالىپتەر 2019 جىلى قىركۇيەكتە كەلىسىمگە قول قويۋ كەرەك ەدى. بىراق كابۋلداعى تەراكتىدە امەريكالىق اسكەري قازا بولىپ، اقش پرەزيدەنتى دونالد ترامپ تالىپتەرمەن كەلىسىمگە قول قويۋدان باس تارتقان. بىرنەشە ايدان سوڭ پروتسەسس قايتا باستالدى.

2011 جىلى 11 قىركۇيەكتەگى تەراكتىدەن سوڭ اقش اۋعانستانعا اسكەر كىرگىزگەن. اقش سول كەزدە ء“ال-كايدا” تەرروريستىك توبىن قۇرتىپ، “تاليباندى" بيلىكتەن قۋدى ماقسات ەتكەن. قازىر تالىپتەر اۋعانستاننىڭ جارتى بولىگىن باقىلاۋىندا ۇستاپ وتىر. “تاليبان” باسقاراتىن ايماقتاردا شاريعات زاڭدارى جۇرەدى جانە ايەلدەردىڭ ءبىلىم الۋىنا، كوشەگە ءجيى شىعۋىنا تىيىم سالىنعان. كابۋلدا بولعان كوپتەگەن شابۋىلدى تالىپتەر ءوز موينىنا العان.

Abai.kz