جۋىردا اتىراۋ وبلىسى يساتاي اۋدانىندا قىزىق وقيعا بولدى. اتىراۋ وبلىستىق ءىىد ءباسپاسوز قىزمەتىنىڭ حابارلاۋىنشا، ونىڭ حيكاياسى مىناداي:

جۋىردا اتىراۋ وبلىسى يساتاي اۋدانىندا قىزىق وقيعا بولدى. اتىراۋ وبلىستىق ءىىد ءباسپاسوز قىزمەتىنىڭ حابارلاۋىنشا، ونىڭ حيكاياسى مىناداي:

...سەلولىق جانارماي ستانساسىنىڭ مەنەدجەرى جۇمىس ورنىنا كەلىپ، توبەسىنە جاي تۇسكەندەي، اڭتارىلىپ قالادى. سويتسە، ەسىگى شالقاسىنان اشىلعان عيماراتتىڭ استى-ۇستىنە شىققان ەكەن. بىرەۋ بىردەڭەنى تىنتكىلەپ ىزدەگەندەي، زاتتار جان-جاققا شاشىلعان. كاسسادا سوقىر تيىن قالماپتى. ستانساداعى كەزەكشى وپەراتور ورنىندا جوق. حابارلاسايىن دەسە، تەلەفونى ءوشىرۋلى. مىناۋ ماسقارا كورىنىسكە كۋا بولا سالا ول دەرەۋ پوليتسەيلەرگە شاعىمدانادى. يساتاي اۋداندىق ءىىب-ءىنىڭ قىزمەتكەرلەرى وقيعا ورنىنا جەدەل جەتىپتى. بۇل توپقا ودان سوڭ وبلىستىق ءىىد ء–نىڭ كريمينالدىق پوليتسيا باسقارماسىنىڭ جەدەل-تەرگەۋ توبىنىڭ قوسىلعان جايى بار. سودان تەرگەۋ مەن تەكسەرۋ جۇمىستارى باستالادى. اق تەر، كوك تەر بولىپ، توڭىرەكتى شولىپ جۇرگەن كەزدەرىندە، انىعىندا، اتىراۋ – استراحان تاس جولى بويىنان 5 شاقىرىم جەردەن جانارماي بەكەتىنىڭ وپەراتورى تابىلادى. ونىڭ ءۇستى-باسى قان ەكەن. ءارتۇرلى جاراقات العان. «ۋحىلەپ» وتىرىپ ايتقانى، جۇماعا قاراعان ءتۇنى ستانساعا قارا «دجيپ» كەلگەن. ودان ساۋ ەتىپ، ءتورت ادام تۇسكەن. «ونىڭ ەكەۋى بەتپەردە كيگەن بولسا، بىرەۋى قاۋعا ساقالدى» دەيدى جابىرلەنۋشى. بايانداۋىنشا، سۋىت جۇرگەندەردىڭ ءبىرى ونىڭ بەتىنە گاز شاشىپ جىبەرىپ، ەسىنەن تاندىرا قۇلاتقان. ونىمەن قويماي، ساۋتامدىعىن قالدىرماي ساباپتى. بەكەت كاسساسىنداعى بارلىق اقشانى قالتالارىنا باسقان. ودان سوڭ الگىنى يت-قۇسقا جەم بولسىن دەگەن شىعار، دالاعا لاقتىرىپ كەتىپتى.

جابىرلەنۋشى 40 جاستاعى ايەل وقيعانى وسىلايشا تىزبەلەپ بەرىپتى. الايدا، تالاي قۋلاردى قۇرىقتاپ جۇرگەن تەرگەۋشىلەر ونىڭ اڭگىمەسىنىڭ شيكىلىگىن العاشقى ساتتەن-اق بايقاعانعا ۇقسايدى. ول كۇماندەرى بەكەر ەمەس ەكەن. كەلەسى كۇنى وپەراتور ءتىلى جەتكەنشە ايتىپ شىققان «قارا ءدجيپتىڭ حيكاياسىنىڭ» جالعان ەكەندىگىن مويىنداۋعا ءماجبۇر بولدى. بايقاسا، كاسساداعى 300 مىڭ تەڭگەنى ۇيىنە جاسىرعان. قالعان 400 مىڭ تەڭگە مەن ۇيالى تەلەفوندى سومكەگە سالىپ، دالاعا كومگەن. قىزىعى بۇل دا ەمەس، كۇدىكتى كۇرەكتى الىپ، باسىن سوققىلاپ، ءوز-وزىنە جاراقات سالعان كورىنەدى. دەگەنمەن، ونىڭ ءبارى بەكەرگە شىقتى. امالى تاۋسىلىپ، اعىنان جارىلعان ول بارلىق قاراجاتتى «قويماسىنان» شىعارىپ، تاۋىپ بەردى.

قازىر وسى جاعدايعا بايلانىستى قىلمىستىق ءىس كوتەرىلىپ، تەرگەۋ باستالدى.

«اباي-اقپارات»