جۋىردا قازاقستان پرەزيدەنتى قاسىم-جومارت توقاەۆتىڭ باستاماسىمەن قۇرىلعان قر ۇلتتىق قوعامدىق سەنىم كەڭەسىنە قاتىستى ءبىرلى-جارىم وزگەرىس بولدى. 

اقوردا اقپاراتىنا سۇيەنسەك، ۇلتتىق كەڭەس قۇرامىنان بىرقاتار ازاماتتار شىعارىلعان ەكەن. ال ولاردىڭ ورنىنا قوعامدىق پىكىر يەلەرى مەن جاڭا ساراپشىلار قوسىلعان.

سونىمەن، ۇلتتىق قوعامدىق كەڭەسىنىڭ قۇرامىنان: ەلۆيرا ازيموۆا، ارۋجان ساين، بولات پالىمبەتوۆ، ارمان شوراەۆ، باقىتجان بۇقارباي، ازاماتحان ءامىرتاي شىعارىلدى.

ەندى بۇل ۇيىم قۇرامىنا جاڭا ساراپشىلار قوسىلادى. ولاردىڭ قاتارىندا:  ءماجىلىس دەپۋتاتى، «قازاقستان ارداگەرلەرى» قاۋىمداستىعىنىڭ توراعاسى باقىتبەك سماعۇل، ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات باشيموۆ، قوعام قايراتكەرى، «مازمۇنداما» قوعامدىق بىرلەستىگىنىڭ توراعاسى شىڭعىس مۇقان بار.

سونداي-اق، جاڭا قۇرامعا: قازاقستاننىڭ ەنەرگەتيكالىق اسسوتسياتسياسىنىڭ باس ديرەكتورى ارمان قاشقىنبەكوۆ، قاراعاندى وبلىسىنداعى «تالبەسىك» كوپ بالالى انالار ۇيىمىنىڭ جەتەكشىسى، جۋرناليست لاززات قوجاحمەتوۆا، زاڭگەر، رەسپۋبليكالىق ەرىكتىلەر قوزعالىسىنىڭ ۇيلەستىرۋشىسى اينۇر سابيتوۆا كىرەدى.

ايتا كەتەيىك، ۇلتتىق قوعامدىق سەنىم كەڭەسى 2019 جىلدىڭ 12 ماۋسىمىندا قۇرىلدى. 12 ماۋسىم كۇنى پرەزيدەنت توقاەۆ ۇلتتىق قوعامدىق سەنىم كەڭەسىن قۇرۋ تۋرالى جارلىققا قول قويدى. بۇل تۋرالى رەسمي اقپارات 13 ماۋسىمدا جاريالاندى. وعان قوعامنىڭ ءارتۇرلى سالاسىندا جۇرگەن 40-قا جۋىق ادام مۇشە بولدى. وسى كۇنگە دەيىن ەكى مارتە كەڭەيتىلگەن جيىن وتكىزىپ، بىرنەشە زاڭ جوبالارى تالقىلاندى. سولاردىڭ كەيبىرى قازىر پارلامەنت تالقىسىنا بەرىلگەن.

ۇلتتىق قوعامدىق سەنىم كەڭەسى كۇنى بۇگىنگە دەيىن - بيلىك پەن حالىق اراسىنداعى التىن كوپىرگە اينالا بىلگەن قوعامدىق ينستيتۋتتىڭ ءبىر تارماعىنا اينالدى. ۇلتتىق كەڭەس تالقىسىنداعى جۇمىستار ەلدەگى دەموكراتيانى دامىتىپ، ەل-حالىقتىڭ بيلىككە دەگەن سەنىمىن نىعايتۋعا ۇلكەن ۇلەس قوساتىن ماڭىزدى جۇمىس بولدى. بۇل پرەزيدەنت قاسىم-جومارت توقاەۆتىڭ كەڭەس جۇمىسىنا بەرگەن باعاسى ەدى.

«ەڭ باستىسى ۇلتتىق قوعامدىق سەنىم كەڭەسى قوعام سەنىمىن اقتاي ءبىلدى. ول سىندارلى ديالوگ ارقىلى جاڭا ساياسي مادەنيەتتىڭ نەگىزىن قالىپتاستىرادى»، - دەگەن قاسىم-جومارت كەمەلۇلى.

مەملەكەت باسشىسى ءوز سوزىندە ۇلتتىق كەڭەس مۇشەلەرى مەن مەملەكەتتىك ورگان وكىلدەرىنىڭ بىرلەسكەن ديسكۋسسياسى قوعامداعى قوردالانىپ جاتقان بىرقاتار ماسەلەنى كۇن تارتىبىنە شىعارىپ، قوعامدىق، ەكونوميكالىق جانە ساياسي ماسەلەلەر بويىنشا جۇيەلى ءھام ۇزاقمەرزىمدى ستراتەگيالىق جوبالار ازىرلەۋگە العىشارتتار تۇزىلگەنىن ايتقان. بۇل دا ءوز كەزەگىندە مەملەكەت باسشىسىنىڭ «ءارتۇرلى كوزقاراس – ءبىر ۇلت» فورمۋلاسىنىڭ قوعامدىق ومىردە قولدانىسقا ەنگەنىن دالەلدەيدى.

ەل پرەزيدەنتى قلتتىق قوعامدىڭ سەنىم كەڭەسىنىڭ ەكىنشى جالپى وتىرىسىندا ۇقسك مۇشەلەرىنىڭ تالىقلاۋىنىڭ نەگىزىندە ساياسي-ەكونوميكالىق رەفورمالاردىڭ العاشقى بولىگى دايىندالعانىن سۇيىنشىلەپ ايتقان ەدى.

«دەموكراتيا - بيلىك ءۇشىن دە، حالىق ءۇشىن دە ءبولىنۋ مەن ىدىراۋعا ەمەس، ەلدىڭ دامۋىنا قىزمەت ەتۋى ءتيىس»، - دەگەن ەدى پرەزيدەنت.

بۇل دەگەنىڭىز - بيلىك پەن حالىقتىڭ سىندارلى ديالوگى كەز كەلگەن قيىندىقتى ەڭسەرۋگە قابىلەتتى بولماق دەگەن ءسوز. ال ول ءۇشىن تاپسىرماس پلاتفورما - ۇلتتىق قوعامدىق سەنىم كەڭەس بولىپ وتىر.

پرەزيدەنت باستاماسىمەن قۇرىلعان ۇلتتىق كەڭەسكە ەلىشىلىك ساراپشىلاردى ايتپاعاندا، حالىقارالىق ۇيىمدار تاراپىنان دا جوعارى باعا بەرىلگەن بولاتىن.

ۇلتتىق كەڭەستىڭ قۇرامىنا ءتۇرلى ساياسي پارتيالار مەن قوعامدىق بىرلەستىكتەردىڭ، ۇكىمەتتىك ەمەس ۇيىمدار مەن باق وكىلدەرى، بەلگىلى قوعام قايراتكەرلەرى، قۇقىق قورعاۋشىلار جانە جەتەكشى قازاقستاندىق ساراپشىلار كىرەدى. ۇلتتىق كەڭەستىڭ ءۇشىنشى وتىرىسى 2020 جىلدىڭ ءساۋىر ايىندا وتەدى دەپ جوسپارلانعان.

Abai.kz