ەكپەنى جالپىعا بىردەي مىندەتتەۋ كەرەك پە؟
بالالاردىڭ بارلىعىنا ەكپە جاساۋ مىندەتتى شارا بولۋى مۇمكىن. دەنساۋلىق ساقتاۋ مينيسترلىگى بۇل نورمانى زاڭ جۇزىندە بەكىتۋدى ۇسىنۋدا.
ماجىلىسمەندەردىڭ ءبىرازى وعان قارسى. ساپاسىز ەكپە كەلسە، ۇرپاقتى مۇگەدەك ەتەمىز، دەپ وتىر. سەبەبى ۆاكتسينانى جەتكىزۋشى كومپانيالاردى الدىن الا ەسكەرتۋسىز تەكسەرۋگە بولمايدى ەكەن. بۇل تۋرالى ەۋرازيا ءبىرىنشى ارناسى حابارلادى.
ەستەرىڭىزدە بولسا، وسىدان ءبىراز بۇرىن ءماجىلىس دەپۋتاتتارى مەن قر دسم ماماندارىنىڭ اراسىندا قىزۋ پىكىرتالاس بولعان. بالاعا ەكپە جاساۋ كەرەك پە، جوق پا، دەگەن ماسەلە تالقىعا سالىنىپ، اياعى ايعايمەن اياقتالا جازداعان. سول كەزدە "دەنساۋلىق ساقتاۋ تۋرالى كودەكسكە وزگەرىستەردى ەنگىزۋ تۋرالى" زاڭ جوباسىنىڭ جۇمىس توبى ورتاق كەلىسىمگە كەلە الماعان. بەكبولات تىلەۋحان باستاعان ءبىرلى-جارىم دەپۋتات قارسىلىق تانىتىپ، ەكپەنى جالپىعا بىردەي مىندەتتەۋگە بولمايتىنىن ايتقان. الەۋمەتتىك جەلىگە تاراعان سول ءبىر تالاس سوزدە ءماجىلىس دەپۋتاتى بەكبولات تىلەۋحان:
"بىت-شىت ۆاكتسينانى ەككىزىپ، مەن كوز الدىمدا اكەسى بولىپ تۇرا بالانى "كالەكا" قىلاتىن جاعدايعا جول بەرگىزبەيمىن. قازاقستاننان كەت دەگەن ءسوز بە بۇل؟ ەگەر زاڭعا مويىنسۇنباساڭ، سەن بۇل مەملەكەتتەن كەتۋگە ءماجبۇر بولاسىڭ. مەن اتا-بابام ءومىر سۇرگەن ەلدەن نەگە كەتۋگە ءتيىسپىن؟ سىزدەر سوعان يتەرمەلەپ جاتىرسىزدار! جاڭاعى ءسىزدىڭ سوزىڭىزدەن تۇسىنگەن نارسەم. "دەشەۆۋيۋ ۆاكتسينۋ پوكۋپايۋت، پوەتومۋ" دەپ وتىرسىزدار. "ۆىسوكو ەففەكتيۆنىي ۆاكتسينا الىڭىزدار" دەيسىزدەر. مۇنىڭ ارتىندا ۇلكەن اقشا جاتىر. ول اقشانى انىقتاۋ ءۇشىن مىنا جەردە سىزدەر اكتەر بولىپ، ارتيست بولىپ وتىرسىزدار! ال ءبىز حالىقتىڭ اتىنان ايتقان سوڭ، مىنانى وتكىزەتىن بولساق، ءبىزدىڭ پارلامەنتتەگى قۇنىمىز كوك تيىن تۇرمايدى", دەپ سويلەگەن.
وسى ءبىر داۋلى ديسكۋسسيادان كەيىن، اراعا ءبىراز ۋاقىت سالىپ، قر دەنساۋلىق ساقتاۋ ءمينيسترى پارلامەنتكە قايتا كەلىپتى. سول زاڭ جوباسى. سول نورما. تاعى دا سول بەكبولات قانايۇلى قارسى شىعىپتى. دالىرەك ايتساق، دەپۋتات تىلەۋحان "مىندەتتەۋ" سوزىنە قارسى شىعىپ وتىر. دەپۋتاتتىڭ پىكىرىنشە، جالپىعا بىردەي مىندەتتەۋگە بولمايدى. ال مينيستر ءبىرتانوۆتىڭ ءوز ءۋاجى بار كورىنەدى.
ەلجان ءبىرتانوۆ، قر دەنساۋلىق ساقتاۋ ءمينيسترى:
- بالالاردىڭ، اتا-انالاردىڭ ەكپەدەن باس تارتۋىنىڭ سالدارىنان ەلىمىزدە باسقا، بۇرىننان ۇمىت قالعان ينفەكتسيالىق اۋرۋلار قايتا كەلىپ جاتىر. ءبىزدىڭ ويىمىز، كوپ مەملەكەتتە وسى كەيبىر، بارلىق ەمەس، كەيبىر ۆاكتسينالاردى مىندەتتى تۇردە سالادى. ونىڭ سەبەبى باسقا ازاماتتاردىڭ دەنساۋلىعىن ساقتاۋ ول ۇكىمەتتىڭ مىندەتى، دەيدى مينيستر مىرزا.
مارات احمەتجانوۆ، قر باس پروكۋرورىنىڭ ورىنباسارى:
- ادامنىڭ ءومىرى مەن زاڭى ەڭ قۇندى دەپ ەسەپتەلەدى. سوندىقتان ءبىزدىڭ ساراپتامامىز بويىنشا كونستيتۋتسياعا بۇل نورمالار قايشى كەلمەيدى، دەپتى.
ءسويتىپ، تاقىرىپتىق ديسكۋسسيادان ۇققانىمىز - ءبىر تۇيىتكىل بار. سول ەكپەنىڭ ساپاسىن قاداعالاۋ ءۇشىن ءتيىستى كوميتەت تەكسەرۋ جۇمىستارى جونىندە بىرنەشە تاۋلىك بۇرىن ەسكەرتۋى كەرەك ەكەن.
"الدىن الا ءتىنتۋ بولاتىنىن بىلەتىن قىلمىسكەر دايەكزاتتاردى ساقتاپ وتىرمايدى عوي. سوندىقتان ءدال ۆاكتسيناعا كەلگەندە "ەسكەرتۋ" تالابىن الىپ تاستاۋ كەرەك", دەيدى ماجىلىسمەندەر.
نۇرلان نىعماتۋلين، ءماجىلىس توراعاسى:
- ەگەر ءتيىستى مەملەكەتتىك ورگاننىڭ قاجەتتى قۇزىرى بولماسا، ۆاكتسيناعا جاۋاپتىلاردى قالاي باقىلاماقشىسىزدار؟ زاڭ نورمالارىن دايىنداعاندا ەسكەرمەگەندەرىڭىزگە تاڭ قالامىن.
ازاماتتار بىلە ءجۇرسىن، دەپۋتاتتار ەكپەگە قاتىستى تەندەردى وتكىزەتىن ورگانداردىڭ، ۆاكتسينانى جەتكىزۋشى مەكەمەلەردىڭ جاۋاپكەرشىلىگىن قاتاڭداتۋدى ۇسىندى. ەگەر ادام ومىرىنە قاۋىپ تۋدىرسا، 5 جىلعا دەيىن باس بوستاندىعىنان ايىرىلادى!، دەدى سپيكەر.
مارات احمەتجانوۆ، قر باس پروكۋرورىنىڭ ورىنباسارى:
- بۇل نورمانى ەرەكشە ءتارتىپ قاتارىنا قوسامىز. وندا الدىن الا ەسكەرتۋدىڭ قاجەتى جوق. كەرىسىنشە، تەكسەرۋ ءوتىپ بولعان سوڭ، ءبىر تاۋلىكتەن كەيىن نە سەبەپتى شارا قولدانىلعانىن، قانداي ءمان-جاي انىقتالعانى تۋرالى ايتىلاتىن بولادى، دەيدى رەسمي وكىل.
;feature=emb_titleكودەكس ازىرگە ءبىرىنشى وقىلىمدا قارالدى. زاڭ جوباسى ماقۇلدانعانىمەن ەكىنشى وقىلىمدا ايتىلعان ەسكەرتۋلەر وزگەرىستەر تۇرىندە ەنگىزىلۋى كەرەك.
Abai.kz
