قازاق حالقى ەجەلدەن قىزىن الپەشتەپ، اناسىن ارداقتاعان. سوداندا بولار ءجۇزىمىز جارقىن. ويىمىز اسقاق. حاديستەدە جۇماق انانىڭ اياعىنىڭ استىندا دەپ اسپەتتەلەدى. ورتامىزدا جۇرگەن سونداي اياۋلى انالاردىڭ ءبىرى، نەمەرە-شوبەرەلەردىڭ اجەسى، تاجىريبەلى ۇستاز، بىلىكتى ۇيىمداستىرۋشى، قارىمدى جۋرناليست  ساۋلە مەشىتبايقىزى ەكەنى داۋسىز. بۇكىل سانالى عۇمىرىن وقۋ اعارتۋ ىسىنە جۇمساپ، قازاق جاستارىن جانىنداي جاقسى كورىپ، شۇرايلى كۇندەرىنىڭ شۇعىلالى بولۋىنا، باعىت باعدارلارىن ايقىنداۋىنا بار كۇش قايراتىن جۇمساۋىنىڭ ءوزى ماقتاۋعا، ماقتانۋعا تۇرارلىق.

قازاق حالقى ەجەلدەن قىزىن الپەشتەپ، اناسىن ارداقتاعان. سوداندا بولار ءجۇزىمىز جارقىن. ويىمىز اسقاق. حاديستەدە جۇماق انانىڭ اياعىنىڭ استىندا دەپ اسپەتتەلەدى. ورتامىزدا جۇرگەن سونداي اياۋلى انالاردىڭ ءبىرى، نەمەرە-شوبەرەلەردىڭ اجەسى، تاجىريبەلى ۇستاز، بىلىكتى ۇيىمداستىرۋشى، قارىمدى جۋرناليست  ساۋلە مەشىتبايقىزى ەكەنى داۋسىز. بۇكىل سانالى عۇمىرىن وقۋ اعارتۋ ىسىنە جۇمساپ، قازاق جاستارىن جانىنداي جاقسى كورىپ، شۇرايلى كۇندەرىنىڭ شۇعىلالى بولۋىنا، باعىت باعدارلارىن ايقىنداۋىنا بار كۇش قايراتىن جۇمساۋىنىڭ ءوزى ماقتاۋعا، ماقتانۋعا تۇرارلىق.

تاۋەلسىز زاماننىڭ وزىندە ءتىلدىڭ كوركەيۋىنە تۇعىر بولا الماي، «تابانىنىڭ ءبۇرى جوقتار» تايعاناپ جاتقاندا قامىعاسىڭ. اشىناسىڭ. ءوز قولىڭدى ءوزىڭ كەسە المايسىڭ. باقاي ەسەپتىڭ «جەمتىگىنە» اينالعان كۇرەسكەرلەردى ايايسىڭ. سوندايدا   كەڭەس يدەولوگياسىنىڭ تار شەڭبەرىنەن شىعىپ، ءتىل جاناشىرى بولعان ابزال اعالارىمەن، زامانداستارىمەن تىزە ءتۇيىستىرىپ قازاق ءتىلىنىڭ كەلەشەگىنە الاڭداپ، ەر-ازاماتتاردىڭ قاتارىنان تابىلعان  ساۋلە مەشىتبايقىزىنىڭ ومىرلىك ۇستانىمىن ەرلىىكە بالاعىڭ كەلەدى.  ساۋلە اپايدىڭ  مەيىرىم توگىلگەن جۇزىنەن رۋحتانىپ، انالىق دارحان ماحابباتىنان كۇش الىپ قياعا سامعاعاندار قانشاما؟ قامىققاندى جۇباتقان، شارشاعاندى دەمەگەن كەزدەرىن سان تاراپتاعى شاكىرتتەرىمەن، ارىپتەستەرى تامىلجىتا جازىپ جاتىر. قۇتتىقتاۋ حاتتار لەگىندە شەك جوق.  وعان تومەندە وزدەرىڭىز كۋا بولاسىزدار.

زەينەتكەرلىككە شىقسا دا قول قۋسىرىپ وتىرماي، قازاق قوعامىنا، تاۋەلسىز ەلىنە، ارداقتى تىلىنە ۇلەس قوسۋدان تالماي كەلە جاتقان ساۋلە مەشىتبايقىزىن «Abai.kz» اقپاراتتىق پورتالىنىڭ  ۇجىمى عۇمىرىنىڭ باياندى بەلىنە كوتەرىلىپ، قۋانىشقا كەنەلگەن مەرەيلى جاسىمەن قۇتتىقتايدى. بالا-شاعاسىنىڭ ورتاسىندا، نەمەرە-شوبەرەسىنىڭ  قىزىعىن كورىپ، شاكىرتەرىنە قامقورشى انا بولىپ، ۇلتىمىزعا ادال قىزمەت جاسايتىن  الاش ازاماتتارىن تاربيەلەي بەرسىن دەگىمىز كەلەدى.

ەرتاي ايعاليۇلى. قايسار ساۋلە تاتەنىڭ ءۇش ەرلىگى

 

جۇبانوۆ مەكتەبىندەگى شايقاس

ساۋلە تاتەيمەن تانىسۋىمىز قىزىق تا، ەرەكشە ەدى. ول كىسىمەن مەن قوناقتا نەمەسە مامىراجاي ساتتەردە تانىسقان جوقپىن. جاقىنىراق ايتسام، مايدان الاڭىندا، قاداپ ايتسام، سوت ءۇيىنىڭ الدىندا تانىستىم. ءيا، سولاي، قاعىس وقىعان جوقسىز. سوتتىڭ جان الىپ، جان بەرەتىن الاڭىنا مەنى ەرتىپ بارىپ تانىستىرعان مارقۇم مۇحتار اعام ەدى. الىپ مۇحتار ابدىلدابەك اعاتايىمىز ەكەۋىمىز وعان دەيىندە قازاق مۇددەسى، ونىڭ جانى ءتىل مايدانىندا تالاي رەت قولداعى قارۋ قالاممەن شايقاسىپ جۇرگەن كەزىمىز بولاتىن. «سونىمەن ساۋلە مەشىتبايقىزى ەسىمدى مۇعالىم تاتەيىمىز سوتتا نەعىپ ءجۇر؟»دەگەن زاڭدى ساۋال قىلاڭ بەرەتىنى ءسوزسىز عوي.

احمەت جۇبانوۆ اتىنداعى قازاق ساز مەكتەبىن بىلەتىن بولارسىز. بىلمەسەڭىز بىلگەنىڭىز ءجون. وتكەن عاسىردىڭ الپىسىنشى جىلدارى دىنمۇحامبەت قوناەۆ وسى مەكتەپتى اشتى. بۇل مەكتەپتە اۋىلداعى ونەرلى، انگە، سازعا بەيىمى بار بالالاردى شام الىپ، ىزدەپ تاۋىپ وقىتۋعا ارنالعان ارناۋلى ساز مەكتەبى. العاشقى جىلدارى ديماش كوكەمىزدىڭ بۇل تاماشا ويى ول كىسىنىڭ تىكەلەي قامقورلىعىمەن جۇزەگە استى. بىراق كەيىن مەكتەپكە كوبىنەسە قالا بالالارى الىنا باستادى. مۇنىڭ باستى سەبەبى، مەكتەپكە ورىستاردىڭ، ورىسشىلاردىڭ كەلۋىنە بايلانىستى ەدى. مەكتەپتەن قازاق رۋحى، تاربيەسى، سالت-ءداستۇرى كەتە باستادى. تىپتەن قوبىزى، دومبىراسى شەتتەتىلدى. مىنە، وسى باسقىنشىلىققا ديرەكتوردىڭ ورىنباسارى ساۋلە تاتەي باستاعان توپ قارسى باس كوتەردى. مۇحتار شاحانوۆ ءتارىزدى ۇلت زيالىلارى دا رەسپۋبليكاداعى جالعىز قازاق ساز مەكتەبىنە جات ءۇننىڭ كەلۋىنە قارسى كۇرەستى. «لەنينشىل جاس» گازەتىندە دابىل قاعا شىققان وتكىر ماقالا قالىڭ ەلدى ءدۇر سىلكىندىردى. شايقاس باستالىپ، بۇعان جوعارى جاق ارالاستى. سول مايداننىڭ قىزۋ ورتاسىندا ساۋلە تاتەي ءجۇردى. ونىڭ اياعى ول كىسىنى، ونىڭ جاقتاستارىن قۋعىنداۋمەن شەكتەلدى. ايتىس-تارتىس، سوتتاسۋ باستالدى. مىنەكي مەن وسىنداي قيىندا تارتىستى كەزدە تاتەيمەن تانىستىم. قارسى جاق كوپ ەدى. ماسكەۋدىڭ وزىنەن ءنار العان ورىسشىلدار قازاقتىڭ قايسار قىزىن تۇقىرتىپ، ءوز دەگەندەرىنە جۇردىرگىسى، كوندىرگىسى كەلدى. ولارعا بۇل كىسى باس يمەدى. ارينە، باس يسە، ۇلتتىق مۇددەدەن باس تارتسا، ساۋلە تاتەيدە  جاقسى قىزمەت تە، كوپ اقشادا، مامىراجاي تىنىشتىق تا بولاتىن ەدى. بىراق ول ۇلتتىق مۇددە ءۇشىن ءارى قاراي شايقاسۋعا شەشتى. سوت ارينە، بىردە جەڭىستى بۇل كىسىگە، بىردە انالارعا بۇرىپ وتىردى. الما-كەزەك جەڭىس پەن جەڭىلىس ون شاقتى جىلعا سوزىلعان شايقاس پەن كۇرەس ساۋلە تاتەيدى ابدەن تيتىقتاتتى، دەنساۋلىعى ناشارلادى. تىپتەن كەيدە ەس-ءتۇسسىز حالدە اۋرۋحاناعا تۇسكەن كەزدەرى دە بولدى. تەكتىلىك، اتا-بابالارىنان كەلە جاتقان باتىرلىق، اللا تاعالا بەرگەن رۋح ونى ۇنەمى جەلەپ-جەبەپ، ءبىرجولا قۇلاتقان جوق. تار جول تايعاق كەشۋ جاۋلارىنىڭ اياۋسىز شابۋىلى مەن تۇرتپەكتەۋى ساۋلە تاتەيدى قۇرىشتان شىنىقتىردى.

ول كىسى ارينە، جالعىز ەمەس ەدى. ونىڭ ارتىندا قاراپايىم جاندار بار بولاتىن.اتا-انالاردىڭ ىشىندە ۇلتتىق رۋح ءۇشىن جانىن بەرەتىن ادامدار ساۋلە تاتەيدى ۇنەمى قولداپ وتىردى. ۇستازعا تاعى دا ءبىر شەكسىز كۇش، قايرات جانە قۋات بەرەتىن كوڭىلدەرى پاك، بولاشاعى زور، تالانتتى، كىشكەنتاي-كىشكەنتاي جاندار بار-تىن. ولار ونىڭ شاكىرتتەرى ەكەنىن ءبىلىپ وتىرعان بولارسىزدار. ۇلتتىق رۋحتىڭ داندەرى ەندى-ەندى كوكىرەكتەرىندە كوكتەپ كەلە جاتقان ولار ساۋلە اپايلارىنىڭ جان-جاعىنا شۋاق تاراتار وتتى سوزدەرىنەن ءنار الدى. ومىرلىك قاجەتىن الدى. ولار ورىسشىلداردىڭ سىزدى دا سالقىن، وزدەرىنە شەت تاربيەسىن قابىلداي المادى. بۇل كىشكەنتاي جانداردىڭ سانى ءبىرشاما ەدى. كەيىن ولار ساۋلە اپايدىڭ ناعىز ءتول پەرزەنتتەرىنە اينالدى. مىنەكي، وسى جاندار ساۋلە تاتەيگە ۇنەمى جىگەر بەرىپ، قاسىندا ءجۇردى.

تاۋەلسىزدىگىمىز كەلگەنمەن اتالمىش ساز مەكتەبىنە ۇلتتىق رۋحتىڭ بولماشى ساۋلەسى تۇسكەنمەن تولىقتاي ول يدەولوگيا كىرە المادى. اقيقاتىن ايتساق، ول رۋح كەلسە، قىزمەتىنەن شەتتەلەتىنىن بىلگەن ولار جانتالاسا كۇرەستى، جاندارىن اياماي كۇرەستى. ولاردىڭ بۇل ۇيىمشىلدىعى تالايلاردى سانسىراتتى. ال ساۋلە تاتەي قىزمەتىنەن ءبىر شىعىپ، ءبىر كىرسە دە كەۋدەسىن كوتەرىپ باتىل تۇردە سولاردىڭ اراسىندا ءجۇردى. «تاستا سول مەكتەبىڭدى. باسقا مەكتەپتەن جاقسى قىزمەت  تاۋىپ بەرەمىز» دەپ جانى اشىعانداردى ول كىسى بىردەن قايتارىپ تاستايتىن. «جوق! مەن وسى مەكتەبىمە قازاقىلىقتى كەلتىرمەي كەتپەيمىن» دەيتىن ول. «ءمۇيىز سۇرايمىن دەپ قۇلاقتان ايىرىلىپتى» دەگەندەي مەكتەپكە بيبىگۇل تولەگەنوۆا دەگەن ءبىر اۋىز قازاقشا بىلمەيتىن ديرەكتور كەلىپ، جاعداي ودان سايىن ۋشىقتى. اقشاعا قۇنىققان ول ءتىلىن عانا ساتپاي، ءدىنىن دە ساتتى. مەكتەپتى ءدىني سەكتالاردىڭ ورداسىنا اينالدىردى.

مىنە، وسى كەزدە مەن ساۋلە تاتەيمەن تانىستىم. ارينە، مەن مەكتەپتىڭ جاعدايىمەن بۇرىندا از-كەم تانىس ەدىم. تاتەيدىڭ ايتۋىمەن مەكتەپ ومىرىنە ەتەنە ەندىم. تانىستىم دا شوشىدىم. قۇيتاقانداي تالانتتى قازاق بالالارىنىڭ رۋحاني جاعدايىنا، بولاشاعىنا بالتا شابىلىپ جاتقانىن سەزىندىم. ولاردى قاسقىرلاردىڭ تالاۋىنا بەرىپ جاتقانىمىزدى، ەندى ولاردى قورعاماساق ەرتەڭ كەش قالاتىنىمىزدى ۇقتىم. ۇقتىم دا ءوزىم ىستەپ جۇرگەن «انا ءتىلى» گازەتىنە اششى ماقالا جازدىم. بۇل ماقالا تەك مەكتەپتىڭ ورىسى مەن ەۆرەيىنە، ورىس تىلدىلەرگە عانا ەمەس، وزگەدە قازاقتى جەك كورۋشىلەردىڭ شىمبايىنا قاتتى باتتى دا، بىزگە ءدۇر ەتىپ قارسى لاپ قويدى. «كاراۆان»، كتك ءتارىزدى گازەت پەن تەلەارنانى مىنبەر ەتىپ ءبىزدى قارالاۋعا تىرىستى، جانشىپ تاستاعىسى كەلدى. وسى كەزدە ساۋلە تاتەنىڭ، ونىڭ جاقتاستارىنىڭ، تىپتەن ون ەكىنشى سىنىپتا وقيتىن بالالارىنىڭ قايسارلىعىنا ءتانتى بولدىم.  قاسيەتتى ءتىلىمىزدىڭ وسى جەردە كەپيەتى بارىن ءبىلدىم. ءبىز گازەتىمىزدىڭ ءار نومىرىنەن جۇبانوۆ مەكتەبىندە بولىپ جاتقان وقيعالاردان حاباردار ەتىپ وتىردىق. قالىڭ ەل عانا ەمەس، بۇعان بيلىك تاراپىنان    دا زور نازار اۋدارىلدى. ارينە، سول كەزدە (2001 جىلى) بولعان قىم-قيعاش وقيعالاردى تالداپ جازساق ول بۇل ماقالاعا سىيمايتىنى انىق. ءبىز بۇگىن ايتايىن دەگەنىمىز قازاقتىڭ قاراپايىم ايەلى، اناسى ساۋلە تاتەيدىڭ وسىنداي قيىن-قىستاۋ شاقتا ەلى، ۇلتى ءۇشىن ناعىز باتىرلارشا شايقاسۋىن، شەكسىز قايسارلىق كورسەتۋىن، ەرلىگىن جەتكىزۋ ەدى. اقىرى جەڭدىك. ورىس ءتىلدى مەكتەپ ديرەكتورى جۇمىستان كەتتى. بىراق  مەكتەپ ءومىرى قالىپتى جاعدايعا تۇسكەنمەن ناعىز «قاسقىرلاردى» كەتىرە المادىق.  ول جاڭا كەلگەن ديرەكتور دا، الگىلەردە  ساۋلە تاتەيدى مەكتەپكە جاقىنداتپادى. قازاق ءتىلدى ديرەكتوردىڭ ءىشى دە ورىس جاندى بولىپ شىقتى. كۇرەس قايتا باستالدى...

 

بالالاردىڭ  اپاسى بولعان انا

«مۇنىڭ ارتىندا دا ءبىر قاينار بار» دەگەندەي مەن مەكتەپتەگى وسى جاعداي ارقىلى عاجايىپ اداممەن تانىستىم. ۇلكەن جۇرەكتى تاتەمدى تاپتىم. ءبىز ول كىسىنىڭ وتباسىمەن ارالاستىق. باۋىر بولدىق. تاتەمدى نەعۇرلىم جاقىن تانىعاننان كەيىن ول كىسىنىڭ ادامگەرشىلىگى، ىشكى يماني بولمىسى كۇندەي جارقىراي بەردى. ساۋلە تاتەيدىڭ ۇلتىن جانىنداي سۇيەتىن قاسيەتى، ادامداردى ماگنيتتەي وزىنە تارتا بىلەتىنى، ۇيىمداستىرۋشىلىق قابىلەتى، قايسار مىنەزى، سابىرلىلىعى  وزگەلەرگە دە ماعان دا ۇلگى-ونەگە بولدى. ساۋلە تاتەي ءبىراز جىل جۇمىسسىز بولىپ، ۇيدە وتىرىپ قالدى. جۇرەگى نازىك تاتەمىز بار اۋىرتپالىقتى ءوزى قابىلداعان سوڭ با قاتتى اۋىردى دا.  وسىنداي قيىن كەزەڭدە   ول كىسىنىڭ ساعى سىنعان جوق. ادامدار تىپتەن بالالار ول كىسىنىڭ ۇيىنە ىزدەپ باراتىن. ءبىر عاجايىبى قىرىق جىل ۇستازدىق ەتكەن ساۋلە تاتەيدىڭ ءوزىنىڭ ءتورت بوتاقانىنىڭ سىرتىندا ونداعان سۇيكىمدى بالالارى دا بار ەدى. ولار تالانتتى دا تاتەنىڭ وزىندەي ۇلكەن جۇرەكتى ازاماتتار بولاتىن. اۋىلدان كەلگەن، قورعانىشى جوق بالالار اپايلارىنىڭ بويىنان انالىق مەيىرىمدى تاپتى. ولار اپايلارىن اناسىنداي كوردى. اپايلارىنىڭ باسىنا بۇلت ۇيىرىلگەندە قايسار جۇرەكتى ول بالالارى ونىڭ قاسىندا قاسقايىپ تۇردى. مەن ونىڭ ءتىرى كۋاسىمىن. قازىر ول بالالاردىڭ بارلىعى دا ءومىر-ونەر الەمىندە جۇلدىز بولىپ جانىپ تۇر!

 

الىپ كومپانياعا قان جۇگىرتكەن

قانشا اۋىرسا دا جاۋلارى ونى قانشا تۇقىرتقىسى كەلسە دە ساۋلە تاتەي ۇنەمى ءوستى، شىڭدالدى.، بيىككە ورمەلەدى. مىنە، سونىڭ ءبىر ايعاعى «قازاقتەلەكوم» كومپانياسىندا ىستەگەن كەزدەرىندە جارقىراپ كورىندى. بۇل جەردە دە  ساۋلە تاتە ەرەكشە قىرىمەن، ۇيىمداستىرۋشىلىعىمەن جارق ەتتى. شىنىن ايتقاندا اۋزىن ايعا بىلەگەن «قازاقتەلەكوم» سياقتى الىپ كومپانيالار تۇگىلى مەملەكەتتىك مەكەمەلەردە دە وسى كۇنگە دەيىن مەملەكەتتىك ءتىلدىڭ جاعدايى ءماز ەمەس ەكەنىن جاقسى بىلەمىز. مىنە، وسىنداي الىپ كومپانياعا  كەلگەن تاتەمىز مەملەكەتتىك ءتىلدىڭ قولدانىلۋ اياسىن كەڭەيتۋدە ۇلان-اسىر ەڭبەك ەتتى، تەر توكتى. تاتەيىمىزدىڭ ەكىنشى ارنالى تىنىسى اشىلدى. رەسپۋبليكامىزدىڭ تۇكپىر-تۇكپىرىندەگى الىس بايلانىس نۇكتەلەرىنە ەرىنبەي بارىپ قازاق ءتىلىنىڭ شىراعىن جاعىپ كەتەتىن. وسىنداي تىنىمىسىزدىعى، ءبىلىمى مەن بىلىگى، ادامدارمەن جىلى قارىم-قاتىناسى كومپانيادا ەرەكشە ءرول اتقاردى. «قازاقتەلەكوم» كومپانياسى مەملەكەتتىك ءتىلدى قولدانۋ جونىنەن رەسپۋبليكا بويىنشا ۇلگى ەتەرلىك ورداعا اينالدى. بۇل ساۋلە تاتەيدىڭ مەن بىلەتىن ەكىنشى ەرلىگى ەدى.

جۇرەكتە بۇققان تالانت

ءتورتىنشى بيلىك اتانعان قاسيەتتى جۋرناليستيكا الەمنىڭ تابالدىرىعىنا كەلگەن ادام اتتاي المايدى. ونىڭ قازانىندا قايناعان تالانتتىلار عانا وسى الەمدە ءومىر سۇرەدى، قالامىمەن ەلدى وزىنە قاراتادى. «قازاقتەلەكوم» كومپانياسىنان زەينەت دەمالىسىنا شىققان ساۋلە  تاتەيدىڭ اياعىن جەرگە تيگىزبەستەن «قازاقستان-Zaman» گازەتىنە قىزمەتكە الدىق.  جاس تا بولسا الىستان كورە بىلەتىن، كادر تاني بىلەتىن ءبىزدىڭ باس ديرەكتورىمىز، ءباhادۇر جىگىت احمەت الياز ول كىسىنى ءوزىنىڭ ءبىرىنشى ورىنباسارلىعىنا تاڭدادى. سونداي-اق استانا شاhارىنداعى شتابىمىزدىڭ باستىعى ەتتى. كوپ ادامدار بۇعان كۇمانمەن قارادى. بىراق ساۋلە تاتەيىمىز  بۇل جەردەن دە جارقىرىپ جول تاپتى. ۇيىمداستىرۋشىلىق قابىلەتىن بۇلاي قويعاندا ول كىسىنىڭ ىشتە بۇعىپ جاتقان قالامگەرلىك، جۋرناليستىك تالانتى وتكىر ماقالالارى گازەت بەتتەرىندە شىعا باستادى. مەنىڭشە بۇل تاتەمىزدىڭ ءۇشىنشى ەرلىگى دەر ەدىم. «ءتىپا-ءتىپا» ءتىل-كوزدەن ساقتاسىن! ۇلتىمىزدىڭ اناسى ساۋلە مەشىتبايقىزى تاتەمىز الپىس پەن جەتپىستىڭ ءدال ورتاسىندا وتىر بۇگىن. ءبىر اللادان تاتەمىزگە ۇزاق عۇمىر، زور دەنساۋلىق جانە شىعارماشىلىق تابىس تىلەيمىن.

قر پارلامەنتى سەناتىنىڭ دەپۋتاتى اcحات ءساپيۇلى كۇزەكوۆ:

«ابىرويى ازاماتتاردان اسىپ تۇسەتىن جان»

ساۋلە اپايمەن اپاي مەن ءىنى رەتىندە دوستىق قارىم-قاتىناستى ماعان اللا تاعالانىڭ بەرگەن باعى دەپ بىلەمىن. بۇنداي ادامدار اسپانداعى ساۋلەسىن شاشىپ تۇراتىن كۇن سياقتى. جاقسىنىڭ جاقسىلىعىن ايت، نۇرى تاسىسىن دەگەندەي، ەڭ بىرىنشىدەن، ساۋلە اپامىزدىڭ بويىنداعى يماندىلىعىن ايتقىم كەلەدى. ول اپامىزدىڭ كىشىپەيىلدىلىگى، مەيىرىمدىلىگى، ادالدىعى. اينالاسىنداعى بارلىق ادامداردى كەڭ جۇرەگىمەن انا  رەتىندە قابىلداپ، بارلىعىنا جاناشىر بولۋى.

ەكىنشىدەن، اپامىزدىڭ بويىنداعى ۇلتىمىزدىڭ تەكتىلىگىن ايتقىم كەلەدى. قازاقتىڭ باتىر، ۇلتشىل قىزدارىنىڭ قاسيەتىن ىزدەسەڭىزدەر، ساۋلە اپامىزدىڭ بويىنان تاباسىزدار. اپامىز ۇلتىن جان-تانىمەن سۇيەدى، سوندىقتان ارقاشان حالقىنا ادال ەڭبەك ەتەدى. ۇشىنشىدەن، اپامىزدىڭ انا تىلىنە دەگەن ماحابباتى ەرەكشە. ال، ول ۇزاق اڭگىمە. ساۋلە اپاي «قازاقتەلەكوم» اق 2003 جىلى كەلدى. سول كەزدە بوساعاسىنان اتتاي الماي تۇرعان انا ءتىلىمىزدىڭ تۋىن وسى كومپانيانىڭ تورىنە قادادى.  قازاق ءتىلىن جۇرەگىمەن سۇيەتىن اپامىز بولعاندىقتان عانا قازىرگى ۋاقىتتا كومپانيادا مەملەكەتتىك ءتىل قادىرلەنەتىن دارەجەگە جەتىپ وتىر. ىستىعىنا كۇيىپ، سۋىعىنا توڭىپ ءجۇرىپ، قازاق ءتىلىن مەملەكەتتىك ءتىل رەتىندە قابىلداعىسى كەلمەگەن وزگە ۇلت وكىلدەرىنە ۇلت ەكەنىمىزدى ۇقتىرىپ، ءبىزدىڭ ءتىلىمىزدى مويىنداتتى.  فيليال بولىپ، اۋدان بولىپ، ورىس بولىپ، قازاق بولىپ قىزمەتكەرلەر تىلگە باس يە باستادى. بۇنى ءسوز جۇزىندە ەمەس، ماڭداي تەر، تابان ەتىمەن ىسكە اسىردى. ەشكىمنەن جاسقانباي، وسى يگى ءىستىڭ تىزگىنىن ءوز قولىنا الىپ، بۇكىل ەلدىڭ تۇپكىر-تۇپكىرىن ارالاپ ءجۇرىپ، ءار قىزمەتكەردىڭ كوكىرەگىندە تىلگە دەگەن سەزىمىن وياتتى. اپامىز «قازاقتەلەكوم» اكتسيونەرلىك قوعامىندا قىزمەت ىستەگەن جىلدارىندا قازاق ءتىلىن، قازاق ۇلتىن كەمسىتەتىن ىستەرگە، سوزدەرگە ءتوزىپ تۇرا المايتىن. جىگەرلى سوزىمەن قازاقتىڭ  رۋحىن، نامىسىن وياتىپ جۇرەتىن. حالىق الدىندا دارياداي تاسىپ-تولقىپ سويلەگەنىن تىڭداۋدىڭ ءوزى ءبىر عانيبەت ەدى. سول كەزدەر ءالى ەسىمدە، اينالاسىنا ەرەكشە ساۋلەسىن شاشىپ تۇراتىن. ديرەكتور دا، قاراپايىم ينجەنەر دە، مەحانيك تە ساۋلە اپايدىڭ ءار ءسوزىن ءسۇيىپ تىڭدايتىن، ساعىنىپ كۇتەتىن. ءار ادامنىڭ جانىن ءتۇسىنىپ، ءار قىزمەتكەردى، ءتىپتى ەشكىم بىلمەيتىن ءبىر تۇپكىردەگى قاراپايىم مونتەردىڭ وتباسىنداعى قيىندىقتارىن ويلاپ، تەلەفون سوعىپ قورعاشتاپ، ماسەلەلەرىن شەشىپ جۇرەتىن. قۇدايعا شۇكىر، قازىر ءار فيليالدا ءوزى تاربيەلەگەن قىزدارى بار، ءبىز ولاردى ساۋلە اپايدىڭ قىزدارى دەپ ءۇمىت ارتامىز.

قۇرمەتتى ساۋلە اپاي، بۇگىن ءبىر مەجەلى مەرەيتويىڭىزعا دا كەلىپ قالىپسىز. ءسىزدى وسى تاماشا تويىڭىز كۇنى شىن جۇرەكتەن قۇتتىقتاپ سىزگە دەگەن سۇيىسپەنشىلىگىمدى جەتكىزگىم كەلەدى. قازىر ءسىز حالىقتىڭ ءۇمىتى مەن اماناتى دەگەن اۋىر جۇكتى ۇلكەن ابىرويمەن ارقالاپ ءجۇرسىز. ەل يگىلىگىنە ارنالعان قىزمەتىڭىزدە ۇلت مەرەيىن ءوسىرىپ، الاشتىڭ رۋحىن اسقاقتاتىپ ءالى دە تالاي اسۋلاردى باعىندىراتىنىڭىزعا نىق سەنەمىن.

 

قوستاناي وبلىستىق تەلەكوممۋنيكاتسيالار ديرەكتسياسىنىڭ باس ديرەكتورى قاجىمۇرات تەمىرحانوۆ:

-  مەنىڭ اسا قۇرمەتتى ارىپتەسىم ساۋلە مەشىتبايقىزىنىڭ مەرەيتويىنا بايلانىستى ءوزىمنىڭ ەڭ شىنايى قۇتتىقتاۋىمدى جەتكىزگىم كەلەدى. 2003 جىلدارى قازاقتەلەكومدا مەملەكەتتىك ءتىلدى ەنگىزۋ جۇمىستارى باستالعان كەزدە ساۋلە اپايمەن بىرلەسىپ وسى سالادا ءبىراز ءىس اتقاردىق. ءتىل مايدانىندا يگى باستامالاردىڭ باسىندا بولدىق. ول كەزدە وسى باعىتتا ەشقانداي تاجىريبە بولماعان، تىڭ يگەرگەن كەز دەۋگە بولادى. ساۋلە اپاي قازاقتەلەكومدا ءىس قاعازدارىنا مەملەكەتتىك ءتىلدى ەنگىزۋ باعدارلاماسىن ازىرلەپ، وسى ءىستىڭ نەگىزىن قالاعان جانداردىڭ ءبىرى. ورتالىق اپپاراتتىڭ جاساعان جوبالارىنىڭ كوبى سول كەزدە استاناتەلەكومنىڭ بازاسىندا ءىس جۇزىندە جۇزەگە اسىرىلاتىن. سوندىقتان ساۋلە اپايمەن قويان قولتىق جۇمىس ىستەدىك. ءبىزدىڭ ارىپتەستىگىمىزدى شىعارماشىلىق تاندەم دەپ اتاۋعا بولادى. بىرلەسىپ ىستەگەن جۇمىستىڭ ناتيجەسىندە كوپتەگەن كەرەمەت دۇنيەلەر پايدا بولدى. قازاقتەلەكومنىڭ ءىس جۇرگىزۋشىلەرىنىڭ العاشقى سەمينارلارى، بايقاۋلارى... ساۋلە مەشىتبايقىزى ءوزىنىڭ يدەيالارىمەن، ءوزىنىڭ تىلگە دەگەن سۇيىسپەنشىلىگىمەن ءبىزدى قاناتتاندىراتىن. ساۋلە اپاي - ناعىز ءتىل جاناشىرى. بىرگە ارىپتەس بولىپ قىزمەت اتقارعان ۋاقىتتا ول كىسىدەن رۋحاني، يماندىلىق جاعىنان ءتالىم-تاربيە الدىق دەسەك ارتىق بولماس. سوندىقتان دارىندى پەداگوگ، تەرەڭ ويلاپ سويلەيتىن وسى ءبىر جاننىڭ كەيىننەن تۋعان باۋىرىنداي بولىپ كەتتىم. بۇگىنگى كۇنى دە جاڭالىققا قۇشتار، پاراساتتى اپامىز شىعارماشىلىق جولىندا قىزمەت ەتىپ جۇرگەنىن كورىپ شىن جۇرەكتەن قۋانامىن، ماقتانامىن! اسا مەيىرىمدى، شىنشىل مىنەزدى، جۇرەگى باتىر، جانى جومارت، پەيىلى دارقان، ويى وتكىر ساۋلە اپاي! ءسىزدى مەرەيتويىڭىزبەن قۇتتىقتاي وتىرىپ، زور دەنساۋلىق، ۇزاق عۇمىر، جاڭا شىعارماشىلىق تابىستار، وتباسىڭىزعا اماندىق تىلەيمىن!

 

ايگۇل ەسەناليەۆا، قوستاناي وتد مەملەكەتتىك ءتىلدى ەنگىزۋ جونىندەگى مامانى:

-  ۇستاز دەگەن ەسىمدى ەستىگەندە، جانىڭ گۇلدەي قۇلپىرا كەتەدى.وسىنداي ۇلاعاتتى، كەمەڭگەر، اسىل جانداردى جاراتقان اللا تاعالامىزعا شۇكىرلىك ەتەمىز. بۇرىنعى زاماندا مۇسىلمان الەمىندە ۇستازعا دەگەن سىي-قۇرمەت جوعارى بولعان ەكەن. ويتكەنى بىلگەنىن باسقالارعا ۇيرەتۋ، ادامگەرشىلىك پەن يماندىلىققا باۋلۋ - ەڭ ساۋاپتى ىستەردىڭ ءبىرى. وقۋ، ءبىلىم، ادامگەرشىلىك، ادەپ، تاربيە - ءبارىن ۇستازدان ۇيرەنگەن شاكىرت ۇستازدى ءوز اتا-اناسىنان كەم قادىرلەمەگەن. ءتىپتى ۇستازدى قاتتى قۇرمەتتەگەنى سونشا - ەسىگىن قاعۋدىڭ ءوزىن ادەپسىزدىككە بالاپ، سىرتتا تۇرىپ، شىققانىن كۇتكەن ەكەن. بۇگىنگى كۇنى ءدال وسىنداي سەزىمىمدى مەنىڭ قازاقتەلەكومداعى ەڭ العاشقى ۇستازىما ساۋلە مەشىتبايقىزىنا جەتكىزگىم كەلەدى.

اقىل-وي، كۇش-قايراتىڭىز سارقىلماسىن، شىعارماشىلىقتىڭ بيىگىندە سامعاي بەرىڭىز، سامعاي بەرىڭىز! ۇلاعاتتى سوزدەرىڭىزدى ءسۇيىپ وقىپ، ءسۇيسىنىپ ۇعاتىن، ءسوز قادىرىن بىلەتىن قاسيەتتى حالقىڭىز امان بولسىن.

ەرنار مىڭتاەۆ، ۇلى. مەملەكەتتىك عازيزا جۇبانوۆا اتىنداعى شەكتى اسپاپتار كۆارتەتىنىڭ جەتەكشىسى «دارىن» جاستار سىيلىعىنىڭ لاۋرەاتى، ەرەن ەڭبەگى وردەنىنىڭ يەگەرى، بىرنەشە دۇركىن حالىقارالىق كونكۋرستىڭ جەڭىمپازى

مەن انام ارقىلى قازاعىمدى تانىدىم

- انامنىڭ وجەتتىلىگىنە، تاباندىلىعىنا قايران قالامىن. ەس جيىپ، ات جالىن تارتقالى قىزۋ ەڭبەك ۇستىندە كەلەدى. ءبىر ساتكە ۇلت مۇددەسىن ەسىنەن شىعارعان ەمەس. مەن انامنىڭ "ۇلتىم" ءۇشىن دەپ قايراۋعا سالعان وتتى ءسوزىن وزىمە قاراتىپ ايتقان ءسوز دەپ باعالايمىن. ويتكەنى، انامنىڭ ەل مۇددەسى ءۇشىن ەتكەن ەڭبەگى - ماعان بەرگەن تاربيەسى. مەن انام ارقىلى قازاقتىڭ بوياماسىز ءومىرىن، نامىسىن، ار-وجدانىن تاني الدىم. بۇل دا، اسىرەسە، اق جاۋلىقتىلار قاتارىنان كورىنە بەرمەيتىن اسا دارىندىلىق، اسقان شەبەرلىك!

باستاعان جۇمىسىنا كىرىسىپ كەتكەندە اقىرىنا جەتكەنشە تىنبايتىن قاجىرلىعى قانداي دەسەڭىزشى! ويلاپ وتىرسام ءمۇنىڭ ءبارى جۇيكەگە سوقتىعىپ وتەدى ەكەن-اۋ. دەگەنمەن، ول كىسى مۇنداي كەدەرگىلەردى كەسىپ ءوتىپ، ىشىندەگىنى سىرتىنا بىلدىرمەي جۇرە الاتىن جان. انام قاي جەردە قىزمەتتە بولسا دا ابىرويى اسقاق. ونى ارىپتەستەرى مەن زامانداستارى ءاردايىم ماقتانىش ەتكەنىن كوزىم كورىپ كەلەدى. مەنىڭ بۇگىنگى جەتىستىكتەرگە جەتۋىمە دە انامنىڭ سىڭىرگەن ەڭبەگى زور. ول كىسى بولماعاندا مۇنداي بيىكتەردى باعىندىرۋىم مۇمكىن بە ەدى.

مەن انامدى دارىندى باسشى، تالانتتى ۇيىمداستىرۋشى، كورەگەن پسيحولوگ دەسەم ارتىق ايتقاندىق بولماس. بويىمداعى تامشىداي تالانتتىڭ كوزىن اشىپ قاتارعا قوسقانى سونىڭ ايعاعى. احمەت جۇبانوۆ اتىنداعى مۋزىكا مەكتەبىندە قانشاما دارىندى جاستاردى جەتەلەپ ءجۇردى. ولاردىڭ كوبى بۇگىندە ەلگە تانىمال ازاماتتار. ال مەنىڭ جەكە باسىمنىڭ جەتىستىكتەرى - انامنىڭ ەلىمىز ءۇشىن توككەن ءتىرىنىڭ ءبىر تامشىسى عانا. "بولاشاق" باعدارلاماسىمەن شەت ەلدىڭ وزىق وقۋ ورنىندا ءتالىم الۋىم دا - ۇيدەگى ۇستازىمنىڭ اسقان ەڭبەگىنىڭ جەمىسى. بالا كۇنىمنەن قيعاش قىلىقتارىمدى كورگەن انام: "قيىس كەتسەڭ دە - قيسىق كەتپە، تەنتەك كەتسەڭ دە - تەرىس كەتپە" دەپ وتىراتىن. ال كەيىن ونەرىمە ءتانتى بولعان ساتتە "ەر بول، ەر بولساڭ ەلىڭە تۇتقا بول" دەگەن باتاسىن ايتۋدان جالىققان ەمەس. 

ۇلان قىدىرباي, «قازاقتەلەكوم اق-نىڭ» - ۇيىمداستىرۋ باقىلاۋ دەپارتامەنتىنىڭ مەنەدجەرى

- ساۋلە اپاي ءتىل ماسەلەسىنە سوناۋ كەڭەستەر وداعى كەزىندە شونا سماحانۇلى، مۇحتار شاحانوۆ قاتارلى ەلگە تانىمال ازاماتتارمەن بىرگە بەل شەشە كىرىستى. ءالى كۇنگە سول بيىگىنەن تۇسكەن جوق. سول داۋىردەگى انا تىلىمىزدەگى مەكتەپتەردى اشۋ ءۇشىن تەر توككەن جانداردىڭ ءبىرى رەتىندە ساۋلە مەشىتبايقىزىنىڭ الاتىن ورنى ەرەكشە. كەز كەلگەن جۇمىستى شەبەر ۇيىمداستىرۋشى، حالىق اعارتۋ ىسىنە مول تەر توككەن ۇستاز، ۇزاق جىلدار رەسپۋبليكالىق دەڭگەيدەگى مەكتەپتەردە ديرەكتوردىڭ وقۋ ءىسى جونىندەگى ورىنباسارى، باسشى قىزمەتتەرىن ابىرويمەن اتقاردى.

ساۋلە مەشىتبايقىزىنىڭ انا تىلىمىزگە دەگەن جاناشىرلىعىن مىنا سوزدەرىنەن اڭعارۋعا بولادى: «مەن مەملەكەتتىك ءتىل ماسەلەسىنە كەلگەندە شارشامايمىن، ول مەنىڭ تىكەلەي جۇمىسىم، ازاماتتىق بورىشىم دەپ تۇسىنەم. كەيدە سامولەتپەن، كەيدە پويىزبەن، ەندى بىردە ماشينامەن رەسپۋبليكامىزدىڭ الىس اۋداندارىنا دەيىن  ساپارعا شىعامىن. قاسيەتتى انا ءتىلىمدى وركەندەتۋگە ەش ايانبايمىن. ول ءۇشىن ەلدى جاياۋ ارالاۋعا بارمىن. شىنىم-وسى».

وتەۋوۆ  مۇحتار  جاماشۇلى،

قازاقستاننىڭ ەڭبەك سىڭىرگەن ءارتىسى، قۇرمانعازى  اتىنداعى قازاق ۇلتتىق كونسەرۆاتورياسىنىڭ پروفەسسورى. حالىقارالىق اقپاراتتاندىرۋ اكادەمياسىنىڭ اكادەميگى، جامبىل اتىنداعى قازاق

مەملەكەتتىك  فيلارمونياسىنىڭ  ديرەكتورى، (جۇبانوۆ مەكتەبىنىڭ العاشقى تۇلەگى):

- ونەر  جولىندا جۇرگەندە تالاي ادامدارمەن  ارالاستىم.  ال، ەندى  ساۋلە مەشىتبايقىزىمەن كەزىندە، احمەت جۇبانوۆ مەكتەبىندە ارىپتەس، قىزمەتتەس بولدىم. (قوسىمشا سوۆمەستيتەل). ءسوزىمدى باستاماس بۇرىن مىنانى ايتقىم كەلەدى. قازىر «باتىر» كوبەيگەن تاۋەلسىز ەلدە تىرشىلىك كەشىپ جاتىرمىز. بولماعاندى بولعانداي قىلىپ، تورگە ۇمتىلىپ، ءوزىن جارنامالاپ قالايدا كوزگە ءتۇسىپ قالۋعا تىرىسىپ جاتقاندار قانشاما. ساۋلە اپايدىڭ ولاردان ەرەكشەلىگى ونداي قادامدارعا بارماۋىندا جاتىر. ايتپەسە ءتىل ءۇشىن نە كورمەدى ول كىسى. ون جىل بويى دەنساۋلىعىنان ايىرىلىپ جۇمىسسىز ءجۇردى. العان بەتىنەن قايتپاي، اقىرى ءوزىنىڭ ءىسىنىڭ اقتىعىن دالەلدەپ شىقتى.  جۇبانوۆ مەكتەبىندە انا ءتىلىنىڭ قامىن جەپ قۋعىنعا ءتۇسىپ قامىققان كەزى كوز الدىمنان كەتپەيدى. ءجيى بارىپ تۇراتىنمىن. ويتكەنى ول كىسى رۋحاني جالعىزسىراپ جۇرگەن بولاتىن. كەيىن عوي جاعدايدان حاباردار بولعان قازاقتىڭ مارعاسقا ۇلدارىنىڭ دەمەپ، قولداعاندارى. ويتكەنى بۇل وقيعا سول كەزدەگى باق -نا كۇندە شىعىپ تۇردى. كەيىن مەنىدە ساۋلە مەشىتباەۆامەن ارالاساسىڭ دەپ «ايىپتادى». «ارالاسپا»  دەگەن تالاپ قويدى. مەن بۇعان شىداي الماي جۇمىستان ءوز ەركىممەن كەتتىم. ول ەرلىگىمە بۇگىندە ماقتانامىن. ەر مىنەزدى، ۇلتجاندى، ءتىل مايدانىندا سارا جولى بار ساۋلە، سوناۋ ءبىر  كەڭەستىك زاماننىڭ وزىندە مۋزىكا مەكتەبىنىڭ ىشىندە «اباي اپتالىقتارىن» ۇيىمداستىرىپ، قازاق ءتىلىنىڭ  جاي-كۇيىنە الاڭداپ ءجۇرۋشى ەدى.

وسىندايدا ءتىل ۇشىنا "جاقسىدان شاراپات" دەگەن ءسوز ورالادى. الپىستىڭ اسقارىنا شىققان سەكەڭە، نەمەرە شوبەرەڭنىڭ قىزىعىن كورىپ، شاكىرتتەرىڭنىڭ ورتاسىندا مارقايىپ، تىنىمسىز ادال ەڭبەكتىڭ ماۋەلى جەمىسىن جەۋىنە تىلەكتەس ەكەنىمدى بىلدىرگىم كەلەدى.

قوستاناي وبلىستىق تەلەكوممۋنيكاتسيالار ديرەكتسياسىنىڭ باس ديرەكتورى قاجىمۇرات تەمىرحانوۆ

مەنىڭ اسا قۇرمەتتى ارىپتەسىم ساۋلە مەشىتبايقىزىنىڭ مەرەيتويىنا بايلانىستى ءوزىمنىڭ ەڭ شىنايى قۇتتىقتاۋىم مەن ەڭ يگى تىلەگىمدى جەتكىزگىم كەلەدى. 2003 جىلدارى قازاقتەلەكومدا مەملەكەتتىك ءتىلدى ەنگىزۋ جۇمىستارى باستالعان كەزدە ساۋلە اپايمەن بىرلەسىپ وسى سالادا ءبىراز ءىس اتقارعانىمىزدى ماقتان تۇتامىن. ءتىل مايدانىندا يگى باستامالاردىڭ باسىندا بولدىق. ول كەزدە وسى باعىتتا ەشقانداي تاجىريبە بولماعان، تىڭ يگەرگەن كەز دەۋگە بولادى. ساۋلە اپاي قازاقتەلەكومدا ءىس قاعازدارىنا مەملەكەتتىك ءتىلدى ەنگىزۋ باعدارلاماسىن ازىرلەپ، وسى ءىستىڭ نەگىزىن قالاعانداردىڭ ءبىرى. ورتالىق اپپاراتتىڭ جاساعان جوبالارىنىڭ كوبى سول كەزدە استاناتەلەكومنىڭ بازاسىندا ءىس جۇزىندە جۇزەگە اسىرىلاتىن. سوندىقتان ساۋلە اپايمەن قويان قولتىق جۇمىس ىستەدىك. ءبىزدىڭ ارىپتەستىگىمىزدى شىعارماشىلىق تاندەم دەپ اتاۋعا بولادى. بىرلەسىپ ىستەگەن جۇمىستىڭ ناتيجەسىندە كوپتەگەن كەرەمەت دۇنيەلەر پايدا بولدى. قازاقتەلەكومنىڭ ءىس جۇرگىزۋشىلەرىنىڭ ەڭ ءبىرىنشى سەمينارلارى، ەڭ ءبىرىنشى كونكۋرستارى... ساۋلە مەشىتبايقىزى ءوزىنىڭ يدەيالارىمەن، ءوزىنىڭ تىلگە دەگەن ۇلكەن سۇيىسپەنشىلىگىمەن ءبىزدى قاناتتاندىراتىن. ساۋلە اپاي - ناعىز ءتىل جاناشىرى. بىرگە ارىپتەس بولىپ قىزمەت اتقارعان ۋاقىتتا ول كىسىدەن رۋحاني، يماندىلىق جاعىنان ءتالىم-تاربيە الدىق دەسەك ارتىق بولماس. سوندىقتان دارىندى پەداگوگ، تەرەڭ ويلاپ سويلەيتىن وسى ءبىر جاننىڭ كەيىننەن ءبىر تۋعان باۋىرىنداي بولىپ كەتتىم. بۇگىنگى كۇنى دە جاڭالىققا قۇشتار، پاراساتتى اپامىز شىعارماشىلىق جولىندا قىزمەت ەتىپ جۇرگەنىن كورىپ شىن جۇرەكتەن قۋانامىن، ماقتانامىن! شاكىرتتەرىنە اسا مەيىرىمدى، شىنشىل مىنەزدى، جۇرەگى باتىر، جانى جومارت، پەيىلى دارقان، ويى وتكىر اپامىز! ءسىزدى مەرەيتويىڭىزبەن قۇتتىقتاي وتىرىپ، زور دەنساۋلىق، ۇزاق عۇمىر، جاڭا شىعارماشىلىق تابىستار، وتباسىڭىزعا اماندىق تىلەيمىن!

ونەگەلى ۇستاز، مەيىرىمدى انا

1986 جىل. ا.جۇبانوۆ  اتىنداعى دارىندى بالالارعا ارنالعان رەسپۋبليكالىق مۋزىكالىق  مەكتەپ-ينتەرناتى. ساباق ءجۇرىپ جاتىر.

ءدارىس بەرۋشى مۇعالىم - ساۋلە مەشىتبايقىزى . انشەيىندە ءجۇزى جىلى ، ءوڭى انىق   اپايىمىز  بۇگىن كوڭىلسىز، سىنىپ ءىشى جىم جىرت، بىزدەر اڭ تاڭ  ...

ول كەز كولبيننىڭ قازاقستانعا ەندى عانا باس حاتشى بولىپ كەلگەن كەزى بولاتىن. ء(بىز ءالى بالامىز، ارينە نەبارى 5 ءشى سىنىپتا وقىعاندىقتان ءمان-جايدى تۇسىنە بەرمەيمىز),

- نە بوپ قالدى ەكەن ، ءا؟   ە-ە،  اپايدىڭ ۇيىندە ءبىر جاعداي بولىپ قالعان ەكەن عوي، - دەپ سىبىرلاسىپ قويامىز.

ءبىر ۋاقىتتا ساۋلە اپاي باسىن كوتەرىپ،كۇرسىنىڭكىرەپ : - بالالارىم- اۋ، ەلىمىزدە قانداي سۇمدىق جاعداي بولعانىن بىلەمىسىڭدەر وزدەرىڭ؟-دەپ سۇراق قويدى(بالا بولساق تا انانى -مىنانى ەستيمىز،قالادان قاتىناپ وقيتىن وقۋشىلار بار). انا جەر،مىنا جەردەن : «ءيا ، اپاي ەستىدىك، بىلەمىز»، - دەگەن   جاۋاپتار ەستىلدى.

- ايتىڭدارشى ، عاسىرلار بويى قازاق حالقىنىڭ كورىپ كەلە جاتقان ازابى مەن تاۋقىمەتى از با ەدى؟ ءوز ۇلتىمىزدى ءوز ۇلىمىز نەگە باسقارمايدى ؟ - دەپ،  ەسەيىپ كەلە جاتقان قازاق  بالالارىنىڭ سانالارىن رۋحتاندىرىپ، اڭگىمەنى ارىدەن قوزعاپ، تاريحتا ورىن العان ۇلت -ازاتتىق كوتەرىلىستەردىڭ سەبەپتەرى مەن سىرلارىن اشىپ، جاس جۇرەكتەردە نامىس وتىن  جاندىرىپ،  پاتريوتتىق جىگەرىمىزدى جانىعان ادام - ول ساۋلە اپاي بولاتىن!

اياۋلى ساۋلە مەشىتبايقىزى، بىلەمىن، ءسىز بۇگىندە تالماي، تىنباي ەلىڭىزدىڭ ەرتەڭى ءۇشىن اق ادال ەڭبەك ەتۋدەسىز! ەندەشە جاساي بەرىڭىز، ال مەن  بولسام سىزدەن  العان  تاربيە مەن ءبىلىمىمدى تەك تاۋەلسىز ەلىمىزدىڭ ونەرىن وركەندەتۋدىڭ جولىنا ارنايمىن دەپ انت ەتەمىن!

قۇرمەتپەن بالاڭىز، كومپوزيتور،تەلەجۇرگىزۋشى ،  پروديۋسەر،رەسپۋبليكالىق جانە حالىقارالىق بايقاۋلاردىڭ لاۋرەاتى ، قر مادەنيەت قايراتكەرى ارمان دۇيسەنوۆ.

تامىرشىسى ءداۋىردىڭ

ءداۋىرىنىڭ تىنىسىنان سىر ۇققان،

سان كۇرەستە جانى كۇيىپ شىنىققان.

ارى تازا-جاس سابيدەي بىلىقتان،

قانىپ ىشكەن ءمولدىر، تازا تۇنىقتان،

ءوزىڭ ەدىڭ اپاتاي!!!

كۇنشىل توبىر قاقساداعى توبىقتان،

جاقسى ادامدار پەرىشتەدەي-جولىققان.

تىرشىلىكتە قامىققان ھام تورىققان،

دارىندىنى قۇشاعىناپ اپ جىلىتقان،

ءوزىڭ ەدىڭ اپاتاي!!!

مەيىرىمىڭىز ەلجىرەگەن-شۋاقتاي،

ءومىر، ءومىر بارادى اعىپ سىناپتاي.

ءتالىمىڭىز سارقىلمايدى-بۇلاقتاي،

ءتىلدىڭ تۋىن كەلە جاتقان قۇلاتپاي،

ءوزىڭ ەدىڭ اپاتاي!!!

قىرانعا ءتان كوك جۇزىندە قالىقتاۋ،

ۇستازعا ءتان ۇيرەتۋدەن جالىقپاۋ.

ءجۇرىڭىزشى الدىمىزدا بولىپ ساۋ،

انا دەگەن اسقاق اتىڭ-الىپ تاۋ،

امان بولىڭىز اپاتاي!!!

ناعاشىباي قابىلبەك

.......................................................