«بۇۇ -ايەلدەر» قۇرىلىمىنىڭ جوبالىق مەنەدجەرى گۇلنار سمايىلوۆا حالىق ىشىندە بەيبىت جيىن وتكىزۋ مادەنيەتىن كوتەرۋ بويىنشا جۇمىس جۇرگىزۋ كەرەكتىگىن اتاپ ءوتتى.

«مەملەكەت ءۇشىن وسىناۋ ماڭىزدى زاڭدى ازىرلەگەندەرىڭىز ءۇشىن راحمەت. وسى زاڭدى قابىلداۋمەن بىرگە حالىقتىڭ تانىم-تۇسىنىگىن ارتتىرۋ بويىنشا، ياعني بەيبىت تۇردە جينالۋدىڭ مادەني امال-ادىستەرىن دە ۇيرەتۋ كەرەك دەگەن پىكىردەمىن. بالكىم قوعامدىق كەڭەستەردە، ءماسليحاتتاردىڭ الاڭىندا ادامداردىڭ قالاي بەيبىت جينالاتىنىن، قالايشا سىپايى امال-ادىستەر ارقىلى وي بىلدىرۋگە بولاتىنى جايلى تىڭداۋ وتكىزگەن ءجون بولار»، – دەدى

گۇلنار سمايىلوۆا بەيبىت جيىندار تۋرالى زاڭ جوباسىنىڭ تالقىلاۋىندا. ول سونىمەن قاتار جالپى جاعدايدى ميتينگكە ۇلاستىرۋدىڭ قاجەتى جوقتىعىن ايتادى.

«بەيبىت جيىندارعا جەتكىزبەي-اق قوعامدىق كەڭەستەر مەن ماسليحاتتارعا بارىپ، ياعني ميتينگكە جينالماي-اق ەل پىكىرىن تىڭداي الاتىنداي جۇمىس جۇرگىزگەن ابزال. قوعامدىق قاۋىپسىزدىك پەن حالىق ۇنىنە قۇلاق اساتىن مەملەكەت دەپ ايتىپ جۇرگەنىمىزدەي، جيىندارعا جەتكىزبەي-اق حالىقتى تىڭداي بىلۋگە بولادى»، - دەدى گۇلنار سمايىلوۆا.

ءوز كەزەگىندە ەۋروپاداعى قاۋىپسىزدىك جانە ىنتىماقتاستىق ۇيىمى باعدارلامالارى كەڭسەسىنىڭ باسشىسى دەرد سابو زاڭ جوباسىنا وڭ باعاسىن بەردى.

«زاڭ جوباسى ءدال وسىلاي ازىرلەنۋى كەرەك. جۇمىس بارىسى ءبىزدىڭ كوڭىلىمىزدەن شىعىپ وتىر. ءارتۇرلى ورىندا، ءارتۇرلى دەڭگەيدە پىكىرتالاستار بولىپ جاتىر. وسىنىڭ ءبارى جاڭا ءارى باعىتى دۇرىس زاڭنىڭ دۇنيەگە كەلۋىنە مۇرىندىق بولار دەگەن سەنىمدەمىن»، - دەدى دەرد سابو ەلوردادا زاڭ جوباسى تالقىلانعان جيىننان كەيىن تىلشىلەردىڭ سۇراعىنا جاۋاپ بەرە وتىرىپ.

سپيكەر ەۋروپاداعى قاۋىپسىزدىك جانە ىنتىماقتاستىق ۇيىمى بۇل ۇردىسكە ۇلەس قوسۋعا دايىن ەكەنىن ءبىلدىردى.

«ءدال وسى سۇراقتارمەن اينالىساتىن ينستيتۋتتارىمىز، ەقىۇ-نىڭ جەكە بولىمشەلەرى بار. ۇيىمعا مۇشە مەملەكەتتەردىڭ ءوتىنىشى بويىنشا ساراپشىلىق پىكىر ءبىلدىرىپ وتىرادى. ءبىزدىڭ ۇيىم بۇل زاڭ جوباسىنا تالداۋ جۇرگىزۋگە دايىن»، - دەدى دەرد سابو.

ايتا كەتسەك، ەلوردادا بۇگىن قر اقپارات جانە قوعامدىق دامۋ ءمينيسترى داۋرەن اباەۆتىڭ توراعالىعىمەن بەيبىت جيىندار تۋرالى زاڭ جوباسىن جەتىلدىرۋ ماسەلەسى تالقىلاندى.

ءىس-شاراعا قر سىرتقى ىستەر ۆيتسە-ءمينيسترى ەرجان اشىقباەۆ، ەۋروپاداعى قاۋىپسىزدىك جانە ىنتىماقتاستىق ۇيىمى باعدارلامالارى كەڭسەسىنىڭ باسشىسى دەرد سابو، USAID-ءتىڭ نۇر-سۇلتانداعى كەڭسەسىنىڭ ديرەكتورى رايان ۋەدل، قازاقستان رەسپۋبليكاسىنداعى بۇۇ ادام قۇقىقتارى جونىندەگى جوعارعى كوميسسار باسقارماسىنىڭ وكىلى لەيلا دۇيسەكوۆا، سونداي-اق گەرمانيا، ۇلىبريتانيا، نيدەرلاندى، اقش-تىڭ قازاقستانداعى ەلشىلىكتەرىنىڭ وكىلدەرى قاتىستى.

Abai.kz